Atoro kina ti ni! Wene atoro kina ti ni na gbegberẽ atoro a. Ya mo i nga agu aboro naraki araka mbata auru kpotosende i kini kpiki?

Oó, i aarakanga mbata auru kpotosende te. Ho boro akpi ni, ní andunga ku rogo ngbii nga ga atoro a wa dungu aboro aberãha te. Ani naino gipai re wai? Mbiko Baibiri napehe wo. Baibiri nga kitabu rengo nga gu naye be bangisa ndikidi Mbori, du rimoko nga Yekova. Yekova nakusi aboro; ko ima ino gupai nzunzu ninaamanga ho boro akpi ni.​—Atambuahe 83:18; 2 Timoteo 3:16.

Baibiri naya wẽ Mbori ambakadi bambata kumba nangia Adamu “rogo nvutu sende.” (Bambata Pai 2:7) Mbori amoiko rogo Paradizo nangia ati Edene. Ka Adamu airisi ga Yekova ndiko, ka ko akpingo te; ka ko du ti kina unga areme. Ono wa Adamu ata ino aino kini kuo ga Yekova ndiko, ko aya fuko: “Mo nga kina nvutu, kina ku nvutu yo mo ka karaga tiro ku ho ni.”​—Bambata Pai 3:19.

Rogo gipai yo re nga gine? Mo berẽnga kurii gipai re: Wari Adamu adu ni mbata fu Yekova kusiko rogo nvutu? Ko aadunga ti ni te. Ko aadunga ni toro ngbangbaturũ yo te. Ko aadunga ti ni wa gu tooni te. Sidu, ho Yekova aya ni fu Adamu ko nika ‘karagatiko ku nvutu yo,’ rogo gupai yo ko agumbaha re angia Adamu nika kpi. Adamu aakpingo kini ga ku rogo ngbii nga ga atoro te. Ono ho ko akpi ni, ko ago kusayo ki du wakina kungbo nvutu. Kpio nga zanga unga.

 Ono ginipai du tipa kura aboro tigayo nga aguyo kpiki? Ya mo i kinaho rogo kura ba? Baibiri nakaragapai furani niya:

• “I nandu dunduko kina ku rogo ba sa. Aboro na anya aenge kina nvutu yo, i na ami nandu dunduko berewe ku nvutu yo.”​—Batungusipai 3:20.

• “Kpikpi aboro aina nga pai te.”​—Batungusipai 9:5.

• “Gayo nyemuse ima kpi na gayo sogote na gayo kpihe a.”​—Batungusipai 9:6.

• “Ho ongani niguari ni, ni ki karaga tini ku rogo gani sende; ti kina gu uru re gani berã pa apai ki nyasi.”​—Atambuahe 146:4.

Ya mo si mbu ambu foro mo idi kuti agu apai Baibiri apehe re? Ka si duwo, mo berẽnga kurii gipai re: Rogo dungu akporo, kumba naamangasunge tipa ka gbia marã ka ngerafuo gako aborokporo. Gupai ninaamanga gbe nga, ho kumba akpi ni,  raka nadu ni kpakarakpakaraha fu gani aborokporo. Ti kura aregbo, marã be dekurugbo na agude ka ngbe kandara riahe na ni te. Asogo gu kumba re rengbe arengba ka manga gako aborokporo gbegberẽ. Mo sananga tiro tie nga: ‘Ka si du nga gu kumba nakpi re naraka araka rogo gu ngbii nga ga atoro, tipagine ko angeranga ti ni fuo gako aborokporo a wa ko anaamangaha mbata ya? Tipagine ko abandanga yo ti ni be gbegberẽ aboro ya?’ Si wo mbiko gupai nga gupai Baibiri apehe nga kina rengo. Gu kumba re ni ungako te; ka ko mangingo wiripai te.​—Atambuahe 115:17.

Ya mo gere nayugo gupai nga kpikpi aboro adunga ni ungayo berewe te? Oó, wo duhe te. Ani nika fura afura tipa zingabekpio kusa. Ono gupai gipai re ayugoho nga kpikpi aboro ainongo gupai unga aboro amangaha te. Ka i bingo ro te, ka i ginga fugoro te, na ka i furanga na mo a te. Si aidanga mo naagunde beyo te. I arengbanga ka undoro te, na ka i imisinga ro a te.​—Batungusipai 9:4; Yesaya 26:14.