Hombre ni naca encargadu de administración sti’ guidxi Rostov del Don, ti guidxi jma naro’ba’ ni nuu ladu guete’ de Rusia, bicaa ti carta ra nuu ca testigu sti’ Jiobá, 20 de mayo de 2015 que, para gudii xquíxepe’ laacabe ne gabi laacabe galán dxiiña’ bí’nicabe «ra gucanécabe lu campaña de primavera ni guca para guihuinni xquídxicabe sicarú».

Lu campaña ni biʼniʼ guidxi que, guyé ca testigu stiʼ Jiobá de tapa congregación ne bitópacaʼ guiráʼ guixi ni maʼ guricá ruaa ca calle ne guriá guiiguʼ. Lu chupa chonna si hora mápeca bichácabe biaʼ chonna gayuaa bolsa guixi ne biquiiñecabe camión para guleecabe cani de raqué.

¿Xiñee guná ca Testigu gacanecaʼ xquídxicaʼ yaʼ? Raisa, de 67 iza, cusiene: «Qué zanda diʼ quidxenáyasiaʼ. Racaladxeʼ chuʼ xquidxeʼ nayá ti cueza dede guiráʼ binni ti lugar ra chuʼcaʼ nazaaca. Gastiʼ naca pa chupa chonna si binni gunna xi bínidu. Ni rusiecheʼ naa nga purtiʼ biiyaʼ Jiobá ni». Sti Testigu láʼ Aleksander guníʼ: «Cadi para si guni predicardu nga rire’du, laaca rudiʼdu serviciu ndaaniʼ xquídxidu para gacanedu binni. Riuaaʼ nayecheʼ ne ridxátipa ladxiduáʼ ora randa racaniáʼ ca xpecinuáʼ».

Ca binni ni biʼyaʼ modo cayuni ca Testigu que dxiiñaʼ biiyacaʼ bíʼnicabe ni né stale gana. Tobi de ca vecinu que guizáʼ bidxagayaa ora gunna cadi cayaxa ca Testigu pur ni cayúnicaʼ. Ngue runi ná gacané laacabe, ne despué guníʼ: «Qué huayuu dxi guiníʼ iqueʼ pa riuu binni nayecheʼ ora rusiá ne pa runi sentir binni galán». Ne laaca guniʼbe: «Nuu de laatu cadi lica nabeza raríʼ, peru beeda gacané para guiá».

Ti funcionariu stiʼ guidxi riʼ biiyaʼ ti grupuhuiiniʼ si de Testigu bichá stale bolsa guixi. Guleebe laacaʼ ti foto né ca bolsa guixi que, ne nabe «zuluiʼbe ni xcaadxi binni ti gánnacaʼ ximodo naquiiñeʼ gaca dxiiñaʼ que».