Mbori naida mo duni bakureako. Mo aberẽnga gupai nga mo rengbe ka duni bakurea gu Boro kiipani kisusi rogo zegino dunduko? I anayamba Abarayama, nga guko naraki bakuru kusayo, nga bakurea Mbori. (Yakoba 2:23) Gu kura aboro nga aguyo fura yo tipa yo Baibiri yo adu na ngbarago a be ga Mbori pabakure na ko afu maku fuyo ni bakerehe. Areme, aboro kinaho rogo apapara kpotosende dunduko da ni abakurea Mbori. Mo rengbe arengba ka du a ni bakurea Mbori.

Duni bakurea Mbori ngba kisusi duni bakurea boro. Mbori asanga gberãrago ti ruru abakureako te. (Atambuahe 18:25) Duni bakurea Mbori ngba kisusi ti du na aũkumuko. Ho kumukokumuko boro akpi ni, gani marã nandu fu kura aboro. Ono tie, aguyo nagbia ngbarago be pabakure na Mbori, i na gu ũkumuko beyo ka boro arengbanga ka diaha kusayo ya.​—Matayo 6:19.

Gu kura aboro rengbe ka asada gupai nga ka rugusa ro ti wirikapai tipa Mbori. Zavura bete abakureamo na gamo aborokporo rengbe arengba ka manga gere. (Matayo 10:​36, 37) Kangia kura aboro namama ro watadu ki nigundesi ro, mo sananga tiro ya, ‘Da mi aida ka sa ngbarago ti ni​—aboro watadu Mbori?’ Mo berẽnga gipai re: Ka boro ya foro ka mo ringa riahe ya, mo rengbe ka gia sangbani? Wagusa te! Mo naida riahe tipa ka raka. Ono Mbori rengbe ka sa ro mo raki nyeanye kindi! Sidu, ka mo idinga ha fu boro ni rugusi ro ti wirikapa wai rengbe mo ka duni bakurea Mbori ya.​—Yoane 17:3.