SABA SANAHE
Ginipai ka Mi Mangihe ka I Asosoda Re Tipa Kodaba?
GINIPAI KA MO MANGIHE?
Mo berẽnga kurii gi kpiapai re: Ngbarago ini Mika awere tipa adiwi gbua ue, ono ri naberãha nga ri ima inoko wenengai. I nadia dungu asa kaa keka apai dagbatiyo rogo terefuni na kini fura ni gbangaha, guni ima rengba ka tona fugo guni ki digisihe! Ono Mika naida gu kurapai aida angianga kina fugo gbua ya.
Rogo agu adiwi susi kusayo ue re, aMika na Ngbarago amanganga kurapai susi gu nga ka zio beyo kini nyoro ngbayo ni wiri guruhe te. Ngbarago aidanga ka manga kurapai susi gure te. Ono ri aidanga a ka zanga Mika te. Boro ho nafu ngbarago furi na kini tambua ri wa Mika te. Ri naya fu tiri wẽ: ‘Ani na Mika rogo nyemuse.’
Ka si du nga mo ima rẽ tipa ka tona mbakadapa rogatise na mo kidu rogo ga Ngbarago bangiriba, ginipai ka mo mangihe fuo gure?
MO RUNGA KA BERÃ!
Kodaba nga gamahe be Mbori fu kina arogotise sa. Kodaba mbata fu rogatise nga gberesa pa gu gamahe re. Si wa ka mo di gu bawene roko boro nafuhe foro kaa giriso kina ahe na ni
Ka mo ru ngua yo kini idi ka gu wa zire, mo gbia tiro agbia na gbegberẽ sangbanaha. Kina gu bangisapai re rengbe ka manga ka mo ká ka mangapai kuti agu andiko du tipa mangaapai, wa gu naya: “Oni ne pa bari.”—1 ATesaroniko 4:3.
Gini gbegberẽ sangbanapai du ti basa gu rugute re? Baibiri naya: “Gu ni namanga pa bari ni nainga pai kuti boroni.” (1 AKorindo 6:18) Wai duhe ni rengo?
Abawetekeapai bi gupai nga, gu paranga aboro nakodiba mbata fu rogatise, i ima gbiatiyo na apai dagba agi du kusende re.
-
IMISIRI. Badungu gu paranga aboro nakodiba mbata fu rogatise aima biratiyo tingbafuoho.
-
ZANGA KIDO. Fuo kodayo ba, i dunduko ima rengba kaa bakabangiriyo nga, ‘Da berewe ko watadu ri nakodiba na ní?’
-
GBERÃRAGO. Badungu adegude ninaaida gu boro nika bandayo, angianga kaa ngimbaro gbua na yo ya. Badungu aparanga aidanga gbe na agu adegude naida fu kumba ni kina ipo te.
-
Banyanyakipa pai: Ka mo kodiba mbata fu rogatise, gure nga mo nagberesa pa nyanyakipa he. (ARomo 1:24) Kpotoro nga gu nyanyakipa he si aidanga mo gberesi paha ya!
Mo yuguhe nga ome kina tiro ka “ne pa bari.” (1 ATesaroniko 4:3) Gu uru mo nika manga rogatise, mo nika kodaba akoda. Na mo ki rengbe ka gbia ngbarago ti ni ni bakerehe, zanga bakabangirise, biratise, gbiati gu zanga kido ninaaye fuo kodaba mbata fu rogatise.—Asanza 7:22, 23; 1 AKorindo 7:3.
GA BERÃPAI NGA GINE?
-
Ya mo gu boro nakpinyemu ro nzunzu rengbe ka sosoda ro mo mangi gupai rengbe ka fuda ro ni kerehe kumbatayo?
-
Ya mo gu boro naberã paro nzunzu rengbe ka saro mo gbarasipa gamo bakure na Mbori?—AEbere 13:4.
