Ani namangasunge na agamahe si songodi agu asunge ani amangaha na si undo gu sunge fu undo nga ga gaani riigbu. Ani namanga agi asunge re ni papara gaani bangua sasa, du nga ka undo aboro i da ni ga Yesu Kristo abawiriki.—Matayo 28:19, 20.

 Ani amanganga sunge na gaani agamahe tipa ka kumukosi ai boro te. Ani atumongo gaani abaakumba watadu gaani abatungusipai te, na i atumongo aDezire Yekova tipa i ni ta kporo na kporo te. Agu aboro namangasunge rogo gaani abe-basunge watadu rogo gaani rii-basunge kodihe na agu aboro du rogo Riigbu Bipasunge, nga agu aboro riigbu pambori aziongo marã ya.

•   Kusa Awaraga: Ani nasa aBaibiri, kini gbingbidaha, kini kedihe ku rogo aba, na kini kparaka amirioni aBaibiri gbiati gu kura awaraga nga ga aKristano rogo agarã ni basasa, na boro ho natumo tipa ka gbia agi awaraga re te. Wakina gure a, gu gaani bangiriba nga ga Internet nga jw.org gbiati JW Library app nasa gu gaani awaraga du rogo Internet si du taata aboro gbiaha zanga tumo tipaha na ani amanganga takapande tipaha a te.

•   Sunge Meka Arago gbiati Ngerafuoho: Ani nameka taata aba-irisombori na kini ngerafuoho rogo zegino dunduko tipa si sa gaani adungurati sidu na wene ba tipa aboro naadunguratiyo ku rogoho kaa tambua Mbori. Ani namanga kina gu bangisa pai re a tipa gaani abe-basunge gbiati gaani aba safugo. Dungu agu aboro namanga agi asunge re nga agu abaundosunge nafutiyo ka undo, si kini sa gupai nga me Bambu Kindo watadu ngerafuoho, ka si dinga bakere marã ya.

•   Ngerakurii Pasunge: Agu asunge namanga rogo gaani rii-basunge, abe-basunge, na rogo gaani aba safugo, kodihe na agu asunge agu ababiapai nata ata amangaha, agu agamahe aboro afuhe si undo gu gaani sunge namanga rogo zegino dunduko du nasongodaha.

•   Tungusapai: I atumongo aDezire Yekova tipa tungusa wene pangbanga watadu tipa yugo “ga Mbori pai” te. (2 AKorindo 2:17) Ono tie, wakina gupai nadu tipa agu aKristano nadu rogo bambata sakama agarã, gu siasia abamangisunge nga aguyo i naima rabayo nga aguyo kpara gayo bakere regbo tipa ka manga agu asunge nasongoda sunge tungusapai, i naaundo yo aundo na wiri bete marã i tumo bambu na ni na si undoyo i gbia gu wiri bete ahe du na nyanyakipaha rogo raka yo.—AFiripoio 4:16, 17; 1 Timoteo 5:17, 18.

•   Yugopai: Agu agamahe aboro afuhe du nasongoda gu mbakadapai nga ga bakere adunguratise nga ga uru sa na gu nga ga auru biata. Kurii gure, ani nakusa gu mbakadapai nga ga dede afugo na avidio du mburuhe rii Baibiri. Ani namanga asukuru amanga a du tipa ka raba abaakumba gbiati agu abamangisunge futiyo kaa mangasunge Kindo ti regbo dũ tipa i du wenengai tingba gayo asunge.

•   Sunge Fu Undo ti Regbo Gberãngo: Ani ninaafu riahe, ime, gbiati ka mbakada ga agu aboro abambu paha nagberẽ mbiko gu gberãngo naye be gu mangapai nga ga ome zegino, watadu gu naye be aboro. Agi asunge fu undo re aundongo kina “agu yo gbe du ku idapase yo” na ani te, ono si naundo agu aboro aundo angianga aDezire Yekova ya.—AGaratio 6:10.