Lu ca últimu iza ni maʼ gudi’di’ ca, guizáʼ stale binni de África, Oriente Medio ne de sur de Asia bixooñeluca’ de ca guidxi ri’ ne yebi’ca’ Europa. Nabé naro’ba’ stipa cayuni ca agencia estatal ne ca voluntariu para gacanecaʼ laacabe gápacabe ni gócabe, ra cuézacabe ne guni tender doctor laacabe.

Peru cadi nga si caquiiñeʼ ca binni ni bixooñelú de ca guidxi riʼ. Stale de laacabe maʼ bizaacacabe xiixa cosa nabé triste, nga runi caquiiñeʼ gatadxí ladxidóʼcabe ne gápacabe esperanza. Pur nga, ca testigu stiʼ Jiobá de Europa central cayúnica’ stipa pur gacanecaʼ laacabe. Ribeeca’ tiempu para gucaadiágaca’ laacabe ne ruundanecaʼ laacabe ca versículo stiʼ Biblia ni zanda quixhedxí ladxidóʼcabe.

Dede lu beeu agosto 2015, ca Testigu ni zeeda de ndaaniʼ jma de 300 congregación de Alemania ne Austria nabé cayacaneca’ ca binni bixooñelú de xquidxi para ganda gatadxí ladxido’ca’. Ca hermanu ca nacaʼ ni jma riuula’dxi’ ca binni bixooñelú de xquidxi ca nga gánnacaʼ ximodo ricabi Biblia ca pregunta riʼ:

• ¿Xiñee nuu stale guendananá?

• ¿Xi rizaaca binni ora gatiʼ?

• ¿Xi diidxaʼ sicarú zeeda lu Biblia?

• ¿Ñee napa Dios lá la?

• ¿Tuu nga ca testigu sti’ Jiobá?

De lu beeu agosto hasta octubre 2015, gunaba’ ca Testigu de Europa central sucursal stica’ jma de tapa tonelada de publicación ni biree lu Biblia ne bisaananécabe cani ca binni bixooñelú de xquidxi que sin ti degaayu’.

Stale de ca binni bixooñelú de xquidxi riniʼcaʼ diidxa’ si ni guleneca’. Nga runi riquiiñeʼ ca Testigu sitiu ni nuu lu Internet jw.org purti’ neni stale tema ne videu ni nuu lu gayuaa diidxaʼ. Matthias ne Petra, nácaca’ voluntariu ndaani’ guidxi Erfurt (Alemania), laacaʼ guni’ca’: «Para guiénecabe laadu nuu biaje rúnidu gestu, riquiiñedu foto o dibuju». Laaca riquiiñecabe JW Language, ti aplicación ni racané ca testigu gusiidicaʼ ca binni bixooñelú de xquidxi de Stiidxaʼ Dios lu diidxaʼ gulenecaʼ. Xcaadxi Testigu laaca riquiiñecaʼ aplicación multilingüe JW Library para gúʼndanecaʼ binni xiixa textu de lu Biblia ne para guluíʼcabe laacaʼ videu.

Ti guendaxheelaʼ ni naca Testigu de Schweinfurt (Alemania) guníʼ: «Stale binni bidxiña laadu. Lu chupa hora arondaʼ si mápeca bisaananedu ca binni ni bixooñelú de xquidxi que biaʼ 360 publicación. Nuu de laacabe dede rindetehuiinicabe íquecabe para gusihuínnicabe cudiicabe xquíxepeʼ». Wolfgang, ni naca voluntariu ndaaniʼ guidxi Diez (Alemania), guníʼ: «Guizáʼ riecheʼ ca binni ni bixooñelú de xquidxi ora chuʼ tu guizaala’dxi’ laacaʼ. Nuu tiru rinábacaʼ publicación lu gaayuʼ o xhoopaʼ idioma».

Nuu de laacaʼ nagueendaca ruzulú ruundacaʼ ca publicación stinu cásipeʼ gudii ca Testigu ni laacaʼ ne xcaadxi ribiguétacaʼ para gudiicaʼ xquíxepeʼ. Ilonca, ti gunaa ni naca Testigu ndaaniʼ guidxi Berlín (Alemania), guníʼ: «Ti dxi gucuaa chupa hombre ni nahuiinigaruʼ caadxi publicación. Biaʼ media hora despué bibiguétacaʼ necaʼ caadxi pan para gusigáʼdecaʼ laadu ne gúdxicaʼ laadu maʼ qué gáparucaʼ gastiʼ ni gudiicaʼ laadu para gusihuínnicaʼ pabiáʼ cudiicaʼ xquíxepeʼ».

Cásica ca trabajador social, zaqueca ca funcionariu ne ca vecinu nabé rusisácacaʼ dxiiñaʼ runi ca voluntariu ni naca testigu stiʼ Jiobá. Ti trabajador social ni rapa 300 binni ni bixooñelú de xquidxi, guníʼ: «¡Guizáʼ rudiʼdu xquíxepeʼ laatu purtiʼ rizaaláʼdxitu ca binni de sti guidxi!». Sti trabajador social ni nuu lu sti campu ra nabeza cani bixooñelú de xquidxi gúdxibe ca testigu galán rúnicaʼ rudiicaʼ ca binni riʼ publicación ni nuu lu idioma sticaʼ para gacané laacaʼ, «purtiʼ nagasi qué gápacabe ni gúnicabe ni runisícabe nga gócabe chonna biaje ti dxi».

Marion ne xheelabe Stefan, nabézacabe Austria, bisiénecabe chupa pulicía ni cayapa lu carretera xi pur nácacabe voluntariu. Bidii ca hombre que xquíxepeʼ laacabe ne gunábacaʼ laacabe chupa libru. Marion guníʼ: «Stale biaje riguu ca pulicía gana laadu pur dxiiñaʼ rúnidu».

Ti gunaa de Austria, ni nabé rusigaʼdeʼ cosa lu ti campu ra nuu ca binni ni bixooñelú de xquidxi bidii cuenta rié ca Testigu rigacané ca binni riʼ neca nuu tiru huaxiéʼ galán nuu tiempu. Ti dxi gúdxibe ca testigu: «Nannaʼ caquiiñeʼ ca binni riʼ cosa guibaninecaʼ, peru ni jma caquiiñecabe nga gápacabe esperanza. Ne ngapeʼ nga ni rudiitu laacabe».