Mo berẽnga kurii gi kpiapai re: Rago biata nyemu, Wilson du garãko 17 ima nyasa na agu asunge ko naamangaha kporo ho ko kini idi ka ongoda! Ko zaki terevizioni ki pi ku rogo gako basungo.

Ti kina gu regbo re, bako kuru ngbadimo yo na gberãrago.

“Wilson! Tipagine mo agbirisa regbo ti ni kaa bi kina terevizioni baraho ka mo naaundo tamero ni tigu sunge i ni fuhe fuko sukuru yo? Mo amanganga gupai i agumbaha foro te!”

Wilson nakpakanahe na fugoko kuari niya: “Kina gipai re berewe.”

Bako nugo kumbatayo ki ya: “Ya mo wai paranga?”

Wilson uka omeko ki aria bangiriko ki ya: “Pai ho mi nagumbaha te uba.”

Bako ima zinga ni kerehe, ki ya fuko na zinga wẽ: “Ka mo ya furanga fere berewe na gu woro fugoro re ya.”

Ka si nidu nga mo du nga Wilson, ginipai ka mo nimangihe tipa ka gi zangagiatise re kurunga ya?

Fura na avunguro wakina ora na tarambiri. Ka he wagi bangirigene, mo ima rengba ka gbata kura gene.

 NI KPIAPAI:

Degude du rimori nga Rea aya: “Si fere ni kpakarakpakaraha mi nifura wenengai na buba. Ti kura regbo, mi nafura afura ni wiri gbangaha mbata ko kini ru ka ya, ‘Ha, mo naafura afura na mi?’”

GINIPAI SI AIDA REA MANGIHE DAGBA AGERE?

1. Ri ta ngbari kurii bari.

   Rea ta ngbari ki ya, “Buba gipai re nga nyanyakipa pai! Mo degenga turo!”

2. Ri mbu fura na bari.

   Rea mbu fugo na bari tipa gari akpakarapai.

3. Ri pidi wene regbo tipa ka fura na bari berewe tipa gupai re.

   Rea ndu fuo bari ka fura na ko, watadu ka ke waraga fuko tipa gari kpakarapai.

Ginipai rengbe mo ka idapaha fu Rea dagba agere?

MO MAKIANGA GIPAI RE: Berã ba Rea rengbe kadu kubani tipa gu sunge ko amangaha ka ko ainongo pa gu gberãrago du ri na ni ya. Ka Rea ta ngbari kurii bari, ko iningo gupai ri ata ngbari ti ni te. Si sanga ko ko degetuko wenengai furi te, na si yugungo iriso a te. (AEfeso 6:2) Nirengo, si undongo yo ue dunduko te.

Ka Rea diberã ka mbu fura na bari, si ima rengba ka du ni taataha ono si dunga ni patatamana te. Tipagine? Bambiko tipa Rea mangipai sa gu kpakarapai du ri na ni, si naida aida ri fura na bari tipaha. Na tipa bari undo ri, ko duwa ka ko ini gupai namanga ri. Ono ka ri ongo aonga, gipai re mangingo te.

Si aidanga Rea mbu gi kpakarapai re si ká na ri ti fugo dagbari na bari te. Kuba gure, si naida ri asadi ka fura na bari berewe ti kura regbo. Na ka Rea sia ka ke waraga fu bari kuba gu nga ka nduandu fuoko i fura, si rengbe arengba a ka undo ri ti gu regbo re.

Ke waraga ima rengba ka undo ri tipa ri gumba kina boro gupai nzunzu ri aida ka gumbaha fuko. Ho ba Rea nika geda gu waraga re ni, si nika undoko ko ini gupai ri aida ka gumbaha fuko na ki undoko ko ini gari kpakarapai. Ka Rea fura na bari ti kura regbo watadu ka ke waraga fuko, gure rengbe ka undo ri gbiati bari a. Gere rengbe ka sa yo i pekefuo gu rugute du rogo Baibiri tipa ‘peka kina agu apai du tipa manga zereda.’—ARomo 14:19.

Gini kura apai berewe Rea narengbe ka mangaha?

Mo berẽnga pa gu sa, na ki kehe rogo gi ba du kusende re. Fuoho, mo ki ke gupai rengbe kadu ni sangbanaha.

Mo tingidi gupai nga gupai mo agumbaha na gupai avunguro aberãha nga si mo agumbaha naadunga kina sa te.

NI KPIAPAI:

Avunguro sanaro nga tipagine du mo tini na gberãrago. Mo ki gumba gupai fuyo nga, “Mi aidanga ka fura tipaha awere te.”

Ono avunguro girogoyo nga: “Mi akidongo kuti roni ka pe gi gbugbupai furoni te. Mi nika gumbaha agumba fu abakureami angianga oni ya.”

Mo berẽnga gupai nga mo gbiatiro na kpakarapai na avunguro ki idi ka undoro. Ono mo ki ya: “Ka oni bakingo bangironi ya. Mi ima rengba ka mangapai sani nisare.”

• Avunguro ima rengba ka giaha nga?

• Wene karagapai nga?