Lu iza 2015, yeganna biaʼ 175,000 binni Sucursal de Centroamérica stiʼ ca testigu stiʼ Jiobá ni nuu México. Biaʼsi biaʼ 670 binni yeganna Betel cada dxi. Stale tu gudixe autobús para checaʼ pur grupu ne bíʼnicaʼ ti viaje de stale dxi. Nuu de laacabe biʼniʼ plan chupa chonna beeu ante.

Nuu chupa chonna de ca binni ni yeganna sucursal o Betel, gupa xidé bíʼnicaʼ stale sacrificiu. Casi ti congregación ni nuu estado de Veracruz, México, stale de laacaʼ qué gápacaʼ bueltu para quíxecaʼ viaje de 550 kilómetru lu autobús. Ngue runi, bíʼnicaʼ ti plan ni biree lá: Proyecto Betel. Guca organizárcabe pur grupu para gúnicabe guendaró ra lídxicabe ne gutoocabe ni. Laacaʼ biʼniʼ reciclárcabe botella de plásticu. Lu chonna beeu si maʼ bisaacabe saca viaje que.

¿Ñee guleendúcabe xiixa né stipa bíʼnicabe la? Laacabe nácabe guleendúcabe stale. Casi ti joven de congregación que ni láʼ Lucio bicaa: «Ra yegannaʼ Betel bicaani naa gapaʼ meta ne guiniiseʼ en sentidu espiritual. Yanna jma maʼ racaniaaʼ ndaaniʼ congregación stinneʼ». Ne Elizabeth, ni napa 18 iza, guníʼ: «Dxiruʼ guyaaʼ Betel nga biiyaʼ ne bineʼ sentir dxandíʼ nadxiisaa ca xpinni Dios, casi runibiáʼ binni laacaʼ. Ne ngue bicaani naa gudieeʼ jma de naa Jiobá ne gacaʼ ti binni ni runi predicar de tiempu completu».

Nuu dxi reeda mil binni para gunibiáʼ raríʼ. Cani naca encargadu para guni tender ca binni ni chiganna lugar riʼ ruyúbicaʼ modo gácacaʼ jma hospitalariu né laacabe. Lizzy, guníʼ: «Nabé riuaaʼ gana ora guuyaʼ stale binni. Raca fe stinneʼ jma naguidxi ora guuyaʼ pabiáʼ risaca Betel para laacabe ne ora guuyaʼ guiráʼ sacrificiu ni rúnicabe pur gunibiáʼcabe raríʼ».

Cani runi dxiiñaʼ ndaaniʼ xcaadxi departamentu laaca rácacaʼ guía para ganda gaca tender mil binni ni reeda. Neca ridale xhiiñacabe peru riuuláʼdxicabe guidxaagalúcabe ca binni ni reeda gunibiáʼ Betel. Juan guníʼ: «Riuuladxeʼ guuyaʼ lúcabe ne gunadiagaʼ ca diidxaʼ riníʼcabe ora maʼ cudiicabe xquíxepeʼ. Rusiéchecabe naa dxi ca».

Laaca riuu cani jma nahuiiniʼ nayecheʼ ora reedacaʼ Betel. Noriko, ti hermana ni runi dxiiñaʼ ra Departamento de Computación, guníʼ: «Rinabadiidxaʼ ca xcuidihuiiniʼ zeeda lu grupu stinneʼ pa ñuuláʼdxicaʼ ñúnicaʼ dxiiñaʼ Betel. Ne guiracaʼ riniʼcaʼ: “¡Ñuuláʼdxidu pue!”». Tobi de ca lugar ra jma riuulaʼdxiʼ ca baʼduhuiiniʼ nga Rincón de Caleb, racá rireecabe foto né ca dibuju stiʼ Caleb ne Sofía, cani riree lu caadxi videu de caricatura ni láʼ Guca xhamigu Jiobá. Noriko, guníʼ: «Guizáʼ riuulaʼdxiʼ ca xcuidi ni».

Stale xcuidihuiiniʼ rusihuínnicaʼ rusisácacaʼ dxiiñaʼ ni raca Betel. Casi Henry, ti xcuidihuiiniʼ de México, bitopalube bueltu ndaaniʼ ti alcancía para gudiibe ti donación ora chebe Betel. Laaca bicaabe ti nota ne nani: «Rinabaʼ laatu iquiiñetu bueltu riʼ para gúnirutu libru ne revista. Xquíxepeʼ laatu saca cayúnitu dxiiñaʼ para Jiobá».

Ca oficina o ca imprenta ni napa ca testigu stiʼ Jiobá lu guidubi Guidxilayú zanda chiganna binni cani sin quixe. Runi invitardu lii chigánnaluʼ intiica si tobi de ca sucursal stidu. Nánnadu ziuuláʼdxiluʼ cani stale. Pa racaláʼdxiluʼ gánnaluʼ jma la? guyé ra ná TU LAADU > SUCURSAL NE CANI RIGANNA.