Cadi tan xadxí bidii ti organización de Inglaterra premiu Diana ti xcuidihuiiniʼ de 10 iza, láʼ Hugo, purtiʼ gucanebe xcaadxi baʼduscuela gudxiilucaʼ acoso escolar rápacaʼ.

Sicaríʼ guníʼ Hugo: «Bidiicabe naa premiu riʼ pur videu Ximodo gudxiiluluʼ tuuxa sin tíndeluʼ. Ne cani biziideʼ lu videu riʼ, ni nuu lu sitiu jw.org, gucané cani naa gudxieeluáʼ acoso escolar».

Biluíʼ si Hugo videu riʼ ca maestru stiʼ, biyúbicabe modo para chuʼ guiráʼ baʼduscuela lu sitiu de Internet stiʼ ca testigu stiʼ Jiobá. Yanna maʼ stale de ca xcompañeru Hugo, de xhono ne de chii iza, riuucaʼ lu sitiu riʼ gatigá. Laaca’ naca’ cadi racané si ni laacaʼ gudxiiluca’ acoso escolar, sínuque laaca racané ni laacaʼ gánnacaʼ stale cosa risaca ni rinabadiidxacaʼ. Casi Tuu nga ni dxandíʼ xhamíguluʼ.

Ndaaniʼ sti scuela nuu Inglaterra, laaca bidxiilú ti xcuidihuiiniʼ láʼ Elijah de xhono iza acoso escolar. Ngue runi, laabe ne binnilídxibe biiyacabe videu Ximodo gudxiiluluʼ tuuxa sin tíndeluʼ, ne despué biʼniʼ ensayarnécabe laabe ximodo guiniʼbe ne xi naquiiñeʼ gúnibe ora gucaalúcabe laabe. Ndiʼ gucané ni laabe gácabe nadxibalú para gudxiilube guendanagana que. Gudiʼdiʼ si ti tiempu, lu semana bíʼnicabe campaña para gudxiilúcabe acoso escolar, biquiiñeʼ maestru stibe videu que para guluíʼ ni guiráʼ baʼduscuela rié raqué.

Dxandíʼ, cadi Inglaterra si nga rudxiilú ca baʼduscuela guendanagana riʼ; raca ni lu guidubi naca Guidxilayú. Ne videu Ximodo gudxiiluluʼ tuuxa sin tíndeluʼ cayacané ni ca hombrehuiiniʼ ne ca dxaapahuiiniʼ de guiráʼ ladu.

Ndaaniʼ guidxi Estados Unidos, ti dxaapahuiiniʼ de 10 iza láʼ Ivie nabé bidxíbibe ti dxaapahuiiniʼ ni rinebe scuela purtiʼ rucaalú laabe. Biiyasibe videu Ximodo gudxiiluluʼ tuuxa sin tíndeluʼ, gucané ni laabe gácabe nadxibalú para gudxiilube guendanagana que. Laaca guníʼnebe maestra stibe, ne laa gucané laabe né guendanagana que. Gunabaʼ dxaapahuiiniʼ que laabe gutiidiláʼdxibe laa ne yanna jma maʼ ridxaagacabe.

Ca testigu stiʼ Jiobá racaláʼdxidu chuʼ ca hombrehuiiniʼ ne ca dxaapahuiiniʼ galán. Nga runi, qué zusaana de cueedu ca publicación riʼ para gacanedu laacabe gudxiilúcabe ca guendanagana ridxaagalúcabe guiráʼ dxi, casi acoso escolar.