1. Kuti Fugo Mbori, gini angbatunga pambori duho gbua kina ue?

 YESU ayaa: “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo. Bambiko gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.” (Matayo 7:13, 14) Kuti Fugo Mbori, angbatunga pambori ho gbua kina ue: gu sa nga ndikidihe, duni ruruhe, nandu na boro sa unga; gu kuraha tigaha nga ziree he, duni irairaha, nandu na boro sa kpio.

2. Wai Ziazia Kekeapai ayugo gupai nga, anga apambori dunduko ngbaa ti Mbori te?

² Gu kura aboro naberã ya apambori dunduko ngba angba ti Mbori. Agu averesi nga ga Ziazia Kekeapai naye re nayugo gupai nga, gipai re nga ziree:

•   “Awiri aYisaraere ki mangi gu pai berewe nadu ni gbigbita ha bangiri Yekova, ki nimangi pa aBara, na Asetorete, na pa ga aSurio ambori, na ga aSidono ambori, na ga aMoabo ambori, na ga aAmono ambori, na ga aFereseto ambori. I ki mbu Yekova ka i amanga nga pako ya. Ga Yekova zinga ki rungudi kuti aYisaraere.” (Abasapungbanga 10:6, 7) Kangia ani nairiso sesekpiahe watadu kura mbori kia angianga ndikidi Mbori ya, Yekova idinga na gaani pai te.

•   “Agi aboro re i nairisa re [Mbori] kina ngbayo yo, ono kpotoyo yo ti re tuturũ; ono i nauda re auda vurũ, niyugu gayo apai nga kina ga aboro rugute.” (Marako 7:6, 7) Kangia agu aboro nayaa i nairiso Mbori nayugo kina gayo aberã fu aboro kuba yugo gupai du rogo Ziazia Kekeapai, gayo irisombori na wiri undo ti ni te. Mbori aidanga nani te.

•   “Mbori nga Toro; agu yo nairisa ko i ka irisa ko ni toro na rengo.” (Yoane 4:24) Si naida gaani irisombori du na ngbanyaa kuti gu rengo du rogo Fugo Mbori.

3. Gine nga gene sa dagba agu akuraha tipa ka kpara ndikidi pambori ti zirehe?

³ Wai rengbe ani ka ino singia ngba gu pambori angba ti Mbori ani afura tipaha watadu si angbanga tiko te? Yesu ayaa: “Ka wene ngua zu nga gbegberẽ rinde te, ka gbegberẽ ngua zu nga wene rinde te. . . . Were, oni aína yo ti zuzuyo.” Ka pehe rogo kura afugo, kangia gu pambori ani afura tipaha yehe yo du Mbori ni, si azuka wene rinde, ka singia yehe be Satana, si azuka gbegbere rinde.—Matayo 7:15-20.

4. Gini sino airisi Yekova ayugoho?

⁴ Ndikidi pambori nasa agu aboro namangaha i duna nyemuse dagbayo na kini kpinyemu kura aboro. Gipai re wo mbiko Yekova nitiko nga Mbori nyemuse. Yesu ayaa: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” Ya mo apambori namanga agi arugute du tipa ndikidi irisombori re?—Yoane 13:35; Ruka 10:27; 1 Yoane 4:8.

5. Wai buku sa aringbisapa baga aboro Afirika ni akanga?

⁵ Oni wisiginga gu sunge baga aboro Afirika ni akanga i amangihe. Gu buku nga, The New Encyclopædia Britannica nayaa: “Gu sunge ngbe aboro na kini bagi yo ni akanga i ayambaha nga, the Islāmic trans-Saharan and Indian Ocean angbe aboro Afirika bangeyo adu mbembedii kuti 18,000,000 natona rogo gu garã nangia 650 ki da kurogo 1905. Rogo gu ue bebere agu agarã nangia ga 1400, aboro Putu atona sunge bagaahe kini pe ngba gango Afirika ku dioyo. Na bara ti gu garã nangia 1867 aboro Afirika bangeyo adu wa 7,000,000 watadu wa 10,000,000 i aga na yo ni akanga kurogo agu aringara nga ga Amerika.”

6. Wai pambori afu bee rogo baga aboro ni akanga?

⁶ Ginipai pambori amangihe ti regbo gi gberango naamanga rogo Afirika re ho i arogodi akumba ni, adee, na agude kusayo kpuyo yo na be gayo aborokporo ki vodi yo ni azogbo,  kini diko anamba tiyo na fofoi amarã tipa aira yo rengbe ka ino yo ti ni na kita ngbe yo kini bagi yo fu kura aboro si kidu wa abagara nangia yo? Kumba du rimoko nga Bethwell Ogot akepai rogo gu waraga pangbangaa nga, the Daily Nation of Nairobi, Kenya yo ki yaa: ‘Wa du yo tibarayo ue, nga aboro gu pambori nga ga aKristano na aboro gu pambori nga ga aMasarami nayugo gupai rogo gayo apambori nga, ngbatunga aboro dunduko du kina sa, wa si avura du wo, i tibarayo ue asigira gu riko nga ga agu aboro naida akanga naamangasunge fuyo na kini sogo agu aboro du rangi kpotoyo kia ti gayo. Agu apai aMasarami gbiakuti aKristano amangihe, gu aboro Putu gbiakuti aboro Amerika amangihe, gu aboro Asia amangihe, adu nikere ingapai na kingia gu zanga rugatinapai nasa aboro i rungosi aboro Afirika tipa dungu akama agarã.’

7. Ginipai abarumbatayo rogo pambori amangihe ti regbo vura?

⁷ Zire pambori ayugu gbegbere zuzuhe rogo kura agene. Nikpiapai, wa Ziazia Kekeapai avura niyaa “mo nikpí nyemu kuaro,” abarumbatayo rogo pambori rogo zegino dunduko asongodi avura zaaza na kini uruguhe kumbatayo.—Matayo 22:39.

8. (a) Wai abarumbatayo rogo pambori angarasi aboro i imi akurayo rogo agu avura namangi rogo Afirika? (b) Ginipai pasita sa agumbaha tipa abarumbatayo rogo pambori ti regbo gu vura nadu dagba aboro-ringara nisayo Nigeria yo?

⁸ Si ni gupai aboro naima ino pai tipaha wenengai nga, rogo 1994, bete anarani nga ga akatoriko yo gbiati abavugahe rogo gu kanisa re akodi beyo ka imo aboro Rwanda yo. Pambori amangi kura banaru apai rogo agu avura nga ga aboro Afirika. Nikpiapai, ti regbo gu vura nadu dagba aboro-ringara nisayo Nigeria yo nga gu i aimi aboro rogoho gbe, aboro pambori angarasi gayo aboro i sovura, na aguyo nadu kubani amangi kinawo a. Wa gu vura re aandu kumbatayo kindi, pasita  sa ayaa abarumbatayo nga ga kanisa yo ima “mbu gu sunge Mbori afuhe fuyo.” Ko agumba gupai berewe nga: “Agu rani nayaa tipa tirani wee ani nga ga Mbori abamangisunge, ani ima sa tirani niga Satana abamangisunge.”

9. Ginipai Ziazia Kekeapai agumbaha tipa abamangisunge nga ga Satana yo?

⁹ Ziazia Kekeapai nagumba dungu apai wa kina gure: “Satana a nambakada tiko ni maraika imarago. A nga bakere pai tie [ngaha te], ka gako amoyambu mbakadi tiyo a ni amoyambu rurupai.” (2 AKorindo 11:14, 15) A wa dungu gbegbere aboro abirika ya wene sino aboro nga yo, kinawo a Satana abirika aboro na agu abamangisunge nga ga pambori yo i mangi tiyo wa ruru aboro ono gayo mangimangiapai nigbegberehe na du zuzuhe a nigbegberehe.

10. Rogo gini gene abarumbatayo rogo pambori nagindigo Mbori?

¹⁰ Rogo zegino dunduko, abarumbatayo rogo pambori aima digo nitungusipa nyemuse, pazereda, pa weneringise, ono gu i naamangaha nga sogote, sovura, na gu kura mangimangiapai adunga sino Mbori rogoho ya. Ziazia Kekeapai naringbisa payo wenengai niyaa: “Ya yo auru ngbayo i ini Mbori; ono i naora rimoko ti gayo mangaapai.”—Tito 1:16.

11. Wai Ziazia Kekeapai aringbisapa zire pambori?

¹¹ Ani rengbe ka bi gupai Yekova aberãha tipa zire pambori nigeda ani gu buku nga ga Ziazia kekeapai nga Yugoti. Yo i aringbisapa zire pambori ni nigu dee nga ‘Bakere Babera’ nga gu narukuba kurapai. (Yugoti 17:5) Oni kparia wai Mbori aringbisa pari:

•   Ri nga “gu debari . . . abakindo zegino amangi bari na ri.” (Yugoti 17:1, 2) Kuba gupai nga si du niruruhe fu Mbori, zire pambori arimisi tihe kurogo agu apai nga ga birĩ zogarago, kini pe gupai dedede fu abazogo si aida i mangihe.

•   “I abi kure anebi rogo ho yo na kure ga Mbori aboro, na ga agu yo dunduko i aimi yo auru kpotosende.” (Yugoti 18:24) Zire pambori arungosi ga Mbori ruru amoyambu na ki iimi yo na kurii gure, pakpio gu dungu aboro nakpiki rogo avura, si kuvuru behe.

•   “Ri aabia tiri ki nibagi gari ũkumuko ni pa bakere wasiro.” (Yugoti 18:7) Zire pambori na dungu akumuko behe, nga gu gaha abarumbatayo amangasunge nani tipa kaa raka rogo kumu.

•   “[Ri] anangi arikaaboro dunduko ni ga[ri] soroka.” (Yugoti 18:23) Nigu gari zire yugopai nga mbisimo akpinga te, zire pambori azaki gene fu ngbatunga sangbaatoro dunduko na fu manga ngua na ki sa aboro rogo dungu aba i naagunde be kpikpi aboro na kini ngarasi yo i naairiso atitayo.

12. Gini zahe Ziazia Kekeapai afuhe tipa zire pambori?

¹² Ninyanyaki zahe fu aboro tipa i kuru kusayo rogo zire pambori, Ziazia Kekeapai nayaa: “Oni kúru yo du ri ni, gimi aboro, ka gaoni ngbanya dú nga na gari ingaapai ya, oni ka dia gari gberãngbi.”—Yugoti 18:4, 5.

13. Ginipai nika manga tipa zire pambori na agu aboro namangaha?

¹³ Bambeda kumbatayo, i nika gbarasa Bakere Babera kusayo naabaha, nga ngbii zire pambori. Ziazia Kekeapai nayaa: “Gari rungosi adá . . . rogo uru sa, kpio na rungo, na gberãngbi, i azókoda ri ni we dunduko; bambiko tandu ti Gbia Mbori [gbe], nga gu ko nasapu ngbanga ri.” (Yugoti 18:8) Ka ani aidanga ka zio papara gu gari agberangbii re ya, ani du wa ka ani mbu gu wiri rukutu apai dunduko du dagbarani na zire pambori, ka pai adunga tirani na gaha mangaapai, gaha apumbo, na gu gaha aida nga gu Mbori asogaha ya. Si naida ani mangi gipai re niipiipihe. Gaani raka ngbapai!—2 AKorindo 6:14-18.