Lu iza 2014, gudixhe Grupu ni Zaniruʼ stiʼ ca testigu stiʼ Jiobá ti programa nacubi para chinécabe mensaje stiʼ Biblia ca lugar jma zitu nuu ladu guiáʼ de Europa ne Norteamérica (Hechos 1:8). Casipeʼ bizulú programa riʼ gulícabe caadxi guidxihuiiniʼ stiʼ Alaska (Estados Unidos), Laponia (Finlandia) ne Nunavut ne xcaadxi lugar stiʼ Noroeste (Canadá) para guireeche diidxaʼ.

Maʼ raca stale iza de rié ca testigu stiʼ Jiobá rigucheechecaʼ diidxaʼ ca lugar zitu riʼ. Peru cadi xadxipeʼ riaanacabe raqué ne stale biaje rusaananésicabe binni ca publicación ni rusiidiʼ de Biblia.

Ra bizulú programa cubi riʼ, ca sucursal ni ruuyaʼ dxiiñaʼ runi ca testigu stiʼ Jiobá ca lugar zitu ni riaana neza guiáʼ riʼ, bizulú biʼniʼ invitarcaʼ cani rucheeche diidxaʼ (ca precursor), para checaʼ tobi de ca lugar riʼ neca biaʼ chonna beeu. Ne pa chuʼ stale binni ni naʼ guiziidiʼ de Biblia la? zanda guiaanacabe raqué jma xadxí dede zanda gúnicabe reunión para guiráʼ binni.

Dxandíʼ, laaca ridxaagalú binni stale guendanagana ora chindeza ca lugar ni nuu ladu guiáʼ. Chupa precursor biseendacabe Barrow (Alaska), tobi de laacabe zeeda ladu gueteʼ de California ne stobi que zeeda de Georgia (Estados Unidos), guiropaʼ lugar riʼ nandáʼ. Primé nanda gudíʼdicabe Barrow, gupa xidé bi’ni’ huantárcabe 38 gradu bajo cero. Neca zaqué, chupa chonna beeu si de yendácabe lugar que mápeca yegánnacabe 95% de ca binni nabeza ndaaniʼ guidxi que ne maʼ cayuundanécabe tapa de laacaʼ Biblia. Tobi de laacabe nga ti hombrehuiiniʼ láʼ John. Laabe ne xnóviabe riquiiñecabe libru Xipeʼ ndiʼ cusiidiʼ Biblia para guni estudiárcabe Biblia ne mápeca riniʼné John ca xhamigu ne cani runiné dxiiñaʼ de cani caziidiʼ. Laaca riquiiñebe aplicación JW Library ni nápabe lu teléfono stibe para gúʼndabe folletu Guidúʼndanu Stiidxaʼ Dios guiráʼ dxi.

Cumu gastiʼ carretera para chindá binni Rankin Inlet, ti lugar riaana neza Nunavut (Canadá) la? maʼ lu avión guyé ti guendaxheelaʼ para yendacaʼ ti guidxihuiiniʼ ra nabeza ca esquimal ne bizulú biindanecaʼ stale binni de Biblia. Biiyaʼ si ti hombre videu ni láʼ Ximodo raca ca guendaridagulisaa stidu gunabadiidxaʼ padxí cuiʼ ti Yoo stiʼ Reinu nezaqué. Ne guníʼ: «Pa nuaaruaʼ nezariʼ dxi gucuícabe ni, ziaaʼ reunión».

«Guizáʼ nananda lugar riʼ ne nuu stale nieve», zacá guníʼ chupa precursor ni biseendacabe Savukoski (Finlandia), ti lugar ra nuu chii biaje jma stale reno que binni. Peru ca precursor riʼ nacaʼ biáʼsipeʼ ca dxi que nga caquiiñeʼ checaʼ raqué. Xiñee yaʼ. Laacabe guníʼcabe: «Huayuni predicardu nezariʼ biaʼ gándatiʼ, purtiʼ rutópacabe nieve lu ca carretera ni zeʼ ndaaniʼ ca guidxihuiiniʼ que ne cani zeʼ ca lugar ni riaana jma zitu ne runi chaahuicabe cani. Ne cumu nabé nananda la? jma riuu binni ra lidxi».

Nuu binni nabé ridxagayaa ora guʼyaʼ rúninu stipa pur chigusíʼdinu binni de Biblia ca lugar ni nuu zitu ni riaana neza guiáʼ. Yeganna si chupa precursor alcaldesa stiʼ ti guidxi ni nuu Alaska, gunaa riʼ bicaa caadxi diidxaʼ nabé galán lu ti red social ra caníʼ ximodo byuiʼné ca testigu laa diidxaʼ ne bidxiibabe ti foto ra cá tratadu ni láʼ Xii nga Reinu stiʼ Dios.

Ndaaniʼ guidxi Haines (Alaska), guyé xhono binni ra biʼniʼ chupa precursor ti reunión ndaaniʼ ti biblioteca ra nabé riuu binni. Lu periódicu ni riree ndaaniʼ guidxi que bieeteʼ nuu chupa hombre ni zeeda de Texas ne de Carolina del Norte ndaaniʼ guidxi que cayábicabe binni pa zuundanécabe laacaʼ Biblia ra lídxicaʼ. Ra ziluxe anunciu que ná: «Pa racaláʼdxitu gánnatu jma la? lachuu lu jw.org».