«Casi ti saa stiʼ ti familia.» Zacá gulee lá periódicu Frankfurter Rundschau dxi riʼ. Ne guiráʼ binni guyé asamblea riʼ zacaca riníʼ íquecaʼ.

Karla, ti gunaa de Puerto Rico guníʼ: «Ni bíʼnicabe pur naa bicaa ni naa guiníʼ iqueʼ casi ora ñuaaʼ ra lidxeʼ».

Sara, ti gunaa de Australia guníʼ: «Bineʼ sentir casi ñaca nigannaʼ ca binnilidxeʼ, peru ni nabeza sti ladu Guidxilayú».

Xiñee biʼniʼ sentírcabe sicaríʼ yaʼ. Purtiʼ guyuucabe lu asamblea internacional stiʼ ca testigu stiʼ Jiobá, ni guca ndaaniʼ estadiu Commerzbank-Arena ni nuu Fráncfort del Meno (Alemania), gúcani 18 dede 20 stiʼ julio 2014. Guyé biaʼ 37,000 binni raqué.

Bidagulisaa guirácabe raqué para guiziidicabe de Biblia. Lu programa que bicaadiaga binni relatu zeeda lu Biblia, diidxaʼ riuundaʼ, oración ne bihuinni xi bizaaca lu chupa historia zeeda lu Biblia ne bidiicabe discursu biree lu Biblia ni guluu gana binni.

Ndaaniʼ auditorio que guyuu Testigu de Alemania ne 3,000 ni zeeda de Australia, Estados Unidos, Gran Bretaña, Grecia, Líbano, Serbia ne Sudáfrica. Laaca guyuu 234 Testigu de 70 guidxi ni nuu lu serviciu de tiempu completu, casi ca misioneru.

Casi guidubi programa que bitiidicabe ni pur Internet 19 lugar ni nuu Alemania ne xcaadxi lugar de Austria ne Suiza. Biaʼsi 204,046 binni gunda biʼyaʼ ne bicaadiaga programa que.

Ndaaniʼ guidxi Fráncfort gudiʼdiʼ programa que lu diidxaʼ Alemán, inglés ne griegu. Ne xcaadxi lugar ra gudiʼdiʼ programa que, guca traducir ca discursu que lu 17 diidxaʼ, lade ca diidxaʼ riʼ zeeda árabe, chino, tamil, turco ne xhupa idioma seña.

Neca gadxé gadxé diidxaʼ riníʼ ca Testigu que, de gadxé gadxé guidxi zeedacaʼ ne gadxé cultura laacaʼ, peru cadi nuudíndecabe. Guendarannaxhii que biʼniʼ laacabe tobi si (Juan 13:34, 35). Nadxiicabe casi ñaca bíʼchicabe o béndacabe.

Sicaríʼ guníʼ Tobías, ti hombre de Gran Bretaña: «Maʼ bidúʼyadu nápadu familia ndaaniʼ stale guidxi. Gastiʼ qué zanda guxheleʼ laadu».

Davianna, ti gunaa de Puerto Rico guníʼ: «Maʼ binebiaʼyaʼ Testigu de jma de 20 guidxi. Yanna maʼ nannaʼ, guendarannaxhii nápadu Jiobá ne xcaadxi binni nga racané laadu chuʼdu tobi si».

Sicaríʼ guníʼ Malcom, de Australia: «Gucaʼ testigu stiʼ Jiobá ndaaniʼ ti guidxihuiiniʼ. Nabé ruundaʼ ca tema ni caníʼ de ca hermanu stinu nuu lu guidubi Guidxilayú ne ruuyaʼ ca videu ni caníʼ de laacabe. Peru Yánnaruʼ maʼ bieneʼ pabiáʼ sicarú nga gácanu ti familia si. Nabé biguidxi fe stinneʼ».

Biaʼsi 58 congregación de guidxi Fráncfort ne xcaadxi guidxihuiiniʼ nuu guidubi guriá bíʼnicaʼ jma regaluhuiiniʼ ne xcaadxi cosa ni ziuulaʼdxiʼ cani cheʼ asamblea que.

Sicaríʼ guníʼ Cynthia, ti gunaa de Estados Unidos: «Nabé nachaʼhuiʼ gúcacabe ne galán modo bidxaagalúcabe laadu. Qué ziuu dxi guiaandaʼ naa guendarannaxhii, guendanachaʼhuiʼ ne modo riuulaʼdxiʼ ca hermanu stidu gudiicaʼ ni nápacaʼ».

Sicaríʼ guníʼ Simon, ni nabeza Alemania: «Ladu tiica gutixhiluluʼ zuuyaluʼ modo nadxiisaacabe, zunadiágaluʼ modo cuxídxicabe ne zuni sentirluʼ cariñu stícabe. Stale ni maʼ bizíʼdidu de cada tobi de laacabe».

Amy, ti gunaa biʼniʼ viajar dede Australia para cheʼ asamblea que, guníʼ: «Guiráʼ cani bíʼnicabe para chuʼdu nayecheʼ ca huadxí que bisihuinni cani cadi fanáticu ca testigu stiʼ Jiobá. Nánnadu chuʼdu nayecheʼ sin guchéʼnedu Dios stidu».

Asamblea ni guca Fráncfort que nga tobi de ca asamblea internacional ni guca ndaaniʼ gaʼ guidxi nuu lu guidubi Guidxilayú.

Ora gunabadiidxacabe tobi de ca binni guyé asamblea que ximodo biʼniʼ sentir, laa guníʼ: «Bixuiʼlú binibiaʼluʼ ti familia gaxha stiluʼ, ti bíʼchiluʼ, peru qué gánnaluʼ pa bíʼchiluʼ laabe dxiqué. Ne ora binibiaʼluʼ laabe, bixheleʼ ndágabe lídxibe ne ladxidoʼbe para lii. Cadi dxandíʼ ruchátipa nga ladxidoʼloʼ la? Yanna biʼniʼ multiplicar ni 37,000 biaje. Zacá nga cayuneʼ sentir raríʼ».