Centro de Detención de Inmigrantes Curtin ni nuu gaxha de Derby (Australia Occidental) bidii ti diploma gaʼ testigu stiʼ Jiobá pur «dxiiñaʼ risaca» rúnicaʼ para gacanecaʼ ca inmigrante ni bigaa. Ndiʼ nga centru jma naroʼbaʼ ra rápacabe ca inmigrante ndaaniʼ guidxi riʼ. *

Guiráʼ semana riganna ca Testigu ca inmigrante riʼ para gucaadiágaca’ experiencia stícabe, quixhedxicaʼ ladxidóʼcabe ne gábicaʼ laacabe xi esperanza rudii Biblia. Christopher Riddoch, ti hombre ni ruuyaʼ ximodo chuʼ organización religiosa ne cultural ndaaniʼ centru ca, guníʼ «nagueendaca rihuinni racanécabe ca binni nuu ndaaniʼ centru riʼ ora rigánnacabe laacaʼ». Riddoch na racané ca Testigu ca binni riʼ guni sentircaʼ galán ne chuʼcaʼ jma nayecheʼ. Laabe nabe ora riganna ca Testigu ca hombre riʼ zeeda gaca ni casi ora ñábicaʼ laacabe «nuu tuuxa ni dxandíʼ rizaalaʼdxiʼ chúʼcabe galán».

Laaca bizeeteʼ Christopher Riddoch, diploma gucuaa ca Testigu riʼ cusihuinni ni cudiʼdu xquíxepeʼ laacaʼ pur «racanecaʼ ca binni rápadu ndaaniʼ centru riʼ guchaacaʼ modo nabánicaʼ». Ne guníʼrube, dxiiñaʼ nadipaʼ runi ca Testigu riʼ «rusisaca ni binnilídxicaʼ, congregación ne religión sticaʼ».