ADezire Yekova ima mangasunge na dungu sasa-fugo Baibiri rogo gayo wirika Baibiri. Rogo gu dungu afugo nga gu du Baibiri rogoho, ani ima du na tambuahe tipa gu Baibiri nga New World Translation of the Holy Scriptures, mbiko si namangasunge na rimo Mbori, si ni ruruhe, na si nafura ziazia.

•   Mangasunge na rimo Mbori. Dungu agu aboro sa Baibiri ima ká ka maa gu rengo si aidaha ho si aidaha ni. Ni kpiapai, gu kura sasa-fugo Baibiri sa amoi arimo aboro naima susa 70 nga aguyo nafubee sa gu sunge Baibiri re ngba kura agene. Ono kina gu bangisa Baibiri re adi rimo Bakusihe kusayo​—gu rimo nga Yekova Mbori!

   Ono tipa gu Baibiri tigaha nga New World Translation, si aima karaga rimo Mbori kubaha rogo agu akutu aba si adu rogoho ho i akehe ni ni bambataha, na ka i ainongo gu rondo namangisunge ti ni ya.

•   Si ni ruruhe. Anga abasafugo Baibiri dunduko nape gu pangbanga nga ga Baibiri ni ruruhe wai si adu mbata te. Ni kpiapai, kura sasa-fugo Baibiri sa moi Matayo 7:13 ngba gi gene re: “Oni rími rogo pangipangi ngbadimo; bambiko gu ngbadimo na gu gene nandu ku adisi yo ni kikiihe na gu gene nandu koyo ni taataha.” Ono tie, gu ndikidi fugo i amangisunge na ni angia “gbarasahe,” angianga “adisi” ya. Isoke agu abasafugo re amoi gu fugo nga “adisi” mbiko gupai nga i aidi kuti gupai nga i nika mbusa gbegberẽ aboro nyeanye kindi we yo. Ono Baibiri asongodanga gu berãpai re te. Ono gu Baibiri nga New World Translation nagumba gupai ni ruruhe nga: ‘Oni rími rogo pangipangi ngbadimo; bambiko gu ngbadimo na gu gene nangbe koyo du gbarasahe ni, si du ni kikii he.’

•   Si nafura Ziazia. Si aidanga wene sasa-fugo Baibiri du sa ni kina ruruhe te, ono si naida aida a si naafura ziazia, na kidu taata tipa ka gia rogoyo. Oni bingo kpiapai. Rogo ARomo 12:11, gu mokedi nangia Pauro amangisunge na gu fugo du rogoyo nga oni “naabuye abuye rogo toroyo.” Wa duhe nga gu fugo re arengbanga ka kusa rogoyo ziazia rogo gu pa-Ngirisi du areme te, gu Baibiri nga New World Translation amoi gu veresi re ngba gu gene duhe taata tipa ka gia rogoyo. Si nape gupai nga, si naida aKristano ‘dú kakaka rogo toro yo.’

 Kurii gupai nga gu Baibiri nga New World Translation namangasunge na rimo Mbori, si ni ruruhe, na si nafura ziazia, gu kura kparakparapai kinaho berewe tini: I nafuhe fu aboro gbua zanga dia marã beyo. Ni sangbanaha, amirioni aboro ima du na rengba ka geda Baibiri rogo fugoyo yo​—zavura agu aboro naadunga na rengba tipa ka gbia gayo Baibiri ya.