Mo berẽnga kurii gi kpiapai re: Kubako nangi kuro na akurako ko kini de ru u kini kuo subaki nga ga gayo murakporo.

Ka mo ngia Kubako, ginipai ka mo mangihe?

GINIPAI KA MO MANGIHE DAGBA AGI DU BIATA RE?

1. Ka ora.

2. Ka turã gupai re kurii kura boro.

3. Ka pe gupai nimangi fu gu murakporo re, na ki ya mo ima ida ka tumo i mbakadihe.

Si rengbe kadu taata foro ka ora. Ono wene nduapai kinaho si aida mo naaida gamo aingahe ti ni, singia si nabipa kuo subaki watadu kurapai.

1. Si nga gu rurupai si aida mo mangihe.

   Baibiri naya: ‘Ani nakpinyemu ka sungo na rurupai rogo apai dunduko.’—AEbere 13:18.

2. Si nidu taata fu aboro i mbupai fu agu aboro naida gayo aingahe.

   Baibiri naya: “Gu boro naoka gani tiandika ni aú nga te, ono gu ni nakusa ha ki nimbu he, ni abí inapai.”—Asanza 28:13.

3. Gu nyakipaha tie gbe nga, si nasa ngbarago ti Mbori.

   Baibiri naya: “Du rengo kpotoboro yo ngba ha angba ti ro [Yekova].”—Atambuahe 51:6

Karina du garãri 20 aidi ka igo gu waraga aborisi afuhe furi ho i aziri ni mbiko kere oto bangirigene na tarambiri, nga gu waraga si aaidanga ri sipihe a ya. Ono ri aarengbanga ka okaha ti bari nyeanye kindi te. Karina aya: “Fuo susa agarã bawe, buba abi gu waraga re na rimore ti ni. Si aima bare ku rogo kerepai!”

Ginipai Karina awirikihe ti gipai re? Fugori nga: “Oka mo gamo aingahe nasa apai si gberẽ kina kumbatayo. Mo atumo atumo tipaha kusa!”

Baibiri naya: “Ani nakota dunduko rogo dungu apai.” (Yakoba 3:2) Awa ani nabihe, i naino pa umbasitise gbiati nyaka ho mo aida gamo aingahe ni ti kina gu regbo re.

Kurapai si aidaha nga ka wirikapai ti gamo aingahe. Degude nga Vera aya: “Mi naasada ti aregbo dunduko ka wirikapai ti gimi aingahe na ki saha si undo re mi du ni wene boro na ki ini wai ka mangapai kia ka pai mangi wo berewe.” Ani bingo wai rengbe mo ka manga gipai re.

Mo di ga bamo ngbagida kini gbirisi ru. Ginipai ka mo mangihe fuo gure?

• Ka onga aonga kini berẽ gupai nga bamo ainongo ho te?

• Mo gumba kina boro gupai nimangi fu bamo?

• Ka pe gupai nimangi ono kini bira kura boro?

Mo ti asada sukuru yo mbiko gupai nga mo aagedanga pai te. Ginipai ka mo mangihe fuo gure?

• Ka bira gu asada re?

• Ka ida gamo ingahe?

• Ka gumba gupai nga bayugupai na pai kuti ro?

 Awere tie, mo bingo gu kpiapai re na ki asadingo ka berã gupai nga mo nga bamo watadu gamo bayugupai. Ginipai rengbe bamo gbiati gamo bayugupai ka berãha tipa ro ka mo idi gamo aingahe? Ginipai ka i berẽhe tipa ro ka mo okõ gamo aingahe?

Awere tie, mo berẽnga pa ingahe sa mo amangihe rogo gu garã nasusi na ki karaganga pai sa agi asanahe re.

Gi ingahe angia gine? Wai du mi amangipai kuti gu ingahe re?

• Mi aokõho.

• Mi abira kura boro tipaha.

• Mi aidihe.

Ka singia mo aaidanga gamo ingahe te, mo adu wai ti ngbafuo ho?

• Mi adu wenengai.

• Mi adu ni fudifudi re mbiko mi ape ziree.

Wai ka mo amangipai sa gupai re ngba wene gene?

Ginipai wiriki mo ho ti gamo ingahe?

Tipagine kura aboro naaidanga ka ida gayo aingahe ti ni ya?

Ginipai aboro nikaa berãha tipa ro ka mo aˈasada ti aregbo dũ ka dada gamo aingahe, ono ginipai i nikaa berãha tipa ro ka mo aida gamo aingahe?—Ruka 16:10.