Clase 137 stiʼ scuela stiʼ Galaad guca graduación stini 13 de septiembre 2014, ndaaniʼ Centro Educativo stiʼ Watchtower (Patterson, Nueva York). Guca scuela riʼ para gusiidicabe ca Testigu ni maʼ nanna stale ti ganda iguidxi fe stiʼ ca hermanu ndaaniʼ ca congregación ne ndaaniʼ ca Betel ra chindácabe. Guca graduación ca Patterson ne laaca bitiidicabe ni ndaaniʼ xcaadxi auditorio ni nuu Canadá, Estados Unidos, Jamaica ne Puerto Rico. Biaʼsi 12,333 binni bicaadiaga programa que.

Samuel Herd, tobi de cani nuu lu Grupu ni Zaniruʼ stiʼ ca testigu stiʼ Jiobá, gúcabe presidente stiʼ programa. Ora bizúlube, bizeetebe chupa chonna biaje jma jneza modo riníʼ ique Dios que modo riníʼ íquenu (Isaías 55:8, 9). Laabe nabe neca gaayuʼ beeu nga yené ca estudiante ca para guiziidicaʼ modo riníʼ ique Jiobá, peru ti luguiáʼ si nga binibiáʼcabe neza stibe (Job 26:14). Laaca guniʼbe ricaanu stale ndaayaʼ cada biaje guidagulisaanu para guininu de cani riníʼ ique Dios. Ne ngaca nga ni chigaca lu programa especial riʼ.

«Ca guenda ni zeeda de espíritu santu: paciencia» (Gálatas 5:22). Libana ni bitiidiʼ hermanu John Larson, ni nuu lu comité stiʼ sucursal stiʼ Estados Unidos, jma bizeeteʼ chupa modo zanda gusihuínninu, paciencia, tobi de ca guenda ni rudii espíritu stiʼ Dios. Primé, naquiiñeʼ gápanu paciencia laga cusiidiʼ Jiobá laanu ne laga cayacané laanu iguidxi fe stinu (1 Pedro 5:10). Abrahán, bisihuinni gupa paciencia laga cusiidiʼ Jiobá laa ne laga cabeza gaca cumplir ca promesa bíʼnibe (Hebreos 6:15).

Guiropa, caquiiñeʼ gápanu paciencia laca laanu. Zándaca zucaa ique ca estudiante riʼ gúnicaʼ jma de biaʼ zanda gúnicaʼ ora gunduuxecaʼ scuela stiʼ Galaad. Pa qué ganda gúnicabe ni naguixhe íquecabe casi chindácabe ra guca asignárcabe la? zándaca nácabe: «Xiñee qué ganda guneʼ ni pue». Pur ni maʼ huazaaca hermanu Larson gudxi ca estudiante que pa qué guireecaʼ gana ne cadi gusaanacaʼ de gúnicaʼ dxiiñaʼ laga cusiidiʼ Jiobá laacaʼ la? zanda gudxiilucaʼ ca guendanagana sticaʼ (Hebreos 6:11, 12).

«Cadi gudxiibaʼ ladxidoʼto laa ne qué chuʼ dxi gatiʼ ni.» Anthony Morris, stobi de cani nuu lu Grupu ni Zaniruʼ, gulee libana stiʼ lu Salmo 22:26, ra na: «Qué chuʼ dxi gatiʼ ladxidoʼto». Pa racaláʼdxinu guicaanu ndaayaʼ ca cadi naquiiñeʼ gudxíʼbanu laanu. Hermanu Morris guníʼ zanda iquiiñeʼ Jiobá laanu pa qué rudxíʼbanu laanu. Tutiica si de laanu, dede né cani maʼ ziné stale iza de cayuni ni na Dios, zanda gusaana de gucaa ique gaca casi Jesucristu (2 Pedro 1:9).

Biblia ruzeeteʼ caadxi binni ni qué nudxiibaʼ laa ne ruzeeteʼ ni binni ni bidxiibaʼ laa. Casi Herodes Agripa gúcabe ti binni nabé bidxiibaʼ laa dede bidiibe lugar gusisaca binni laabe lugar de nusisácacaʼ Dios. Ngue runi biiti ti ángel laabe ne gudó bicutiʼ laabe (Hechos 12:21-23). Peru Pedru qué nusihuinni pa bidxiichi ora gudxi Jesús laa «cadi de Dios di zeeda ni cá ique [...] sínuque de binni guidxilayú» (Mateo 16:21-23). Qué nudxiibabe laabe ne gunabe guluu jneza Jesús laabe. ¡Galán ejemplu bisaanabe para laanu! (1 Pedro 5:5.)

Chupa chonna de ca estudiante riʼ zúnicaʼ dxiiñaʼ ndaaniʼ Betel stiʼ ca testigu stiʼ Jiobá. Gúdxica hermanu Morris laacabe pa gudxiibacabe laacabe qué ziuucabe nayecheʼ Betel. Peru raca nagana para binni gudii cuenta pa rudxiibaʼ laa. Para gusiene hermanu Morris cani guníʼ, bizeeteʼ maʼ raca stale iza bidiicabe conseju ti binnigola purtiʼ nabé rudxiibaʼ laa ne binnigola que bicaa ra nuu sucursal: «Gastiʼ sti binni ni qué rudxiibaʼ laa casi naa». Gudxi hermanu Morris ca estudiante que cadi gaca xpiaʼcaʼ zaqué. Ora guiníʼ íquecabe jma dxiʼbaʼ Jiobá ne Jesús que laacabe, qué zaníʼ íquecabe jma risaca stiidxacabe ne qué zudxiibacabe laacabe.

«Qué riguubiaʼbe pabiáʼ espíritu rudiibe» (Juan 3:34). Michael Burnett, ti instructor stiʼ scuela que gudxi ca estudiante que zacané espíritu santu laacaʼ guni chaahuicaʼ guendanagana gápacaʼ ne ora qué gánnacaʼ ximodo gúnicaʼ xiixa. Espíritu que nga gucané Bezalel gudxiilú ca guendanagana gupa laga cayuni tabernáculo que (Éxodo 35:30-35). Gucané ni artesanu riʼ guni xhiiñaʼ ne para gusiidiʼ xcaadxi. Zacaca zacané ni cani cunduuxeʼ scuela riʼ ne jmaruʼ si pa chinándacaʼ casi modo biziidicaʼ de Biblia lu ca clase gucuaacaʼ.

Dxi bibani Bezalel, laaca biʼniʼ ca gunaa israelita ti dxiiñaʼ nabé risaca para guca tabernáculo (Éxodo 35:25, 26). Zacaca nga ca hermana ni guyuu lu clase riʼ, maʼ bisihuínnicaʼ zanda gacanecaʼ xheelacaʼ lu ni gúnicabe. Maʼ para guiluxe libana stiʼ hermanu Burnett guníʼ: «Pa iquiiñetu guiráʼ ni nánnatu, qué gudxiibatu laatu ne guzuubatu diidxaʼ la? qué zaguubiáʼ Jiobá espíritu santu ni gudii laatu».

«Zuyaaneuʼ naa la?» Mark Noumair, ni racané lu comité de Enseñanza, bizeeteʼ de dxi gunabaʼ David chinécabe arca stiʼ pactu Jerusalén (2 Samuel 6:12-14). Laga ziyuunécabe arca que ndaaniʼ guidxi que, bihuínnica qué rudxiibaʼ rey que laa purtiʼ biyaané ca esclava stiʼ ca siervu stiʼ (2 Samuel 6:20-22). Nannadxíchinu qué ñaandaʼ ca gunaa que ni bizaaca dxi riʼ. Óraque gudxi hermanu Noumair laacabe laaca zanda gúnicabe zaqué. Gúdxibe laacaʼ: «Ñee zunibiáʼcabe laatu pur racanetu cani qué gapa xiixa dxiiñaʼ ndaaniʼ xquidxi Dios la? [...] Ñee zusisácatu xcaadxi purtiʼ galán xpiaʼcaʼ la?».

Pa gannaxhiicabe ca hermanu zacá la? zusihuínnicabe zinándacabe ejemplu stiʼ Jiobá (Salmo 113:6, 7). Neca guidxaagacabe binni ni rudxiibaʼ laa, cadi gudiicabe lugar guicá ni laacabe. Xi zacané laacabe yaʼ. Sicaríʼ guníʼ hermanu que: «Zanda gúnitu ni pa guiníʼ íquetu guirutiʼ nácatu». Ne laaca guniʼbe: «Lagapa ca dendxuʼ stiʼ Jiobá casi ñúnibe ni laabe».

«Gucheechenu diidxaʼ guiráʼ ora.» William Samuelson, ni naca superintendente stiʼ Departamentu stiʼ ca scuela ni napa xquidxi Dios, bizeeteʼ ejemplu stiʼ apóstol Pablu, ti hombre ni guniʼné binni stiidxaʼ Dios guiráʼ ora (Hechos 17:17). De raqué bitiidibe caadxi de ca estudiante que para guluiʼcaʼ xi guiráʼ bizaacacaʼ ora bicheechecaʼ diidxaʼ biaʼ dxi guyuucaʼ lu scuela que. Casi ti guendaxheelaʼ guníʼnecaʼ ti gunaa cutoo ndaaniʼ ti tienda naroʼbaʼ. Gulézacabe ora maʼ cadi nuu xhiiñapebe para biluíʼcabe laabe videu Xiñee naquiiñeʼ gúʼndaluʼ Biblia. Oraqueruʼ gúdxicabe laabe chuʼbe lu sitiu jw.org ni nápanu lu Internet, purtiʼ raqué zadxélabe información ni nuu lu diidxaʼ Lao, stiidxabe. Qué nindaa biguetaʼ guendaxheelaʼ riʼ yegánnacaʼ gunaa que para cadi gusaana de guiziidiʼ cani zeeda lu Biblia.

«Cadi gusaanatu de gacanetu gaca xhiiñaʼ Reinu.» William Nonkes, ni runi dxiiñaʼ ndaaniʼ Departamentu de serviciu, biʼniʼ entrevistar tapa estudiante. Ca hermanu riʼ maca gudixhe íquecaʼ gúnicaʼ ni na Isaías 6:8 ne maca cayacanecaʼ gaca xhiiñaʼ Reinu, peru gucané scuela que laacabe para gúnicabe jma. Hermana Snolia Maseko bizeeteʼ gucané Galaad laa ganna xi caquiiñeʼ guni jma jneza, ne jmaruʼ si modo iquiiñeʼ tiempu stiʼ neca maʼ bicheeche diidxaʼ guidubi ti dxi. Laabe guniʼbe: «Ni biziideʼ ra scuela riʼ zacané ni naa guneʼ jma que biaʼ guníʼ iqueʼ». Hermanu Dennis Nielsen, bizeeteʼ gucané Sofonías 3:17 laa cadi guiree gana gucheeche diidxaʼ. Laabe guniʼbe: «Pa chuʼ dxi guuyaʼ cadi stale ni cabeenduáʼ ra cucheecheʼ diidxaʼ la? cadi naquiiñeʼ guiaandaʼ naa cayechené Jiobá naa ne naa laaca naquiiñeʼ chuaaʼ nayecheʼ».

«Laguuyaʼ ca manihuiiniʼ ni ripapa» (Mateo 6:26). Stephen Lett, ni nuu lu Grupu ni Zaniruʼ, bidii libana de graduación que. Biquiiñebe conseju ni bidii Jesús ora guníʼ guyadxinu ca manihuiiniʼ ni ripapa para bizeetebe stale cosa ni zanda guizíʼdinu de laacame (Job 12:7).

Cásica ruyaanaʼ Jiobá ca manihuiiniʼ ni ripapa, laanu laaca rudiibe ni caquiiñenu para guibáninu. Nácanu «xpinni Dios» ne Biblia na zudiibe ni iquiiñeʼ binnilídxibe (1 Timoteo 3:15; 5:8). Peru laaca naquiiñeʼ gúninu xiixa. Ca manihuiiniʼ ca ruyúbicame ni cudii Dios laacame gócame. Laanu laaca naquiiñeʼ guyúbinu «primeru reinu» para guicaanu ndaayaʼ stibe (Mateo 6:33).

Laaca bizeeteʼ hermanu Lett, nuu manihuiiniʼ ribidxiaa ora guni sentir chiguizaaca xiixa. Ngaca nga laanu, laaca naquiiñeʼ quíxhenanu tuuxa hermanu ni cuchee ti gudii cuenta xi cayuni (Gálatas 6:1). Ne ora rucheechenu diidxaʼ riguixhenanu binni maʼ gaxha nuu «dxi stiʼ Jiobá» (Sofonías 1:14). Hermanu que laaca guníʼ cásica randa ridiʼdiʼ ca manihuiiniʼ ripapa dede ique ca dani jma nasoo ora maʼ zecaʼ sti lugar, zacaca nga racané Jiobá laanu para gudxíʼlunu guendanagana ni ruluíʼ qué zanda guni huantarnu (Mateo 17:20).

Maʼ para guiluxe ni. Gucuaa si ca estudiante que diploma sticaʼ, tobi de laacabe biindaʼ ti carta ra cá cudiicabe xquíxepeʼ pur cani biziidicabe. Ra maʼ ziluxe hermanu Herd guníʼ, gápanu cani riníʼ ique Jiobá ndaaniʼ ladxidoʼno zeeda gaca ni casi ñaca nucaʼnu clavu lu ca yaga ni didilaagaʼ lu vía tren. Naquiiñeʼ gudiicabe chupa chonna martillasu lú ca clavu cucaacabe ti guicá cani dxiichiʼ. Zacaca nga cani cayaca graduar riʼ, cadi naquiiñeʼ gusaana de guiníʼ íquecabe ca cosa ni biziidicabe lu scuela stiʼ Galaad. Hermanu Herd guníʼ: «Lacuee tiempu para gucaa dxiichitu cani biziiditu ndaaniʼ ladxidoʼto». Ne laaca guníʼ: «Pa guiníʼ íquetu casi riníʼ ique Dios la? zeeda gácatu ti ndaayaʼ para xcaadxi».