1. Ginipai ka mangi ka ani “mbédi na Mbori”?

 YEKOVA nakpinyemu agu aboro namangasunge fuko. Ka oni irisi Yekova, ko afu maku afu fu roni awere na kumbatayo kindi. Ziazia Kekeapai nayaa: “Oni mbédi na Mbori, ko ki mbedi na oni.”—Yakoba 4:8.

2. Wai rengbe ani ka mbeda na Mbori, na wai si amangapai sa gaani akparakpee?

² Tipa oni mbedi na Mbori, si naida oni wisigi Fugo ko na kini mangihe rogo gaoni raka. Ho oni akparakpee ni fu Yekova ringbisihe kuti gupai ko akpinyemuhe, ko adegatuko adega kuti gaoni akpee na ki karagapai sani. Gu Kristano ni mokedi nangia Yoane akepai ki yaa: “Mbiko gere ani rengbe ka du zukazuka fu [Mbori], nga, ani ini ka ani ho gu he ku sangba gako nyemuhe yo, ko gi pa rani agia. Ka ani ini ya ko nagia pa rani, gu he ka ani ho, ani ini aina ya agu ahe ani ho be ko si be rani.”—1 Yoane 5:14, 15.

3-7. Wai rengbe ani ka gbia gu tatamana naye be Mbori, na wai rengbehe ka undo rani?

³ Kurii gure, wa oni ka mbeda na Mbori, ko afu gu tatamana fu roni oni aidaha tipa ka mangapai sa agu apai nga ga raka oni agbia tironi nani na a’uru. Ziazia Kekeapai nayaa: “Ka zingo tatamana amanga gu ni dagba roni yo, ni sána Mbori.”—Yakoba 1:5.

⁴ Wai rengbe gu tatamana naye be Mbori ka undo roni? Pai sa dagba agu akuraha nga gu rengbehe ka mangaha nga, si rengbe ka undo roni oni ini agu apai nafu gberarago fu Yekova. Oni rengbe arengba a ka wirika ndu gupai angbanga agi apai ti ni re ya na ki wiriki gupai rengbe oni ka mangaha tipa ka ne manga agi apai angbanga re ya. Ngbatunga gu inohe re rengbe ka banda roni be gu dungu kpakarakpakaraapai nafuda dungu aboro. Nikpiapai, pa irisa ga Mbori aboro agu arugute du tipa giro rogo gayo mangaapai yo nabanda yo i ne gu dia vuse iraha aidanga ha ya, be agu akaza aboro adiaha rogo kodaba, be gu rogatise adunga ngbarago rogoho ya watadu gu rogatise nagburuwa.

⁵ Gini kurapai fuo gure rengbe gu tatamana Mbori afuhe ka mangaha fu roni? Si rengbe ka undo roni oni gbia dungu weneapai rogo raka. Si rengbe ka sa roni oni mangi agu adiaberã nga ga tatamana rogo agu apai oni amanga, ngbatunga gu du wa ngera fuo gaoni mosoro. Si asa roni oni rengbe ka maa agu asasa barabangironi daada na ki he maa agu asasa arengbanga ka undo roni nyeanye kindi ya.

⁶ Gu tatamana naye be Mbori rengbe ka undo roni a rogo gaoni ngbanyaa dagbaroni na kura aboro. Si rengbe ka sa roni oni raki gu ramukporo nga ga ngbarago. Si rengbe ka sa roni oni zi gu bakure na aboro nga ndikidihe nga gu nika nyeanye kindi, na si asa gupai a nga aboro fu irisa fu roni, zavura aguyo amanganga sunge fu Mbori ya.

⁷ Kurii gure, padu oni na gu tatamana naye be Mbori ambakada gaoni bipai tipa raka. Si aundo roni oni sovura na diabese kuti gu kpakarakpakarapai naye na gberarago fu aboro rogo gayo raka. Berewe a, si asa roni oni du na ruru bipai tipa raka kumbatayo zanga du na gu berã nga, kina gbegbereapai nikaa manga kumbatayo kindi. Wene ngera kuti apai tigaha, asa gupai nga, ka oni dunga na fudifudiapai berã roni yo na ti kpotoroni ya.—Asanza 14:30; Yesaya 48:17.

8. Ka oni mangisunge fu Mbori, gine oni ka gundenga behe ya?

 ⁸ Ka oni mangisunge fu ndikidi Mbori, oni adunga na gu gunde nafuda agu aboro amanganga sunge fuko ya te. Mbiko oni ini gupai nga, kpikpi aboro mura yo ni unga yo te, oni agundenga be agu aboro kpiki te. Mbiko wa du oni na kido kuti ga Mbori mokido ka zingisa kpikpi aboro, oni agundenga be kpio te. Na wa ini oni gupai nga, Mbori nga bakere iraome, oni agundenga be sunge abinza nga gu nakoda mangu, kpirä watadu ngua te.—Yoane 8:32.

9-11. Ada nika raka rogo Paradiso, na ada nika rakanga yo ya?

⁹ Ka oni mbedi na Mbori, oni agundenga be agu apai du kumbatayo te. A wa bi ani he, Ziazia Kekeapai aima fura tipa dungu gu kpakarakpakaraapai ani abihe areme auru kpotosende. Yekova nayaa fu rani wee, agi apai re gbua tipa guru regbo; ga Mbori Kindo nika sa gi kpotosende re ni paradiso bambeda kumbatayo.—Ruka 21:10, 11, 31; 23:43.

¹⁰ Kina agu aboro nambeda na Yekova na kini mangisunge fuko nika raka rogo Paradiso. Ziazia Kekeapai nayaa: “Bambiko fuo rago ngbutuko, gbegberẽ boro adú nga ho berewe te; ka mo vura wisiga ba ni sirisiri vurũ, ni adú nga ho te. Ono bayee aboro adía kumbo ringara, ki du na ngbarago tipa gu wenepia du kpaima.”—Atambuahe 37:10, 11.

¹¹ Agu aboro naka ni keretu ka i aidanga ka irisa gu ruru andiko nga ga Mbori ya, akpi nyeanye kindi. (2 ATesaroniko 1:8, 9) I adunga ti ni berewe te. I akoda tiyo kuti Satana na gako adaimona rogo nyenye kpio. (Yugoti 20:10, 14) Ono agu aboro nawirikapai tipa Yekova na kini mangisunge fuko, agbia bawene ngbarago rogo Paradiso auru kpotosende.

12. Ginipai Ziazia Kekeapai apehe tipa raka kumbatayo?

¹² Yekova na iiriwo ahe beko ni igiigihe fu agu aboro nakpinyemu ko! Oni binga agu apai Fugo ko agumbaha tipa raka rogo Paradiso nga ga kpotosende:

•   Ariahe sekpese tipa ka rihe: “Zende ahe [watadu riahe] zúku rogo ringara kpaima; si [adu] wó ri abaagangara yo.”—Atambuahe 72:16.

•   Wene abambu: “I adúdua abambu ki niraki rogo.”—Yesaya 65:21.

•   Wene asunge: “Gimi siasia aboro ará zezeredi tipa gbanga rago mbiko gu mangapai nga ga beyo. I amánga nga sunge gbua te.”—Yesaya 65:22, 23.

•   Akaza adunga te: “A nga boro kporo sa ayá, ‘Mi nawoka’ te.”—Yesaya 33:24.

•   Gbara adunga te: “Si du bangiri airavurari azá, tu airangbianga ki ha; terengeterenge aboro agúka wa ngbiimo, mirã kisikisi ngba boro abi bia ni ngbarago.”—Yesaya 35:5, 6.

•   Aima, rungo, na kpio adunga te: “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”—Yugoti 21:4.

•   Vura adunga te: “[Mbori] namanga pai, vura nyasi digida kpotosende no.”—Atambuahe 46:9.

•   Nyenye unga: “Ruru aboro adía kumbo ringara, ki nye anye kindi.”—Atambuahe 37:29.

13. Kina gini boro sa rengbe ka sa gi kpotosende re ni paradiso, na tipagine rengbe ni ka mangaha ti ni?

¹³ Aboro arengbanga ka manga ngbatunga agu apai re te, ono Yekova tigako na ome beko ka manga agu apai dunduko ya ko ko nika mangaha. Anga pai ho rengbe ka rugusa ko ti gupai ko aida ka mangaha te. Ziazia Kekeapai nayaa: “A nga ga Mbori pai ho sa ka zanga tandu te.”—Ruka 1:37.

14. Wai rengbe oni ka kura ku ngba gu gene nika ndu na oni sa nyenye unga?

¹⁴ Rogo gako aDezire yo, Yekova nafu mamu fu aboro rogo arago dunduko i “rími rogo pangipangi ngbadimo” na kini ndu nunguro ngba gu gene nika ndu na yo sa nyenye unga. Oni rengbenga arengba kadu dagba agu aboro ngbarago ima idapa gu yambahe re. Oni manginga ndikidi pambori na ki gbia ga Yekova maku nyeanye kindi!—Matayo 7:13, 14.