Satana na gako gbigbita atoro aidanga mo ndusunge Mbori te. I naida ka nyaga aboro kusayo dunduko ti Mbori ka i rengbe ka mangaha wo. Waigu i aˈasada ka manga gere? Gene sa nga rogo ziree pambori. (2 AKorindo 11:13-15) Ziree pambori nga gu ayugonga gu rengo du rogo Baibiri yo ya. Ziree pambori wa kina gu marã angianga ndikidi marã ya​—si rengbe ka ngera wa kina ndikidihe, ono sunge ti ni te. Si rengbe ka ye na fuda foro gbe.

Gu ziree nga ga pambori arengbanga wagusa ka sa ngbarago ti Yekova, nga irarengo Mbori te. Ho Yesu adu ni auru kpotosende, badona aboro pambori aduho nga aguyo naaida ka imoko. I aberẽ gupai nga gayo gene iriso angia ruru gene. I aya: “Barani sa nga kina Mbori.” Yesu aidi gupai re? Oó! Ko aya fuyo: “Awiri Bakitingbanga nga oni.” (Yoane 8:41, 44) Areme, dungu aboro naberã gupai nga i nairiso Mbori, ono i nairiso kina boro Satana nzunzu na gako gbigbita atoro!​—1 AKorindo 10:20.

 A wa gbegberẽ ngua naazuka gbegberẽ rinde, ziree pambori nakusa agu aboro namanga gbegberẽ apai. Zegino hi be fudifudiapai mbiko gu gbegberẽ apai nga gu aboro amangaha. Wasiwasi mangapai gudu ho, kpata, dĩ, rungosi aboro, imo aboro, na kodaba ngbaome. Dungu agu aboro namanga agi apai re na kina pambori beyo, ono gayo pambori afõnga ngbaduyo yo i mangi gupai duni wenehe te. I arengbanga ka duni abakurea Mbori te, kinagu ka i mbu manga gbegberẽ apai.​—Matayo 7:​17, 18.

Ziree pambori nayugopai fu aboro i kpari fu akpiahe. Mbori naya ka ani kparingo fu kpiahe ya. Ru gere aru. Si rengbe ka ngba tiro ka boro afuranga foro wagusa ya ono kini fura fu kina kpia ro? Gu boro re rengbe ka duni ndikidi bakureamo? Oó, ni arengbanga ka du te. Yekova naida aboro fura fuko, angianga fu sese kpiahe ya, nga gu adunga na unga ya.​—Gate 20:4, 5.

Ziree pambori nayugo gupai nga si ni kina ruruhe ka imo aboro ti regbo vura. Yesu agumba gupai nga abakurea Mbori adu na nyemuse dagba tiyo. Ani aimonga agu aboro ani akpinyemu yo te. (Yoane 13:35) Zavura gbegberẽ aboro, si ni gbegberẽpai a fu rani ka imo yo. Ho avura Yesu aye ka zio ko ni, ko aidanga ha fu gako abawiriki i sovura tipa ka banda ko te.​—Matayo 26:51, 52.

Ziree pambori nayugo gupai nga gbigbita aboro arungo rogo we-iferno. Ono Baibiri nayugo gupai nga ingapai nandu sa kpio. (ARomo 6:23) Yekova nga Mbori nyemuse. Gu Mbori nga ga nyemuse ko rengbe ka rungosi aboro nyeanye kindi? Wagusa te! Paradizo yo, pambori adu yo gbua kina sa, nga gu Yekova naidi na ni. (Yugoti 15:4) Agu apambori dunduko nga gu du mburuhe rii ga Satana aziree ago kusayo.