RIBUA SANAHE
Ya Mo Si Naida Mi Idi Kuti Gupai Nga Ahe Akuru Nisaha?
GINIPAI KA MO MANGIHE?
Mo berẽnga kurii gi kpiapai re: Alex ima ida kuti Mbori na ko ima ida kuti gupai nga Mbori nakusi ahe. Ono areme, gako bayugu sayanisi nyakasi gupai nga kina boro rengo du nga ahe akuru nisaha, na mburuhe rii gu wetekaapai nga ga aboro birĩ-inohe. Alex aidanga aboro biko nga iramungo te. Ko ya futiko wẽ, ‘Ka si du nga aboro birĩ-inohe ima ida kuti gupai nga ahe akuru nisaha, da nga mi rengbe ka ti kango na yo?’
Ka mo ngia Alex, ya mo mo idi kuti gupai nga ahe akuru nisaha mbiko gupai gbua nga buku nagumbaha wo?
MO RUNGA KA BERÃ!
Dungu aboro naida kuti agu apai i ainongo ndu gupai zaatu i aida ti ni kutini ya.
-
Kura aboro idi kuti gupai nga Mbori nakusi ahe mbiko gupai gbua nga si nga gupai i ayuguhe fuyo kanisa yo.
-
Kura aboro idi kuti gupai nga ahe akuru nisaha mbiko gupai gbua nga si i ayuguhe fuyo sukuru yo.
ASANAHE SITA SI AIDA ANI WISIGIHE
Baibiri naya: “Abambu dunduko aboro du nadua ha; ono gu ko nadua ahe dunduko nga Mbori.” (AEbere 3:4) Ya mo gupai re ruaru tipa aboro idi kutini?
Ka mo gumba gupai nga raka akuru nisaha, si kina sa wa ka mo bi bambu mo kini ya wẽ boro ho naduaha te
GUPAI ABORO APEHE: Agu ahe du rogo zegino dunduko akuru mbiko bakere he nasu kini kusihe.
1. Da watadu gine nasa he si su, na guhe nasu re aye wari?
2. Ginigu ru bangiro, ahe akuru nisaha watadu boro kinaho nakusihe?
GUPAI ABORO APEHE: Aboro aenge ti anya.
3. Ka singia aboro aenge ti anya, wa abawamu, tipagine du bakere kparakparapai ti ni dagba gu inohe du aboro na ni na gu nga ga abawamu?
4. Ka si du nga ahe akuru nisaha, tipagine iriwo rakiraki ahe ti ni ni kerehe nibipa wai si amangasunge, zavura gu wiri rukutu ahe ka i abingo ho ni bangirise ya?
GUPAI ABORO APEHE: Gopai kinaho nayugoho nga ahe akuru nisaha.
5. Ya mo gu boro nape gupai re wisigingo agu agopai ngaha re wenengai nitini?
6. Bange aboro wai idi kuti gupai nga ahe akuru nisaha mbiko gupai gbua nga aboro aya fuyo wẽ wene abawirikipai dunduko idi kutini?
Julia aya: “Ka si du nga mo nata rogo ngbakungbo mo ki nibi bawene bambu, ya mo mo rengbe ka berãha nga angua du natiwi ngba wene gene ka kusa gu bambu re? Oó. Tipagine du tie rengbe ani ka ida ti ni kuti gupai nga ahe akuru nisaha?”
Gwen aya: “Ka boro ya foro wẽ he asu bakusa awaraga yo si kini gbataka ingo ku ariyo kini kusi gu kekeapai nga ga buku sakarogo afugo yo, mo idi kutini?”
TIPAGINE IDI MO TI NI KUTI MBORI?
Ziazia Kekeapai naruga rani ki ya ani du na “rugatinapai.” (2 Timoteo 1:7) Gure nayugo gupai nga, ka mburu gamo ida kuti Mbori dunga gbua rii
-
BIPAI (Mi nabihe nga boro kinaho du na bakere tandu nakusi ahe)
-
MAAPAI NGA GA ABORO (Wa mi araka rogo gu dagbarago du na pambori rogoho)
-
SOAPAI (Avungure asonosi re mi idi kuti Mbori, siapai aadunga bere te)
Kuba gure, si naida mo du na wene nduapai bero tipa gamo ida.
Tereza aya: “Ho du mi ni sukuru yo kaa degature bayugupai nisakirogo wai yo agu ahe du tii kpotoraniyo amangasunge, si nayugo gupai ayugo ziazia nga Mbori kina ti ni namangi ahe dũ. Apapara boro dunduko na kina sunge ti ni zavura gu rukutuhe vurũ, na agu asunge si amangaha dunduko boro ainongo ho te. Nirengo, kpotoboro ni gu he si naima mbu ka ino pai tipaha dunduko!”
Richard aya: “Ho mi naabi bagbanga bambu ni, bakurungba si nindu bangiri ime, gbiati tarambiri, mi naasana tire nga, ‘Da nambakadihe?’ Kere ngangarã aboro du nambakada he wa tarambiri, bambiko badungu rukutu apaparaha duho si aida si nimangisunge wenengai tipa gu tarambiri re dunduko rengbe ka mangasunge. Na ka si du nga kere iratatamana du si aidi ní duho tipa tarambiri kuru, gure nga kinawo duhe tipa aboro a.”
Anitonio aya: “Wa mi adia bakere regbo awere kuti wirika birĩ-inohe, gu yugopai nga ahe akuru nisaha nada bangire ni kungbohe. . . . Tipa re tigimi, gu idapase si aidaha ka dakuti gupai nga ahe akuru nisaha, si kii kisusi gu si aidaha ka dakuti gupai nga Bakusiahe kinaho.”
MO BERẼNGA KURII GIPAI RE
Wa aboro birĩ-inohe navura dia badungu agarã kuti wisigopai, i adanga kuti pai nga gu nasakarogo gupai yo nga ga ahe akuru nisaha te. Ka si du nga aboro birĩ-inohe agianga tiyo riipa gu yugopai nga ga ahe akuru nisaha re te, ya mo si adu ni gbegberẽpai ka mo tikango na gu yugopai re?
Gere Ima Rengba a ka Ngba Tiro
GUPAI AKUARO AGUMBAHA
Ya mo Si ni Wenepai ka Ida Kuti Mbori?
Oni bi paranga aboro ue nadu na kapa na ki nyakasi gayo idapase.
