Gu gbegberẽ apai namanga awere auru kpotosende nayugo gupai nga Paradizo mbembedii. Baibiri agumba gupai nga ani abi kere aregbo abi ngbutuko mbata fu Paradizo da. Ani naraka awere ti gu regbo re! Bete apai gere nga gu Baibiri aya si amanga:

Kikindigi avura. “Rika aboro azínga kuti gu rika aboro, ngbi ki zingi kuti gu ngbi.” (Matayo 24:7) Gi sangbanebi re ima da ti rengo. Natona rogo gu garã nangia 1914, avura aduho ue nga ga zegino, na dungu rukutu avura duho kindi. Badungu amirioni aboro kpiki rogo agi avura re.

Akaza rogo arago dunduko. Si adu nga “riri akaza adu rogo arago.” (Ruka 21:11, NW ) Gere mangi nirengo? Ii. Agu akaza nga kaza bagunda, dingo, mararia, SIDA, na gu kura akaza naimo badungu aboro kisusi.

Zingo riahe. aˈuru kpotosende dunduko, aboro kinaho adunga na riahe beyo rengbe tipa i rihe ya. Badungu aboro kisusi nakpiko na agarã dũ be gomoro. Gere nga kurapai ani aino gupai ti ni nga Paradizo ima mbeda. Baibiri naya: “Angbongi nikadu.”​—Marako 13:8.

 Abazigizo. “Abazigizo [adu] rogo agu arago.” (Matayo 24:7) Gere ima manga a nirengo ti gaani regbo. Aboro susi mirioni sa kpiki be abazigizo natona rogo 1914.

Gbigbita aboro. Si adu nga aboro aduni “airakpinyemumarã” na ni “akpi kina nyemu tiyo.” I adu a ni ‘akpí nyemu sangba borose susi nyemu Mbori.’ Agude “abasasangba avunguyo.” (2 Timoteo 3:1-5) Ati mo ima ida gupai nga dungu aboro kinaho wa gure areme? I na irisa tipa Mbori te, na i naye na fudifudipai fu agu aboro naˈasada ka wirikapai tipa Mbori.

Ingapai. Si adu nga “ingapai amaa pai amaa.” (Matayo 24:12) Nirengo, mo aida gupai aida nga ingapai ima maapai kisusi gu naadu mbata fu bete agarã kusayo. Rogo arago dunduko, aboro ngbapai be gupai nga ga gburii gayo ahe, birika yo, watadu imisa yo.

Agi apai dunduko re nayugo gupai nga ga Mbori Kindo mbembedii. Baibiri naya: “Ho oni ka bi agi apai ni re si [na]da, oni ini he ya ga Mbori ngbi mbedi.” (Ruka 21:31) Ga Mbori Ngbi nga gine? Si nga ga Mbori zogarago nga ga ngbangbaturũ nga gu nika ye na Paradizo ku auru kpotosende. Ga Mbori Ngbi adiaba ga aboro azogarago.​—Daniere 2:44.