Baibiri naya wẽ Satana nga “banangi aboro kpotosende yo dunduko.” (Yugoti 12:9) Satana na gako adaimona aidanga ani idi kuti Fugo Mbori nga Baibiri te. I naˈasada ka sa aboro i idi kuti gupai nga kpikpi aboro naraka araka rogo kura ba nga ngbii atoro. Ani bingo wai i amanga gipai re.

Dungu apambori nayugo gupai fu aboro nga boro na he rogoniyo nga mbisimo watadu toro nga gu ní ata kpi si kini ga ku rogo kura ba kaa raka yo. I naya wẽ kpotose nakpi, ono mbisimo watadu toro akpingo te.

Ono Baibiri apenga pai wa gure te. Gine nga toro? Si nga gu onga unga du rogoraniyo nga gu nasa gupai nga boro du ni ungani. Gu bawiriki nangia Yakoba aya: “Ka kpotose zanga toro si du ni kpikpi he.” (Yakoba 2:26) Na mbisimo tigaha? Baibiri nape gupai nga mbisimo nga boro, angianga he du rogo boro yo ya. Ni kpiapai, gu pangbanga du tipa pa kusa Adamu naya: ‘Yekova Mbori ki mangi kumba rogo nvutu sende, ki ongo onga  unga ku õko yo; kumba ki du ni unga mbisimo.’ (Bambata Pai 2:7) I aamaanga mbisimo amaa ku rogo Adamu yo te, ono ko naabako dunduko nangia mbisimo.

Aboro, anya, atĩo, gbiati azire dunduko nga ambisimo. Agi ahe re dunduko ni ungaha mbiko gu toro du rogoho yo, watadu onga unga.​—Bam. P. 1:​20, 21, 24, 30.

Wadu he nga “mbisimo” nga boro nitini, si du Baibiri aya ti ni mbisimo nakpi akpi. Si naya:

• ‘Gu mbisimo ka ainga pai si akpí akpi.’​—Yezekere 18:4.

Ka mo gedi Baibiri tona ti tonatonaha ki da ti digidoho, mo abingo pai yo naya wẽ mbisimo akpingo te te. Mbisimo boro nga toro te. Gu yugopai nga mbisimo akpingo te, ga Baibiri yugopai ngaha te. Si nga yugopai nga ga Satana na gako adaimona. Yekova ima soga agu aziree dunduko nga ga apambori.​—Asanza 6:​16-19; 1 Timoteo 4:​1, 2.

Kura gene Satana ananga aboro ngbaha nga ko namangasunge na asana sangbaatoro. Asana sangbaatoro nga agu aboro nafura na adaimona. Badungu aboro, kodihe na asana sangbaatoro a, naberã gupai nga atoro kpikpi aboro du i afura na yo. Ono a wa bi ani he rogo Baibiri, ka gupai re mangingo te.​—Batungusipai 9:​5, 6.

Agu apangbanga asana sangbaatoro agbiaha re naye tie be ada? Si naye kina be adaimona! Adaimona ima rengba ka kparia boro wenengai ho du ní ni ni unga ní; i ima ino wai boro anaafura, wai bangera ní adu, agu apai ní amangihe, na agu apai ní ainihe. Sidu, si taata fuyo i saki tiyo kadu wa agu aboro naima kpi.​—1 Samuere 28:​3-19.

Kura gene Satana agbaraga gu ziree ngbaha du tipa kpikpi aboro nga rogo zire apangbanga. Gu zire apangbanga re nasa aboro ka idinga kuti gu rengo du rogo Baibiri ya.​—2 Timoteo 4:4.

Rogo Afirika, badungu apangbanga duho nga gu naya wẽ i abi aboro ní ungayo fuo kpiyo. I naagumba agu apangbanga re gbe ki ya i abi gu boro naima kpi rogo gu rago turũ aturõ ti gu ba gu boro re araki rogoho. Ono mo sananga tiro nga: ‘Ya mo ka gu boro re nidu na ome ti ni ka zinga be kpio, ka ní zingi be kpio rogo gu rago turũ aturõ ti gani aborokporo na abakureani?’ Wagusa te! Ka ní zingi be kpio kina ku rogo gu rago du gani aboro rogoho.

Na berewe, ya mo si arengbanga ka du nga gu boro i abi ní re awiri gu boro awira gbua nakpi te? Ni kpiapai, abatungusipai ue aatungusapai rogo kura gbaria sa, kura bakumba sa ki peke yo tipa dungu asaa. Ho i asanako ni tipa ndu gupai ko apeka yo ti ni, ko aya wẽ guni sa dagbayo nga gu wirinako naima kpi bakuruyo. Ho i atikango ni, gu bakumba re aaidanga kutini te. Ko akakuti gupai nga kina boro wirinako du. Mo berẽnga pa gu pangbanga gu bakumba re aguari ho ka ndu ka gumbaha fu abakureako na gako amurakporo!

Si nawira gupai nga mo aima giapa gu kerekere apai aboro abihe, agihe, watadu ararihe rogo musumo. Ngbatunga gu iiriwoapai re naaba kina gunde ti agu aboro nagiaha. Marein naraka rogo gu papara Afirika du ku dioyo anaagia fugo gu titari naima kpi ri niyambu ri yuru dedede. Marein anidu na bakere gunde ri kini ta ngbari na kini zingisi gari aborokporo dunduko rame yo. Ni yangaraha, ri apopo.

Ya mo ka si nidu nga kpikpi aboro ni ungayo, ka i nagundesi kina gayo aboro wa gure na kini poposi yo? Gu kereapai re naye dunduko be adaimona.

Na ginipai du tipa agu apangbanga du wa si naundo aundo na kini fu wasa? Ni kpiapai, Gbassay du Sierra Leone yo aawoka. Ri arari musumo ki bi bari naima kpi. Ko aya furi ri ndu koyo du kura ngua ni sa, ki kati kpehe, ki pasadihe, ki mbirihe. Ko aya furi ka ri furanga na boro mbata fu manga ri gipai re ya. Ri amangi gupai ko apehe re ri ki hu.

Kura dee aya wẽ kumbari akuru furi yuru fuo kpiko. Ri aya ko adu ni bawene ko na ki vodi wenewene aroko.

 Ngbatunga agu apangbanga na yuguyuguapai re nawira gupai ngbaangba. Ono ya mo si naye be Mbori? Oó. Yekova nga “irarengo.” (Atambuahe 31:5) Ko arengbanga kaa biriko rani watadu nanga rani te. Kina adaimona sa namanga gure.

Ono ya mo wene adaimona ti ni? Oó. Ka kura adaimona vura manga tiyo ti kura aregbo ni wene aboro, i dunduko nga gbegberẽ aboro. Ho Satana afura ni na Eva, ko amangi tiko wa wene boro. (Bambata Pai 3:1) Ono ginipai namangi fuo giari sangbako? Ri akpi.

Mo ima ino ya dungu gbegberẽ aboro ninaaida kadu wa wene aboro fu agu aboro i aida ka nanga yo. Sangba Mbori naya: “Kina Satana a nambakada tiko ni maraika imarago.”​—2 AKorindo 11:14.

Mbori afuranga na aboro areme rogo amusumo, yuguyuguapai, watadu agu afugo naye be atoro te. Ko naruga rani areme rogo Baibiri, nga gu rengbe ka sa boro ní du ziazia, “aũ manga wene apai dunduko ki du be ni.”​—2 Timoteo 3:17.

Sidu tie, ho Yekova aza rani ni ti agu agbina nga ga Bakitingbanga, ko namangaha wo mbiko ko nakpinyemurani. Ko ima ino ya adaimona nga kere avurarani.