Tingbafuo Pumbo Susiri, Yesu na gako abawiriki akuru Somorona yo ho i aaga ni ku Gariraya yo. Mbembedi na gu gbata nga Sukara, Yesu aru rogo gu ba i ayambaha nga ga Yakoba guga. Ho ko aaongoda ni yo, gako abawiriki andu ku gbata yo ka ngbe riahe.

Dee aye ku rogo gu guga re ka tu gari ime. Yesu aya furi wẽ: “Mo fú he fere mi mbiri he.” Ri aya: ‘Tipagine mo afura ti ni na mi? Mi nga dee Somorona. AYudo naafuranga na aSomorono te.’ Yesu aya furi: ‘Ka mo ni ini gu boro nga mi, ka mo sana re tipa ime na mi ki fu ime unga foro.’ Gu dee re ki sanahe nga: ‘Ginipai mo aida ka pehe?’ ‘Kandara he bero ka mo tu he na ni te.’ Yesu aya: ‘Gu boro ka mbiri gu ime ka mi fuhe fu ni, gomoro ime manginga ni berewe te.’ Gu dee re aya: “Gbia, mo fú gu ime re fere.”

Yesu ki ya furi: ‘Mo ye na kumbamo ku guga no.’ Ri ki ya: ‘Kumba bere te.’ Ko ki ya: ‘Rengo du mo agumbaha. Mo mangi rogatise bara bisue, na awere, mo naraka na gu kumba angianga kumbamo ya.’ Gu dee re aya: ‘Mi inihe ya nebi nga mo. Gimi aboro idi kuti gupai nga ani ima rengba kaa irisombori rii gi bagangara re, ono aYudo naya tigayo, kina Yerusarema yo sa rengbe ani kaa irisombori ni. Mi idi kuti gupai nga, ho Masiya nika ye ni, ko nika yugo wai ayugo furani si aida ani irisimbori.’ Sidu, Yesu agumba gupai furi ko aapenga ha mbata fu boro ya nga: ‘Mi nga Masiya.’

 Gu dee re ki oro ku bakporo yo ki gumba gupai fu aSomorono nga: ‘Mi nabihe nga mi ima bi Masiya. Ko ini apai dunduko tipa re. Oni ye ka biko!’ I andu na ri ku guga yo na i ki gi gupai Yesu aayugoho.

ASomorono adi Yesu kugume ko sungu rogo gayo bakporo. Ko ayugupai yo tipa arame ue, na dungu aboro ki idi pako. I aya fu gu dee somorona re wẽ: ‘Fuo ani gi agu apai nga ga gu kumba re, ani inihe nga ko nzunzu nga batasi zagino.’