Tipagine Satana na adaimona aˈasada ti ni nyanyaki ka nanga aboro? I naida ani ngbe na yo rogo gayo samungu. I naida ani naairiso yo. I naida ani idi kuti gayo aziree na kini mangi agu apai Yekova asogaha. Dungu agi amangapai re nabipa kpikpi aboro.

Ho gaani boro akpi ni, ani narungo arungo tipa ní gbe, na si agberãnga ka rungo tipa gu boro kpi te. Ho bakurea Yesu nangia Razaro akpi ni, ‘Yesu akpari ni aume.’​—Yoane 11:35.

Dungu asino duho nabipa kpikpi aboro, na si rogo dungu angbatungaha rogo apapara zegino ni bakiakia. Dunguhe adunga ni gbegberẽhe bangiri Mbori ya. Ono gu kura asino kinaho du mburuhe rii gu ida nga, kpikpi aboro naraka araka rogo kura ba na i nabi agu aboro abi du ni ungayo. Agu apai duwa kpara ni bakere wowo kini mefetise ti sende, dudungo kangba, fura fu kangba, manga giro, na karama, aboro naamangaha tipa ka he ba gberãrago ti atoro kpikpi aboro. Ono wa Baibiri ape gupai nga “kpikpi aboro aina nga pai te,” agu aboro namanga ngbatunga agu apai re nazugosi ga Satana ziree.​—Batungusipai 9:5.

 Kura asino kinaho du mburuhe rii gu ziree nga, kpikpi aboro naida undo aida be unga aboro na ka i afunga ha ya, i mangiyo amanga gbegberẽ. Rogo kura aringara, ho boro akpi ni, aboro naamanga bakere pumbo tipa ka nyasa kpe ní na ni fuo bete arame, fuo arame 40, watadu fuo garã sa. I naamanga gipai re ki ya wẽ si nika sa toro gu boro re si ga wenengai ku rogo ngbii atoro watadu ku ngbangbaturũ yo. Gu kurapai berewe dungu aboro amangaha nga ka fu riahe watadu buda fu kpikpi aboro.

Gi mangaapai re ni gbegberẽhe mbiko si nasonosa ga Satana aziree tipa kpikpi aboro. Ya mo Yekova rengbe ka ida na agu asino du mburuhe rii agu ayugopai nga ga adaimona? Wagusa te!​—2 AKorindo 6:14-18.

Agu amoyambu nga ga ndikidi Mbori yo, wiripai tiyo na gu mangaapai nasongoda ga Satana aziree te. I namaaberãyo tipa undo unga aboro na kini fu wasa fuyo. I ini gupai nga ho boro akpi ni, kina Yekova sa rengbe ka undo ní.​—Eyobo 14:​14, 15.

Kura aboro nafura na adaimona nitiyo watadu i nandu fuo borongua nga guni nafura na adaimona. Gere gu i ayambaha nga sangbaatoro. Sunge abinza, ngua, mangu, soroka, na sana kpikpi aboro nga agu apai dunduko nga ga sangbaatoro.

Baibiri nazahe nyanyaki ti agi apai re niya: “A nga boro sa ka du dagba roni . . . nara fu ngua, na gu ni namanga pa soroka, na adoavure, na abinza, na abaziaboro ni birĩ a, na asana sangbaatoro, na airamangu, na agumba sangbaatoro na agu yo nagbata pai be agu yo nakpi a te. Bambiko gu ni namanga ngbatunga agi apai re, ni bangiri Yekova ni kere gbegberẽ sino boro.”​—Pa Fu Rugute ni Ue he 18:​10-12.

Tipagine Yekova aza rani ti ni nyanyaki ti agi apai nga ga adaimona re?

 Yekova naza rani ti angbatunga sangbaatoro dunduko tipa kina gaani wenepai. Ko nakpinyemu aboro na kini berẽpayo, na ko ima ino nga agu aboro nakoda tiyo ku rogo agu apai nga ga adaimona, i nika mbu ambu be adaimona.

Dee nga Nilda angia borongua Brazil yo. Adaimona asa raka furi ni kerehe gbe. Ri aya: “Mi adu ni zizi re fu adaimona, na i kini ya mi mangi were na were. Aregbo kinaho he anaama re, na rire yo anaamanga wakina ga irapopo. Adaimona arungosi re si ki gberesi berãre. Mi atona dia kerekere angua kini mbiribuda na kini vugundö avu kindi. Gipai re amangi tipa dungu agarã.”

Ono kusa, mbiko gu undo nga ga Yekova na gu gako aDezire du auru kpotosende, Nilda akusi gori tii gu ome nga ga adaimona na ki tona raka bawene raka. Sangbari nga: “Mi naya fu aboro dunduko wẽ, ka boro asadingo kandara bara sa ka rimiso ti ni ku rogo agu apai nga ga [gbigbita] atoro ya.”