Tingbafuo Yesu sia gako amokedi 12, ko azorõ rii bagangara yo ku rogo gu ba ndurumo aboro adunguratiyo ku rogoho. I aye Gariraya yo, Yuda yo, Tura yo, Sidona yo, Suria yo, na rogo kura papara Yaradene. I aye na agu aboro naambu be akaza na aguyo naambu be adaimona. Yesu ahusi yo dunduko. Fuani, ko asungu pavuru bagangara ku bani na ki tona ka fura fuyo. Ko asakipai tipa gupai si aida ani mangihe ka ani aaida ka du ni abakurea Mbori. Ani du wa ka ani ini gupai nga, ani naida Yekova na ka wirika ka kpinyemuko. Ono ani arengbanga ka kpinyemu Mbori te ka si du nga ani akpingo nyemu kura aboro te. Ani du wa ka ani du na wenesino fu aboro dunduko, zavura fu avurarani a.

Yesu aya: ‘Si aidanga mo kpinyemu kina abakureamo sa te. Si naida a mo kpinyemu avura ro na kini mbupai fu aboro kina boro kpotoroyo. Ka rago gberẽ ti boro na mo, mo ndu fuoni nibasa na ki ho mbupai be ni. Mo mangipai fu aboro kina wai mo aida i mangipai foro.’

 Yesu aima fu wene rugute a fu aboro nibipa aũzegino. Ko aya: ‘Si ni nyanyakipa pai ka du ni bakurea Yekova kisusi du na bakere marã. Iradĩ ima rengba ka dĩ gamo marã, ono boro ho rengbe ka dĩ gamo pabakure na Yekova te. Mo mbu bakabangiro tipa guhe mo nika rihe, ka mbiraha watadu ka voho. Mo bingo azire. Mbori naida gupai dedede nga riahe duadu bera ami naarihe. Bakabangirise agizasinga gamo raka na uru sa te. Mo tingidi gupai nga, Yekova ima inopa agu ahe mo azingo tipaha.’

Gu ndurumo aboro re aagianga boro mbata ni nifura wai Yesu aafura re te. Gayo abarumbatayo rogo pambori aayugonga agu apai re fuyo te. Tipagine Yesu angia bakere bayugupai? Bambiko agu apai ko anaayugoho dunduko anaaye be Yekova.