LECCIÓN 9
Naʼka wezékie bene dzake lo yoʼo suake yatzajyolaj
1. Bixhkié rhon bayochhi gonke guichi katí rtzaganake
Jeobá naake to bene yatzajyolaj, kíe zaa rson chhiágazi, na rheʼenene bene dzake lo yoʼo suake yatzajyolaj (1 Timoteo 1:11). Leʼ glekie tan rtzaganake. Tan gonke guichi katí rtzaganake waka tzotzo familia kieke, len gzénike bin kieke tzaxhen. Rhoʼ rsédirha Xhtidza Dios rhala gonrha guichi katí ktzaganarha na kan rlúerha rzenágarha ki bene rnebeke. Blaba Lucas 2:1, 4, 5.
Dios rheʼenene bene rtzaganake tolizi suake tzaxhen. Rbeze bene len nigolha gákake lilachhi to yítoke (Hebreos 13:4). Jeobá rlene ziʼ tan yelaʼke (Malaquías 2:16). Rdeʼ látaj yelaʼke o yotzaganake chen nókateslhe rdzágake bene o nigolha yobla. Blaba Mateo 19:3-6, 9.
2. Bí rhedola gon totó bene len nigolha notzaganake
Jeobá benhe bene len nigolha na gakalenke lezaʼake (Génesis 2:18). Bene bguio naka loneʼ gdeʼ ta rnaba rkin len ksédiene familia kíe ta naka ki Dios. Bene bguio wegonhe bititeze tan rhékene nigolha kíe. Lo Biblia rne: «Lhézekan, totolhe leʼn yékele nigolha kielhe kateka rhékele kuinle; lhézekan nigolha rhala gapeʼ balaʼan garheedzo bene kíe» (Efesios 5:33). Tan nákake bene dolaxhkiá rhon bayochhi yédiekene sixhenke na suake yatzajyolaj. Blaba Efesios 4:31, 32; 5:22-25, len 1 Pedro 3:7.
3. A rhala yizá bene o nigolha katí rhaka tazedi
Chen rhápake tazedi rhala gonke gazelho sékiekene ta kslueke yelarheke (1 Corintios 13:4, 5). Lo Xhtidza Dios bi bata rné kuendaki yiyochhi ta zedi rhala yezaʼke lo yoʼo. Blaba 1 Corintios 7:10-13.
4. Bido len bin xhkuidi, bí rhene Dios kielhe
Jeobá rzelachhe ka bido len bin xhkuidi suákabi yatzajyolaj. Tanka rsédiene lékabi naʼka síkabi banheza lo yelanabán kiékabi. Na rheʼenene xhozi xhnákabi kzédiekene lékabi, tan chi nézekene masrhe ka lékabi (Colosenses 3:20). Lhézekan rheʼenene suákabi yatzajyolaj nan gónkabi chhin kíe len ki Xhiʼinhe. Lo Biblia rne: «Yajné Bene Benhe lí nan ni rhonlo xhkuidi, nan bine rchhin dza zedi» (Eclesiastés 12:1). Blaba Eclesiastés 11:9, 10; Mateo 19:13-15, len 21:15, 16.
5. Bí waka gon xhozi xhna ka bin na suákabi yatzajyolaj
Rhala gdeke ta gágokabi, ga suákabi len xhákabi (1 Timoteo 5:8). Pero klega tanze. Lhézekan rkin ksédiekenebi yékiekebi Dios na gónkabi ka rhon kuenda Jeobá (Efesios 6:4). Katí leke rlúeke rhékiekene Dios, le rhegan lo yíkiaj lo laxhdoʼ bin kieke na rche lékabi gonkatebi kan. Chen ksédiekenebi ta zaa lo Xhtidza Dios wezékie koʼ lékabi pensarhe wen len kiélakabi neza chhiʼa. Blaba Deuteronomio 6:4-7 len Proverbios 22:6.
Yogoté bin rkínkebe xhozi xhnákabi kslueke rhékiekenebi len ksákake tan rhónkabi. Bala nia rkin ksíchhiekenebi len yegoʼkebi toneza. Ten gakalen lékabi na bi gónkabi ta bi naka chhiʼa (Proverbios 22:15). Pero katí yegoʼkebi to neza bi bata rhala gonke len zidiʼsnia. Lo Biblia rne: «Len xhozi xhkuidi bi gonle non ga ktzaʼ yíkiaj bin kielhe, na lékabi bi suá yéchikabi» (Colosenses 3:21).
Testigos ki Jeobá chi gleajke nayán libros ta gakalen xhozi xhna xhkuidi len bin kieke. Diarha ten zaa lo Xhtidza Dios. Blaba Salmo 19:7, 11.
