Nabé riuulaʼdxiʼ binni ti Salón de Asamblea stiʼ ca Testigu stiʼ Jiobá ni zuba galahuiʼ selva Amazonas. Riaana ni neza guiaʼ stiʼ guidxi Manaos (Brasil), lu ti layú de 52 hectárea ra nabé nagáʼ guixi ne nuu stale yaga. Ra zuba ni riʼ nuu stale maniʼ de gadxé gadxé color casi guacamayo, tucán ne xcaadxi pájaru ni ruundaʼ lu ca yaga roʼ ni láʼ nuez de Brasil, cupuaçu ne angelim pedra. Xiñee gurí ti salón de Asamblea racá yaʼ.

Biaʼ chupa millón binni nabeza Manaos, guidxi ni riaana 1,450 kilómetru de ra riaba guiiguʼ Amazonas lu nisadóʼ. Ndaaniʼ Salón de Asamblea ni nacubi gurí ca, randa ridagulisaa 7,000 Testigu de Manaos ne de xcaadxi guidxi nuu guidubi vuelta ni, laaca ridagulisaa ca Testigu de ca guidxihuiiniʼ nuu biaʼ ra rugaanda guiiguʼ Amazonas ne cani nabeza ruaa ca guiiguhuiiniʼ stini. Guidxi ni jma zitu riaana de laani nga São Gabriel da Cachoeira, nuu ni jma de 800 kilómetru ladu oeste stiʼ guidxi Manaos. Para chindá chupa chonna Testigu ra Salón de Asamblea riʼ napa xidé checaʼ lu canuá chonna gubidxa.

Nabé nagana para gurí ti Salón de Asamblea galahuiʼ selva Amazonas. Gupa xidé yenécabe 13 contenedor ra dxaʼ material ni chiguiquiiñeʼ para cuiʼ ni dede ra nuu puertu stiʼ guidxi Santos (São Paulo), guzácabe guidubi ruaa nisa hasta ra riaba guiiguʼ Amazonas lu nisadóʼ ne bidxiilúcabe guiiguʼ que dede yendácabe ra chití ni.

Maʼ né ndiʼ 27 Salón de Asamblea cuiʼ Brasil. Guca dedicar ni domingu 4 stiʼ mayo 2014 ne guyé 1,956 binni. Nabé biecheʼ stale de laacabe purtiʼ deruʼ ngue nga primé biaje bidagulisaacabe ndaaniʼ ti Salón de Asamblea.

Bicaadiaga cani guyé raqué programa que peru cadi ngue si, sínuque biiyapécabe cani bidii libana luni. Xiñee nabé galán ni guca riʼ yaʼ. Purtiʼ dxiqué raca asamblea stícabe ca lugar ra huaxiéʼ tu randa ruuyaʼ plataforma ne qué lica ruuyacabe cani cudii libana. Tobi de ca Testigu que guníʼ: «Maʼ raca stale iza rendaʼ asamblea ne qué huayuu dxi guuyaʼ drama; rucaadiáʼgasiaʼ ni». Yanna huaxa maʼ dede guiráʼ randa ruuyaʼ plataforma.