Ndaaniʼ guidxi México ne ndaaniʼ gaayuʼ guidxi sti’ Centroamérica nuu biaʼ 290 binni ni cayacané gaca traducir ca publicación stiʼ ca testigu stiʼ Jiobá lu jma de 60 diidxaʼ. Xiñee caquiiñeʼ gaca dxiiñaʼ riʼ yaʼ. Purtiʼ ora ruundaʼ binni ca publicación riʼ lu stiidxaʼ jma nagueenda riene cani ne rindá cani ndaaniʼ ladxidóʼ (1 Corintios 14:9).

Para ganda gaca traducir jma galán, caadxi traductor ni runi dxiiñaʼ ndaaniʼ ca oficina stiʼ ca testigu stiʼ Jiobá nuu México maʼ bibiguétacaʼ ra riníʼcabe stiidxacaʼ. Yanna maʼ nuucabe lade binni riníʼ diidxaʼ runi traducírcabe. Zacá jma nagueenda riene binni guiráʼ publicación runi traducírcabe.

Guidúʼyanu xi guníʼ chupa chonna traductor ni maʼ bibiguetaʼ ra riníʼcabe stiidxacaʼ. Sicaríʼ guníʼ Federico, ti traductor riníʼ náhuatl de Guerrero: «Biaʼ chii iza guyuaaʼ ndaaniʼ guidxi México ne biaʼ tiempu que ti familia si bidxelaʼ ni riníʼ stiidxaʼ. Peru ra nuu oficina de traducción yanna riʼ, guiráʼ binni riníʼ diidxaʼ náhuatl».

Karin, ti traductora riníʼ alemán bajo ne maʼ bibiguetaʼ Chihuahua, ti estadu stiʼ México, guníʼ: «Yanna ra maʼ nabezaʼ lade ca menonita, racané ni naa gannaʼ ximodo cuchaa diidxaʼ riʼ. Nabézadu ne rúnidu dxiiñaʼ ndaaniʼ ti guidxihuiiniʼ ne ora ribeeludu ra ventana ridúʼyadu ca binni chiguunda guiráʼ publicación cayuni traducirdu».

Sicaríʼ guníʼ Neyfi, ti traductora riníʼ maya ne yanna maʼ nabeza Mérida (México): «Ora rusíʼdidu binni de Biblia lu diidxaʼ maya, rudiʼdu cuenta xi diidxaʼ qué riénecaʼ. Nga racané laadu gánnadu ximodo guni traducirdu ca diidxaʼ riʼ jma jneza».

Ximodo huayacané ca traducción huayaca riʼ ca binni ruundaʼ cani yaʼ. Guzéʼtenu ni bizaaca Elena, ti gunaa riníʼ tlapaneco. Biaʼ cuarenta iza bidagulisaanebe ca testigu stiʼ Jiobá ni riníʼ diidxastiá guiráʼ semana. Peru qué lica ñénebe guiráʼ ni rusiidicabe raqué. Sicaríʼ guniʼbe: «Riaaʼ ca guendaridagulisaa que purtiʼ nannaʼ naquiiñeʼ chaaʼ cani». Peru dxi bizulú biindanécabe laabe Biblia ra biquiiñecabe caadxi folletu biree lu diidxaʼ tlapaneco, jma gunnaxhiibe Jiobá dede bidiibe laabe Dios ne guyuunísabe lu iza 2013. Sicaríʼ guníʼ Elena: «Rudieeʼ xquíxepeʼ Jiobá purtiʼ gucané naa guieneʼ chaahueʼ ni rusiidiʼ».