Mo rengbe ka wirikapai tipa Yekova ni geda mo Baibiri. Bakuru kusayo, Mbori asia gu kura aboro tipa i keke gako aberã. I nayamba gu kekeapai re nga Baibiri. Areme, ani nawirikapai tipa Mbori ni geda ani Baibiri. Bambiko Baibiri na fugo Yekova rogoho, watadu gako atingidapai, i nayambaha a nga Fugo Mbori. Ani rengbe ka ida kuti gupai Baibiri agumbaha bambiko Yekova naapenga ziree te. ‘Mbori arengba nga nagumba ziree’ te. (AEbere 6:18) Fugo Mbori na rengo rogoyo.​—Yoane 17:17.

Baibiri du dagba gu kikiipa agamahe Mbori nafuhe furani. Si wa kina gu waraga naye be gu baagude du na nyemuse tipa awirini. Si nafura fu rani tipa ga Mbori mokido ka aria kpotosende ku rogo gu bawene rago nga gu ani kaa raka rogoho, nga paradizo. Si nagumba agu apai furani ko amangihe mbata kusayo, gupai ko amangaha awere, na gupai ko ka mangaha kumbatayo tipa ruru awiriko. Si naundo rani ani nyasi na gaani fudifudiapai na ki gbia ngbarago.​—2 Timoteo 3:​16, 17.

 ADezire Yekova nga abakurea Mbori; i aundo ro mo girogo gupai yo Baibiri ayugoho. Mo gumba kina gupai fuyo gbua nga mo naida ka wirika Baibiri. I adianga marã tipa manga gere te. (Matayo 10:8) Kurii gure, mo rengbe arengba ka du pati agu adunguratise nga ga aKristano i naamangaha. I namanga gere rogo agu aba nga ga irisombori i ayambaha nga Bambu Kindo. Ka mo aadu pati agi adunguratise nga ga aKristano re, gamo inohe tipa Mbori asona ni kina boro ipo.

Mo rengbe ka wirikapai tipa Mbori ti agu ahe ko amangihe. Ni kpiapai, Baibiri naya: “Mbori afu ngbangbaturũ na kpotosende.” (Bambata Pai 1:1) Ho Yekova akusi “ngbangbaturũ” ni, ko amangi uru. Awere, ginipai gure ayugoho fu rani tipa Mbori? Si nayugo gupai fu rani nga Yekova na bakere ome. Kina ko sa narengbe ka manga gu he du na bakere ome wa gu nga uru. Si nagumba gupai fu rani a nga, Yekova nga iratatamana, mbiko si aidi tatamana ka manga uru, nga gu nafu faarago na timarago na nga gu agbingo ki riti kusayo ya.

Agu ahe Yekova akusihe nayugo gupai nga ko nakpinyemu rani. Mo berẽnga pa gu ngbatunga arindingua ni bakiakia duho auru kpotosende. Yekova arengbe arengba ka fu ngbatunga rindi ngua fu rani gbua kina sa​—watadu ki zanga fuhe a. Kuba gure, Yekova afu ngbatunga arindi ngua fu rani ni dunguhe, na badungu arikoho, bakindigoho, arangihe, na banziraha ni bakiakia. Gere nayugo gupai nga anga Yekova ni gu Mbori gbua du na kina nyemuse sa te, ono ko ni boro gamahe na ni gu boro naberã pa aboro aberã na ki du na weneringise.​—Atambuahe 104:24.