1. Ginipai si aida ani mangihe tipa ka fu ngbarago fu Mbori?

 KA ANI aida kadu na wene pagume nga ga nyemuse dagbarani na Mbori, ani du wa ka ani he zire pambori nisaha. Si naida ani naamanga ndikidi pambori. Dungu aboro areme auru kpotosende dunduko namangaha.

2. Wari rengbe oni ka bi aDezire Yekova ni, na gayo sunge nga gine?

² A wa Ziazia Kekeapai aima gumbaha ya si amanga kumbatayo, ndikidi airisimbori nga “bakere rimbasa aboro” nga aguyo kuru kusayo “dagba rika aboro dunduko, na angbatunga yo, na aboro, na angbatunga afugo[yo] dunduko.” (Yugoti 7:9) Rogo aringara 235, amirioni aDezire Yekova naundo aboro zaaza i wirikipai tipa ga Yekova agene nga ga nyemuse na tipa agu apai ko akpinyemuhe.

3. Da aDezire airiso ni, na gini ngbatunga irisombori i anehe?

³ ADezire ima ruga tiyo na gupai nga, kina Yekova sa rẽ tipa iriso. I aidanga ka tumusa fu sekeseke kpiaahe watadu fu gu keke kpiaahe aboro amangasunge nani rogo irisombori te. (1 Yoane 5:21) I airisonga kpikpi aboro ni rimiso yo tiyo kurogo gu sino kparaboro sasasa naurugo agu aida nga ga zire pambori na “gu yugopai nga ga adaimona” te. (1 Timoteo 4:1) Wa vura duhe wo, i nafu wasa afu fu agu aboro duna nunga be pakpio badiangbayo nisaka yo rogo ga Mbori mokido fuyo nga gu mokido du tipa zingisa kpikpi aboro kurogo paradiso auru kpotosende.—Yoane 5:28, 29; Amokedi 24:15.

4. Ga ga Mbori aboro bipai tipa manga ngua nga gine?

⁴ ADezire arimisanga tiyo kurogo manga ngua, soroka, watadu sunge abinza te, mbiko i ini gupai nga, Bakitingbanga du naye na agi apai re. I akidonga kuti ngua si banda yo te, kina Yekova sa i akido kuti ko.—Asanza 18:10.

5. Rogo gini agene adunga aDezire Yekova ti ni ‘ni aboro zegino ya’?

⁵ Yesu ayaa gako ‘abawiriki adunga ni aboro zegino te.’ (Yoane 17:16) Yesu nitiko aka ka rimiso tiko kurogo agu apai nangia ga birĩ zogarago nga gu aboro aamangaha rogo gako uru. (Yoane 6:15) Teketeke a, aDezire arimisonga tiyo kurogo agu apai nga ga birĩ zogarago, ga kiisopa ringara, watadu kaa sota tipa kadu rogo gu riko du paha kuari te. Wa vura duhe wo, i nafu gayo marã-ngbeti afu na kini irisi agu andiko nga ga agu aringara i araka rogoho.—Yoane 15:19; ARomo 13:1, 7.

6. Gini arugute ga Mbori amoyambu amangaha nga gu nabipa rogatise na mbutise?

⁶ Mbiko aDezire nairiso agu arugute nga ga irangbii, i nabi gupai nga, i ima kepa gayo rogatise kuti ndiko. (Tito 3:1) I nairisa agu arugute Mbori afuhe, na ka bangisa boro aroganga adee susi sa ya. (1 Timoteo 3:2) Kurii gure, wa duhe nga, ga Mbori amoyambu namanga agu arugute nga ga Ziazia Kekeapai adunga ngburungburu ya rogo gayo raka, i nane agu apai naye na mbutise.

7. Wai aDezire ayugo nyemuse dagbayo?

⁷ ADezire nakpinyemu tiyo dagbayo. Gi gayo nyemuse re, kodihe kuti gu nyemu Mbori du tiyo, nakpamia yo i du nindikidi awirina, i ki vura du nga agu aboro du angbatunga yo nibakiakia na dagba dungu rikaaboro vurũ. Ho gberango niti ni kurii awirinayo watadu ho du awirinayo ni rogo zingo, aDezire naipiso tiyo nibasa ka fu undo fu akurayo. ADezire nayugo nyemuse a rogo gu gene i araka ngbaha.—Yoane 13:35.

8. Gini gbegbere mangaapai ga Mbori aboro anehe?

⁸ Ga Yekova aboro namanga asadatise nyanyakii ka raka gu raka nga ga rengo, kini mangi kina ruruapai. I nane agu apai dunduko nga ga dii, ga pe ziree, wasiwasi kodaba, ga kpibuda, na gu sunge bagaahe nga ga biriki. Akumba atakanga adia yo te. Mbata fu i dani aDezire, bete yo anamanga agi apai re amanga, ono mbiko ga Yekova undo, i aima mbuhe. I “azundu” yo i kidu nigigiri yo bangiri Mbori.—1 AKorindo 6:9-11.

9. Ginipai buku sa agumbaha tipa agu akanisa nga ga aboro Afirika?

⁹ Rengo ngaha, nga, dungu apambori  nayaa i na rengo beyo. I rengbe ka taa beyo kuti gu iiriwo mangaapai i amangaha tipa songoda gi gayo gumbapai re nani. Nikpiapai, kuti agu akanisa i ayambaha ya si nga ga agu aKristano nga aboro Afirika, buku sa nayaa: “[Vovo abadona nga ga aKristano] ima dia gu sunge ku beyo nga ga airangua watadu ga abinza. . . . I nayaawee i nafu agu arugute nga ga tatamana fu aboro na kini mangi iiriwo apai. Agu anebi du dagba yo nafu yuguyuguapai na kini saki sangba amosumo. I namangasunge na ziazia ime, ziazia nzeme, akuke, abaro na wene fuõngua ka husa akaza nani watadu ka rada kpoto boro nani tipa ka kaza zinga ni ya.”

10, 11. Agu apai i ayambaha areme ya si nga iiriwopai i amangaha ti rimo pambori, tipagine si ayugonga gupai ti ni nga ye gu pambori re be Mbori ya?

¹⁰ Agu aboro du rogo gi pambori re nayawee gi iiriwo apai i amangaha re nayugo gupai nga, Mbori ima fu maku kurii gayo pambori. Ono tie, agi apai i aya ti ni si nga iiriwo apai re, ayugonga gu pambori re ya Yekova ima ida paha te. Satana nafu ome afu fu bete agu aboro du rogo zire pambori tipa i mangi “iiriwo apai.” (2 ATesaroniko 2:9) Kurii gure, Ziazia Kekeapai aima fura tipa apai kumbatayo ya gu iiriwo agamahe Mbori afuhe fu gako amoyambu “adíga adiga,” ngbatunga gu du wa fura tipa gupai nika manga gizo, fura rogo-dungu kura fugo-aboro, na padu boro na kparakpara inohe beni.—1 AKorindo 13:8.

¹¹ Yesu azahe ki yaa: “‘Agu yo naya ti re, “Gbia, Gbia,” i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo. Dungu aboro nikaya fere ni gu rago re wẽ, Gbia, Gbia, ani afuga nga pai ni rimoro, te? Ani ado nga adaimona ni rimoro, te? Ani amanga nga agu apai du na tandu ni rimoro te?’ Ono mi akúsa ha fu yo ki ya, ‘Mi aína nga roni wa sa te; oni gúari pati re, amangi irairapai.’”—Matayo 7:21-23.

12. Ada nika rimo kurogo gu Kindo nga ga ngbangbaturũ?

¹² Ada tie nika rimo kurogo gu Kindo nga ga ngbangbaturũ? I nga agu aboro namanga gupai Yekova akpinyemuhe.

13. Gine nga gu sunge Mbori aruga gako aboro i mangihe areme, na ada namangaha?

¹³ Gine nga gupai Mbori akpinyemu gako aboro mangihe areme? Yesu ayaa: “Gi wene pangbanga nga ga ngbi re i atungusa ha [atungusa] rogo zegino dunduko mbiko ndika fu arikaaboro dũ; ragoho ki digi adiga.” (Matayo 24:14) Gere nga gu sunge aDezire Yekova amangaha zaaza.

14. Gine nga ga Mbori Kindo, na ada nika zogarago rogo gu Kindo re?

¹⁴ ADezire Yekova natakapande ga Mbori Kindo “rogo zegino dunduko” ni gu zogarago nga ga ngbangbaturũ nika zoga kpotosende nabaha dunduko na rurupai. I nayugo gupai fu aboro nga, Yekova ima maa Kristo Yesu ni gu Bakindo nga ga gu Kindo re, ki kodi gu kura abadiazogarago du bangeyo nga 144,000 fuo ko, nga aguyo i asia yo dagba ngbatunga aboro.—Daniere 7:14, 18; Yugoti 14:1, 4.

15. Gine ga Mbori Kindo nika gbarasaha?

¹⁵ Ni manga aDezire sunge na Ziazia Kekeapai, i nayugo gupai fu aboro nga, ga Mbori Kindo nika gbarasa ga Satana zegino nabaha. Zire pambori nika go ago a na gaha zire yugupai nga gu afunga irisa fu Mbori ya ono nga gu nataasa kina rimo Bakitingbanga! (Yugoti 18:8) Agu azogarago nga ga aboro nabaha dunduko nga gu nasogote Mbori nika go a!—Daniere 2:44.

16. Ada nikangia avuru Kristo Yesu, na wari i ka raka ni?

¹⁶ Kurii gure, aDezire Yekova nayugo gupai fu aboro nga, Kristo Yesu nika ye na iiriwo amamu fu agu aboro dunduko namanga gupai Mbori akpinyemuhe. I nikangia avuruko auru kpotosende. Ziazia Kekeapai nakidohe niyaa: “Ko nabatasa irazingo ahe ho ni nakpara ni ku ari; na irarungo na gu ni adu nga mounda ti ni ya. Nunga rurungbura boro du ti ko na irazingo ahe a, ko nabanda unga airazingo ahe.”—Atambuahe 72:12, 13.

17. Kina gini aboro sa natakapande ga Mbori Kindo?

¹⁷ Anga kura badona aboro ho namanga gupai Mbori akpinyemuhe ni tungusa wene pangbanga nga ga Kindo te. Kina aDezire Yekova sa natakapande ga Mbori Kindo rogo zegino dunduko.