Yesu adu na mbembedi abakureako biata naaraka Betania yo. I angia Razaro gbiati adawiriko ue nangia aMaria na Marata. Rogo kura uru sa, ho Yesu adu ni rogo gu kura papara Yaradene, aMaria na Marata akedi sunge na gbarakagbaraka pangbanga fuko nga: ‘Razaro nawoka ni kerehe. Ako mo yengo aye ni ipo!’ Ono Yesu aandunga kina tigu regbo re te. Ko asungu tipa arame ue, vuru gu regbo re Razaro akpi, sidu, ko kini mo ka ya fu gako amokedi: ‘Ani ndu ku Betania yo. Razaro ti ni rame, na mi nandu ka zingisako rame yo.’ Amokedi ki ya: ‘Ka si du nga Razaro naraara, si nika undoko ko hu wenengai.’ Sidu Yesu agumba gupai fuyo gbaiga nga: ‘Razaro ima kpi.’

Ho Yesu ada ni Betania yo, Razaro aima manga arame biama ku murö yo. Rimbasa aboro aye ka fu wasa fu aMaria na Marata. Ho Marata agi gupai ni nga Yesu ima ye, ri aoro ka gbiako. Ri aya: “Gbia, ka mo adu erẽ, ka kawire akpi nga te.” Yesu ki ya furi: ‘Kawiro araka araka berewe. Marata mo idi kuti ni wo?’ Ri ki ya: ‘Mi ini ya ko azinga azinga berewe ti rago zingabekpio.’ Yesu agumba gupai furi nga: “Mi nga zingabekpio, nga unga.”

Fuani, Marata andu fuo Maria ki ya furi: ‘Yesu ma ye.’ Maria aoro koyo du Yesu ni, rimbasa aboro ki pefuo ri koyo. Ri ati sande pati nduko ka gene adunga wa ka ri mbu kpee ya. Ri aya: ‘Gbia, ka mo adu herẽ, ka kawirani du ni kina ungako awere!’ Yesu abi gu rungo ri adu rogoho, si ki sako ko tona ka kpara a. Ho rimbasa aboro abi aume ni bangiriko yo, i aya: ‘Oni bingo wai Yesu akpinyemu Razaro.’ Ono aguyo aabakabangiriyo nga: ‘Tipagine ko aabatasanga bakureako ti ni ya?’ Ginipai Yesu arengbe ka mangaha fuo gure?

Yesu andu ku pati murö yo yo bambia akisi ngbadimo murö ni. Ko azinahe nga: ‘Oni di mbia kusayo.’ Marata ki ya: ‘Ono si ima dia arame awere biama! Kpotoko nafũ afũ.’ Wa si avura du wo, i adi mbia kusayo, na Yesu ki kpari nga: ‘Buba, tambuahe foro tipa degaturo fere. Mi ima inoho nga mo naagia re agia dedede, ono mi nafura kuari tipa aboro inihe nga mo nakedi re.’ Fuani, ko ki  yambuhe na fugoko kuari nga: “Razaro, mo kúru!” Iˈiriwopai amangi nga: Razaro akuru murö yo kidu ni kaikai ko kindi na roko tiko. Yesu ki ya: “Oni záki ko, ko ndú.”

Badungu agu aboro naabi gipai re aidipa Yesu. Ono aguyo andu ki gumbaha fu aFarusi. Naatona ti gu regbo re ka ndu kumbatayo, aFarusi aaida ka imo Razaro gbiati Yesu a. Boro sa dagba gako amokedi naadu 12 nga Yuda Keriota andu fuo aFarusi ni gbuko ki sana yo nga: ‘Bakio Marã wai oni ka tumo re na ni ka mi undo roni oni gbia Yesu?’ I ada kuti gupai nga, i nika fu rukutu marã feda 30, Yuda atona ka gbata momu tipa wai ka fu Yesu fu aFarusi.