Ni du ani ni aDezire Yekova, ani namangasunge tipa ka nyakasa gaani riikporo gbiati gu nga ga gaani amurakporo. Ani nayugo irisa fu Mbori mbiko ko nga Bakusi gu mbakadapai nga ga ramukporo. (Bambata Pai 2:21-24; AEfeso 3:14, 15) Rogo Baibiri, ko nayugo bangua arengo nga gu naima undo aboro rogo zegino dũ gayo rogatise du ni nyanyakihe na i kidu na ngbarago.

 Ani namanga ome ka pekafuo agu arugute nga ga Baibiri, mbiko si nga guhe naundo rani ani du ni wene kumbakuadee, dereakumba, watadu avunguagude. (Asanza 31:10-31; AEfeso 5:22–6:4; 1 Timoteo 5:8) Gu tatamana du rogo Baibiri naundo zavura agu aboro naraka rogo gu ngbadimokporo du aboro rogoho na gayo aida ni bakiakia i du na diabese. (1 Petero 3:​1, 2) Mo bingo agi afugo du re naye be agu aboro angianga aDezire Yekova ya gayo abadiarogatise ada ni aDezire Yekova:

•   “Gaani bambata agarã sita ku rogo rogatise ahi kina be paya na gberãrago. Tingbafuo Ivete da ni Dezire Yekova, ri atona ka yugo bakere nyemuse na kidu na zerangbaduse. Agu aariapai ri amangihe aundo gaani rogatise ka paha gberẽnga ya.”​—Clauir, du Brazil yo.

•   “Mi aima ka ho kumbami nga Chansa, atona wisigo Baibiri ni na aDezire Yekova mbiko mi aberẽ gupai nga i nagbarasapa ramukporo. Naatona ti gu regbo re, mi ima ye ka bi gupai nga nirengo, Baibiri ima undo gaani rogatise.”​—Agness, du Zambia yo.

 Ho ani atungusapai ni, ani nayugo wai fu gaani amurakporo pa mangayo pai kuti gu tatamana du rogo Baibiri narengbe ka undo yo

•   I sia badiarogatise na tatamana

•   I mangipai kuti gu kpakaraapai aboro agbiatiyo na ni ti regbo bambata garã nga ga rogatise

•   I mangipai na agbio yo wenengai

•   I banda marã ngba wene gene

•   I mbu papaya

•   I wiriki wai ka mbupai dagbayo

•   I raba awiriyo

 Nirengo, ti kura aregbo si naye aye na ni. Ni kpiapai, gu wetekapai nadu rogo 1998 naye be gu basunge nga Sofres abi gupai nga dagba arogatise 20, rogatise sa dagbaha yo aima du rogo kere kpakarapai ho gu kura badia rogatise sa naangianga Dezire Yekova ya asa ti ni ka da ni Dezire Yekova.

 Yesu agumba gupai kumbatayo nga agu aboro nikaa pekafuo gako ayugopai, kura aregbo nika du kinaho i nika gbiatiyo na kpakarapai be gayo aborokporo. (Matayo 10:32-​36) Bakeke kuru apangbanga nga Will Durant ake gupai nga rogo gu Bariwara Ngbii Nga ga ARomo, “I anaakitangbanga aKristano nga i nagbarasapa aramukporo,” * na bete kura aDezire Yekova kinaho areme nagbiatiyo na kina gi kitangbangase re. Ya mo gipai re nayugo gupai tie nga aDezire Yekova naye na zanga giatise dagba aboro?

 Ho gu Bapengbanga Nga ga Putu Du Tipa agu Arengo Nga ga Aboro aasarangbanga ni nibipa gu kitangbangase nga aDezire Yekova na gbarasapa aramukporo, si ape gupai nga agu aborokporo angianga aDezire Yekova ya dedede i naaye na tagbagapai ni ka yo “ka ida kuti gupai nga agumeyo na kina rengo beyo ka sia gayo pambori na kini mangipai kuti gaha aida.” Bambu gumba-ngbanga agbia kurapai kutini nga: “Gipai re ima maapai rogo agu angbadimokporo du aboro na gayo aida rogoho ni bakiakia, na aDezire Yekova nagbiatiyo agbia a na ni.” * Zavura ho aDezire Yekova agbiatiyo ni na agu akpakarapai naye mbiko pambori, i nasota ka pekafuo gu rugute nga ga Baibiri nga: “Ka oni karaga nga gbegberẽpai fu boro ku ba gbegberẽpai wa sa ya. . . . Oni dú zezeredi na aboro dũ, kina ro tigamo ka si du wa ka mo mangi he.”​—ARomo 12:17, 18.

 ADezire Yekova nagiasangba gu ga Baibiri rugute du tipa manga rogatise “kina rogo Gbia yo,” du rogoyo nga ka manga rogatise na kina gu boro du yo na ni sa rogo idapase yo. (1 AKorindo 7:39) Mburu gi zinahe re rogo Baibiri na si ima rẽ ka mangaha rogo mangimangipai yo. Ni kpiapai, kekeapai nadu rogo 2010 rogo gu waraga nga Journal of Marriage and Family ape gupai nga “agu arogotise du rogo bangisa pambori sa” si nangera wa gayo ramukporo ima du ni bawenehe kisusi. *

 Ono tie, aDezire Yekova angarasanga agu aboro du rogo gayo pambori i kparaka na gu gayo abadiarogatise angianga aDezire Yekova ya te. Baibiri naya: “Gu wirina du na diani adu nga na idapase ya, ri ki idi ka nye na ni, ka ni mbu nga ri ya. Na gu de du na kumbari adu nga na idapase ya, ni ki idi ka nye na ri, ka ri mbu nga kumbari ya.” (1 AKorindo 7:12, 13) ADezire Yekova nagisangba gi zinahe re agia.