Rogo yuru sa, Bakindo Nebukadenesara arari musumo. Si aima fuda ko ni kerehe ka gene adunga wa ka ko ra ya. Ko ayambu gako abinza na ki ya fuyo: ‘Oni sakirogo gimi musumo fere.’ I ki ya: ‘Ako Bakindo, mo gumbapa gu musumo mo ni rarihe furani.’ Ono Nebukadenesara ki ya fuyo: ‘Oó! Oni pepa gu musumo mi ni rarihe fere, ka oni apenga ha ya, mi nika imo roni.’ I ki ya fuko berewe wẽ: ‘Mo pepa gu musumo mo ni rarihe ani nika sakarogoyo foro.’ Ko ki ya: ‘Oni dunduko naida ka nanga re. Oni pepa gu musumo mi ni rarihe!’ I ki ya fu bakindo: ‘Rakiraki boro ho rengbe ka manga gupai re te. Gupai mo asanahe tipaha ima kpakara.’

Nebukadenesara adu na bakere zinga ko ki zinahe nga i imi agu aboro tatamana dũ naadu rogo gako ringara. Gipai re aakoda Daniere, Sadaraka, Mesaka, na Abedenego. Daniere asana bakindo nga ko fu bete regbo fuyo. I na abakureako ki kpari fu Yekova ka sanako tipa undo. Ginipai Yekova amangihe?

Rogo musumo, Yekova ayugu ga Nebukadenesara musumo fu Daniere na ki sakirogoyo fuko. Fuo girorago, Daniere andu fuo ga bakindo moyambu ki ya: ‘Ka mo imingo boro tatamana kandara sa ya. Mi rengbe arengba ka sakarogo ga bakindo musumo yo.’ Gu moyambu re andu na Daniere fuo Nebukadenesara. Daniere ki ya fu bakindo: ‘Mbori ima yugo gupai foro nika manga kumbatayo. Gamo musumo du re: Mo abi bakiki kpiahe du na riihe rogo dahabu, ngbaduhe na abehe kidu rogo feda yo, vuroho na amboso ho kidu rogo sirigi yo, nduhe ki du rogo marã yo, na kpete nduhe kidu rogo pere yo. Fuani, mbia ki guari rii bagangara yo ki nari ndu gu kpiahe re. Gu kpiahe re ki kuadi ki da nga ngungo na ki gbataka na wege. Gu mbia re ki da nga bakere bagangara, ki hiisi kpotosende dunduko.’

 Fuani, Daniere ki ya: ‘Gipai re ga musumo ayugoho: Gamo kindo nga gu rihe du rogo dahabu yo re. Feda nga agu akindo nika ngbefuo gamo. Gu kuraha sa nika du wa sirigi, nga gu nika zoga zegino naabaha. Gu kindo ngbefuo ho nika du wa marã. Niyangaraha, kindo nika duho nga gu nika du ni kparakakparakaha, gu kura paparaha wa marã gu kura paparaha kidu wa pere. Gu mbia nga gu naada ni bagangara re nga ga Mbori Kindo. Si nika kuadi agi akindo re dunduko ki digisihe nyeanye kindi.’

Nebukadenesara ati sande ku barabangiri Daniere na kpakpuko kusande. Ki ya: ‘Ga Mbori du yugu rogo gi musumo re foro. Mbori ho du wa ko te.’ Kuba Nebukadenesara imi Daniere, ko amoiko kurii agu aboro tatamana na abazogo dunduko naadu rogo ringara Babera. Mo nabi wai Yekova akaragapai sa ga Daniere kparakpee?