Dios glekie to yechhi len xhiʼin Abrahán, beʼlaze leke len bdeʼ nayán mandado gonke. Yechhi ní belawe Israel, gzuá lo naʼke tzeajneláchhikene Dios len gonchiʼke Xhtidze (Salmo 147:19, 20). Bene doxhén Lichhileyó wezékie sike banheza xhlen tan gleaje leke. Blaba Génesis 22:18.

Dios gleaje bene israelitas na gákake testigos kíe, ta rhene iné ktzálajke kíe. Ka goka kieke rlué tan gzénagarha mandado ki Dios waka kierha chhiʼa (Deuteronomio 4:6). Nia kieke, yezíkala bene wechhin gonbeʼke Dios li. Kuinse Jeobá gné: «Leʼn nákalhe testigos kia [...], bene wenchhin kia chi gleaja, na kan snísielhe len tzeajlele nedi» (Isaías 43:10).

Katí bene yechhi ki Israel birhe bzenágake, Jeobá botzé leke len to kueʼ bene tzeajneláchhikene len gzenágake kíe (Mateo 21:43; 23:37, 38). Tanka lo dzanandza bene rsédike ki Jeobá len rheajneláchhike Leʼ nákaka testigos kíe klega bene israelitas. Blaba Hechos 15:14, 17.

Jesús beʼlaze bene rzenágake kíe na dzajtzálajke len dzajsédiekene bene doxhén Lichhileyó (Mateo 10:7, 11; 24:14; 28:19, 20). Lo dza yélalhe ki lichhileyoni chhin ní naʼn nákaterhe taxhen kalha tinaate. Lo dza naʼn Jeobá rhotobe millónkane bene doxhén Lichhileyó na toze tzeajneláchhikene Leʼ (Revelación [Apocalipsis] 7:9, 10). Testigos ki Jeobá wezékiekene gakalenke len yospanláchhike bene bichiʼ lezaʼake tan nueke laze. Lhézekan katí rhedóbike rsédike Biblia na toze ta rsédike doxhente Lichhileyó. Lo Biblia rne: «Dogon kuenda to yitorha na xhche rhoʼ ksluerha yelarheke len gonrha chhin chhiʼa, sinka ksanrha tan yedóbirha» (Hebreos 10:24, 25).

Chi gde lheti yíza 1870 katí gzoló grhee to kue bene wesedi Biblia gzóloke bebeajniake talí ta rsedie Biblia, ta chi zeaj taxhtzá negachi. Nézekene Jesús kséle discípulos kíe dzajtzálajke, tanka gzóloke rtzálajke doxhén Lichhileyó ki Yelarnebé ki Dios. Yíza 1931 gxhiloke testigos ki Jeobá. Blaba Hechos 1:8; 2:1, 4, 11, len 5:42.

Lo siglo primero, congregaciones grhee Lichhileyó gxhike banheza tan grhee to kue bene kcheke gnerho, pero beyonbeʼke Jesús naake bene nacheʼ gnerho ki diarha congregaciones (Hechos 16:4, 5). Kanse rhaka naʼn, rhee to kue Bene Nacheke Gnerho ki Testigos ki Jeobá rzike kuenda diarha sucursales rhee doxhén Lichhileyó. Na rbhéajke len rguísike publicaciones nadee 700 didza. Bene Nacheke Gnerho rgónkene chhin Biblia na yospanláchhike len koʼke toneza nadee 110,000 congregaciones na dzaka bene chi nézekene naʼka gakalenke bekóxhilha ki Dios. Blaba 1 Pedro 5:2, 3.

Testigos ki Jeobá chi nuendolaze naʼka ktzálajto rson chhiágazi ta zaa lo Biblia len rhajsédieto bene. Rhajtzálajto rhuayo rhuayo ka bhen ka apóstoles ki Jesús (Hechos 20:20). Lhézekan rsédieto bene tabálaksi rhékiekene talí. Klega ta nuézeto laze, sino nákato to familia rheeke bichilezé len rzito banheza tan rhonchiʼ nheto Xhózito Jeobá (2 Tesalonicenses 1:3). Tan nozuato yiajlo gonto ta rheyolachhi Dios len rhakalento bichiʼ lezaʼato waka inerha nákato to familia zuáterhe yatzajyolaj lo Lichhileyoni. Ka rne lo Biblia: «Wezuárherha yatzajyolaj tan gderha kalha ta sirha» (Hechos 20:35). Blaba Salmo 33:12.