AFarusi asogo Yesu na i kini idi ka gbata gu ndupai rengbe yo ka zioko ti ni. I agumba gupai nga, si aidanga ko husi aboro kaza rago Sabiti te. Rogo gu kura rago Sabiti sa, Yesu agbia iravurari ko niho he bangiri gene. Ko ki ya fu gako amokedi: ‘Oni bi wai ga Mbori ome nika undo gi kumba re.’ Yesu asuku sure ki putaha na sende si da ni fuka, fuoho, ko ki moihe ti bangiri gu kumba re. Yesu aya fuko: ‘Mo ndu ki zundu bangiro rogo gu wiri di nga Siroa.’ Gu kumba re ki mangihe wo, na fuoho, gure angia bambata regbo ko atona ka ngera rogo gako raka yo.

Iriwopai aima ti ti aboro. I aya: ‘Ya mo gi kumba re du ni naasungo yore kaa ho he, watadu gu kura boro du gbua nawira ko?’ Gu kumba re ki ya: ‘Mi du i avungu re na vurari!’ Aboro ki sanako nga: ‘Ginipai sa ro tie mo ningere?’ Ho ko ape gupai ni fuyo naamangi, i andu na ko koyo du aFarusi ni.

Gu kumba re ki ya fu aFarusi wẽ: ‘Yesu nimoi fuka ti bangire na ki ya fere mi ndu ka zunda ha kusayo. Mi andu ki zundu he, na awere, mi nangera.’ AFarusi ki ya: ‘Ka si du nga Yesu nahusa boro rago Sabiti, gako ome arengbanga ka ye be Mbori te.’ Ono gu kura aboro aya: ‘Ka si du nga gako ome ayengo be Mbori te, ka ko dunga na rengba ka husa aboro kandara tooni te.’

AFarusi ayambu avungu gu kumba re ki sanayo nga:  ‘Mangihe wai wironi angera awere ti ni?’ Avunguko aagunde agunde mbiko aFarusi aima gumba gupai nga, agu aboro ka idipa Yesu, i nika do ni kusayo bambutiria yo. Sidu, i aya: ‘Ani ainongo ho te. Oni sana kina ko.’ AFarusi asasana gu kumba re na dungu asanahe da kinaho ko akaragapai ni ki ya: ‘Mi ima gumba agu apai furoni dunduko mi nainihe. Tipagine oni asana re ti ni kindi?’ Agu aFarusi re azingi ki do ko kusayo.

Yesu andu ki gbia gu kumba re, na ki sanako nga: ‘Mo idipa Masiya?’ Gu kumba re aya: ‘Ka mi ini da nga ko mi idipa ko aida.’ Yesu ki ya: ‘Mi du nga Masiya.’ Anga wenepai du Yesu amangihe re te? Yesu aahusa nga kina husi husi gu kumba re gbua te, ono ko aundo ko tipa ko du na idapase a.