«¡Biʼniʼ sentirdu nabé nadxii dxítacabe laadu!» Zacá guníʼ ti gunaa de Ucrania bicaadiaga si carta nabé risaca bicaa Grupu ni Zaniruʼ, o conseju central, stiʼ ca testigu stiʼ Jiobá. Stephen Lett, tobi de cani nuu lu conseju ca, biindaʼ carta riʼ dxi guyé Ucrania sábadu 10 ne domingu 11 stiʼ mayo 2014. Biaʼ 165,000 testigu stiʼ Jiobá bicaadiaga ni.

Ni biuundaʼ lu carta riʼ ne xcaadxi libana guca traducir cani lu gaayuʼ idioma ne gudiʼdiʼ cani ndaaniʼ 700 Yoo stiʼ Reinu (lugar ra ridagulisaa ca Testigu) ni nuu guidubi Ucrania.

Laaca sábadu ne domingu ca guca sti guendaridagulisaa Rusia raqué guyé Mark Sanderson, stobi de cani nuu lu Grupu ni Zaniruʼ, ne laaca carta ca bíʼndabe luni. Biaʼsi lu 14 idioma guca traducir ni gudiʼdiʼ lu guendaridagulisaa que ne bicaadiaga 180,413 Testigu nuu ndaaniʼ jma de 2,500 congregación de Rusia ne Bielorrusia ni.

Carta stiʼ Grupu ni Zaniruʼ ca gucuá ni para ca congregación de Rusia ne Ucrania. Biindaʼ hermanu Sanderson ni lu diidxaʼ ruso, ne sucursal stiʼ ca Testigu ni nuu Rusia bicaa: «Modo bisihuinni Grupu ni Zaniruʼ rizaalaʼdxiʼ guiráʼ congregación nuu ndaaniʼ guidxi riʼ biniibi ni ladxidóʼ ca hermanu. Zeeda gaca ni casi ora niguiidxi dxiichiʼ Grupu ni Zaniruʼ laadu».

Gucuá carta ca para quixhedxí ni ladxidóʼ ca Testigu nabeza región riʼ ne para guquidxi ni fe sticaʼ purtiʼ nabé ridinde ca políticu lugar riʼ. Guluu ni gana ca hermanu cadi chuʼcaʼ lu política ne chinándacaʼ principiu zeeda lu Biblia ra na cadi gúnicaʼ casi runi binni guidxilayú (Juan 17:16).

Nga runi, bisietenalaʼdxiʼ Grupu ni Zaniruʼ ca hermanu riʼ naquiiñeʼ guni orarcaʼ, guni estudiarcaʼ Stiidxaʼ Dios ne guiníʼ íquecaʼ ni gúʼndacaʼ ti chuʼcaʼ jma gaxha de Jiobá. Laaca guluu grupu riʼ gana laacabe gápacabe confianza ni cudii stiidxaʼ Dios lu Isaías 54:17: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ».

Ra biluxe carta que na: «Guizáʼ nadxiidu guiratu. Laganna qué huayuu dxi gusiáʼndadu laatu ne qué rusaana de guni orardu Jiobá pur laatu».

Sicaríʼ bicaa sucursal de Ucrania de ca hermanu yeganna región riʼ: «Nabé cayecheʼ ca hermanu riʼ purtiʼ bisihuinni Grupu ni Zaniruʼ pabiáʼ nadxii laacabe ne rizaalaʼdxiʼ laacabe. Ra yeganna hermanu Sanderson Rusia ca dxi bedaganna hermanu Lett Ucrania bihuinni tobi si nuu xquidxi Dios ne biiyaʼ ca hermanu riʼ pabiáʼ nadxii Jiobá ne Jesús laacaʼ. Guiradu rábidu biáʼsipeʼ ora caquiiñeʼ chuʼ tu guedaganna laadu beeda hermanu riʼ. Yanna huaxa maʼ nápadu stipa para gudxíʼludu intiica guendanagana ne cadi gusaana de gúnidu ni na Jiobá».