Yekova aidanga ha fu gbigbita aboro i gbarasi Paradizo te. Kina abakureako sa nika raka yo. Ginipai nika manga gbigbita aboro? Tipa ka ino karagapai, ani wisigingo gu ndikidi pangbanga nga ga Noa. Dungu kutu agarã susi kusayo wa Noa araki. Ko angia wene kumba nga guko nanaˈasada tiko nyanyakii ka manga gupai ngba ti Yekova. Ono gu kura aboro tigayo naadu auru kpotosende anaamanga gbegberẽ apai. Sidu, Yekova aya fu Noa Ko nika ye na ime akangbii tipa ka gbarasa gbigbita aboro dunduko auru kpotosende. Ko agumba gupai fu Noa nga ko mbakadi kurungba tipa ka ko akpinga na gako aborokporo ho Ime Akangbii ka ye ni ya.​—Bambata Pai 6:​9-18.

Noa na gako aborokporo ambakadi kurungba. Noa anaaza aboro ya Ime Akangbii naye, ono i adeganga tuyo kuti ko te. I aamanga gbegberẽ apai kindi. Fuo nyasa mbakada kurungba, Noa arogodi anya ku kurungba yo, sidu ko na gako aborokporo ki rimi a ku vuruhe yo. Fuo gure, Yekova ki sa bakere bavugumo mai si ye. Gu mai re ana tipa aˈuru 40 na ayuru 40.  Ngirimo ahiisi rago auru kpotosende dunduko.​—Bambata Pai 7:7-12.

Gbigbita aboro akpiki, ono Noa na gako aborokporo ki bati. Yekova abatasi yo be Ime Akangbii ku rogo gu kpotosende naadunga na gbegberẽ aboro berewe ya. (Bambata Pai 7:​22, 23) Baibiri nagumba gupai nga regbo naye berewe a nga gu Yekova nika gbarasa agu aboro rogo naka pa manga gupai duni ruruhe. I agbarasanga wene aboro te. I araka nyeanye kindi rogo Paradizo auru kpotosende.​—2 Petero 2:​5, 6, 9.

Dungu aboro namanga gbegberẽ apai areme. Zegino hi be fudifudiapai. Yekova nakeda gako aDezire berewe na berewe i za aboro, si ki vura du wo, badungu aboro aidanga ka degatuyo kuti fugo Yekova te. I aidanga ka ariatiyo ti gayo agene te. I akpingo nyemu ka ida gupai Mbori aya si ni ruruhe na ni irairaha te. Ginipai nika manga agi aboro re? I aˈariatiyo rogo kura uru? Dunguyo aˈarianga tiyo te. Regbo naye nga gu i ka gbarasa gbigbita aboro rogo na ka i arakanga berewe ya.​—Atambuahe 92:7.

I agbarasanga kpotosende te; i asaha ni paradizo. Agu aboro nika duni abakurea Mbori araka nyeanye kindi rogo Paradizo auru kpotosende.​—Atambuahe 37:29.