1, 2. Rogo gini gene Yesu adu ni gu bangbembatayo du na tatamana?

MO Berẽnga gupai nga gu boro inipai tipa gbata wenengai ngbembatayo foro ka yugo bawene arago rogo bawene gbata foro. Gu gbata re ni vovoho foro na agu aboro du mo na yo, oni nadegaturoni kuti agu apai dunduko ni agumbaha. Wa oni andu, oni na bakere nyemu ka inopai tipa gu kura ahe du rogo gu gbata re oni ata bingoho ya. Ono tie, ho oni asana ni ni tipa agu arago re, ni akaraganga pai furoni te da kinaho wene regbo ka da ni, gbe ho oni nambedi ni ka bi gu rago re. Kusa, kina ngbaroni zere be gani tatamana, mbiko ni napido kina wene regbo tipa ka pe gupai furoni oni aida ka inopai tipaha.

² Gupai du tipa ndikidi aKristano wakina gupai du tipa agu aboro nata kaa biko arago re. Ani na nyemu ka inopai tipa gu bawene gbata nga “gu bakporo du na nyanyaki mburuhe” nga ga Mbori Kindo. (Eb. 11:10) Ho Yesu adu ni auru kpotosende, ko angbembatayo fu gako abawiriki, ka undo yo i rugutiyo na gu dudunguro inohe du tipa Kindo. Ya mo ko akaragapai kuti gayo asanahe dunduko na ki gumba agu apai fuyo dunduko du tipa Kindo bara sa? Oó. Ko aya: “Dungu apai du ngbare mi ka gumba fu roni, ka oni arengba nga na pa ha awere ya.” (Yo. 16:12) Ni du Yesu ni gu bangbembatayo du na tatamana, ko aambusanga gako abawiriki tipa i ini agu apai i aambakadanga tiyo tipaha ya te.

3, 4. (a) Wai du Yesu andu kumbatayo kindi kaa yugopai fu ruru aboro tipa ga Mbori Kindo? (b) Ginipai ani ka wisigopai tipaha rogo gi kapita re?

³ Yesu ape agu afugo du rogo Yoane 16:12 rogo gu yangara yuru ko adu auru kpotosende ane. Fuo kpioko, wai du ka ko arengbe ka yugopai fu ruru aboro tipa ga Mbori Kindo? Ko akido gako amokedi nga: “Gu Toro nga irarengo,. . . angbe fu roni mbata yo sa rengo dunduko.” * (Yo. 16:13) Ziazia toro wa gu bayugu rago du na zerangbaduse. Toro nga gu he Yesu amangasunge na ni tipa ka yugo agu apai dunduko apefuoko aida ka inoho tipa ga Mbori Kindo na ti gu regbo si aida i inihe ti ni.

⁴ Ani wisigingo pai tipa wai ga Yekova ziazia toro adigi ningbembatayo fu ruru aKristano sa gu bakere inohe du tipa Kindo. Ni bambatapai, ani nika wisigopai tipa wai ani ainihe nga ga Mbori Kindo ima tona zogarago. Fuani, ani ki wisigipai tipa abazogo Kindo na gayo amaabangirise gbiati agu aboro i nika zoga yo na gayo amaabangirise a. Ni yangaraha, ani nika bi wai  apefuo Kristo aye ka inopa agu apai si aidaha tipa ka du ni ruruse fu Kindo.

5, 6. (a) Gini iraira bipai Abawiriki Ziazia Kekeapai adu na ni tipa pa sigira Kindo gbiati regbo keahe? (b) Tipagine si aidanga gu ngbatunga iraira bipai re sarani ani tikö singia Yesu nangbembatayo nzunzu fu apefuoko ya?

⁵ A wa ani abihe rogo Kapita 2 nga ga gi buku re, tipa dungu agarã, Abawiriki Ziazia Kekeapai aima digo nifura tipa gu garã nga 1914 nga si nika ngia gu nyanyakipa garã nika digiso gu sangbanebi nga ga Baibiri. Ono tie, ti gu regbo re, i aberẽhe nga agu apai nayugo padu Kristo na ome Kindo beko atona rogo 1874, na ko ki tona zogarago ngbangbaturũ yo rogo 1878, na gu Kindo re nika sigiratihe nzunzu wenengai rogo Tanvuo 1914. I ape gupai nga regbo keahe nika tona rogo 1874 kuti 1914 na si ki digisitihe na pa dungura mbedimbedi aKristano ku ngbangbaturũ yo. Ya mo ngbatunga iraira aberãpai wa gere nasarani ani tikö singia Yesu aangbembatayo nzunzu fu gu ruru aboro re vurube ziazia toro?

⁶ Wagusa te! Oni berẽnga berewe kurii gaani kpiapai nidu ti tonatonaha. Ya mo agu aberãpai i adu na ni mbata gbiati gu nyemu asanahe naadu tiyo, arengbe ka sayo i tikö kuti gu boro naayugo arago fuyo? Wagusa te! Teketeke a, wa vura duhe nga kura aregbo kinaho ga Mbori aboro aˈasada ka rugatiyo na ga Mbori ringbisapai mbata fu ziazia toro ngbe fuyo kumbatayo sa gu ngbatunga arengo re, si kindi ziazia nga Yesu du nangbembatayo fuyo. Rogo gi gene re, ruru aboro na nyemu i ruguyo na i naumbasi tiyo ki mangi ariapai ti gayo biapai.—Yak. 4:6.

7. Gini aimarago nga ga toro ga Mbori aboro agbiaha?

⁷ Rogo agu agarã naatona rogo 1919, bakere imarago nga ga toro aima hasa rago kurii ga Mbori aboro. (Oni gedi Atambuahe 97:11.) Rogo 1925, nyanyakipa kekeapai akuru rogo Ngbaõbambu Sinziri riihe angia, “Pa Vunga Arikaaboro.” Si afu nyanyaki gopai rogo Baibiri yo nga, i asigira ga Masiya Kindo rogo 1914, na gure adigisi gu sangbanebi du tipa gu kpiapai du tipa ga Mbori dee naabatika gude ngbangbaturũ yo a wa duhe rogo Yugoti kapiti 12. * Gu kekeapai re ape kurapai nga, agu arungosiro na akpakarapai naaye kurii ga Mbori aboro vuru agu agarã nangia ga vura re angia gu kpiapai naayugoho nga i ima ba Satana ngbangbaturũ yo, ko na “bakere zinga, bambiko ko ini he ya kina bete rago nye fu ko.”—Yugo. 12:12.

8, 9. (a) Wai du pa nyakapa ga Mbori Kindo atona ka kura? (b) Gini asanahe ani ka wisigopai tipaha?

⁸ Wai du nyakipa Kindo? Rogo 1928, Ngbaõbambu Sinziri atona ka nyakasa gupai nga Kindo na nyanyakipaha kisusi pa ga boro bata vurube ga Yesu motumo. Nirengo, vurube ga Masiya Kindo du Yekova nika ziasi rimoko, ka dia gbarasarimo kusayo ti gako pagbia, na ki digisi gako aringbisapai dunduko tipa aboro.

⁹ Ada si adu nga i nika zogarago na Kristo rogo gu Kindo re? Ada si adu nga i nika ngia agu azogo nga ga gu Kindo re auru kpotosende? Na gini sunge si aaida apefuo Kristo nimangihe?

10. Ginipai ga Mbori aboro aima rugatiyo na ni tona bakuruyo tipa agu aboro du nga 144,000?

¹⁰ Dungu agarã mbata fu 1914, ndikidi aKristano aima rugatiyo na gupai nga ruru apefuo Kristo nga 144,000 nika zogarago na ko ngbangbaturũ yo. * Agu Abawiriki Ziazia Kekeapai re abi gupai nga kina boro ndikidi namba aboro du, na i atona sia agu aboro re tona rogo bambata sa kama agarã.

11. Wai du agu aboro du na maabangirise tipa ka da ni gu dee Kristo nika dia ri ainipa gu sunge du beyo auru kpotosende?

¹¹ Ono tie, gini sunge i afuhe fu agu aboro si adu nga i nika da ni papara gu dee Kristo nika diari auru kpotosende ane? I abi gupai nga Yesu aima nyakasapa sunge tungusapai na ki ringbisihe kuti regbo keahe. (Mt. 9:37; Yo. 4:35) A wa ani awisigihe rogo Kapita 2, tipa bete regbo, i aberẽhe tigayo nga gu regbo keahe re nika du tipa agarã 40 gbua, na si nika digo na pa dungura mbedimbedi aKristano ku ngbangbaturũ yo. Ono tie, mbiko wa sunge aandu kumbatayo kisusi agarã 40, si aaida i ziasi gayo giarogopai yo berewe. Awere ani ima inoho nga regbo keahe nga gu regbo du tipa kparaka rende ti morũ, nga mbedimbedi aKristano ti agu aboro naya i nga aKristano, gu regbo re atona rogo 1914. Regbo aima da tipa ka maaberãse fuo dungura gu yangara namba aboro naga ku ngbangbaturũ yo!

12, 13. Wai du ga Yesu kpiapai nga ga ngasu adee bawe na gu nga ga taranda nadigisi tihe rogo gi yangara arame re?

¹² Naatona rogo 1919 ka ndu kumbatayo, Kristo angbembatayo fu ruru kangara moyambu i nyakasipa sunge tungusapai. Kina gu bangisa sunge re a ko afuhe rogo bambata sa kama agarã. (Mt. 28:19, 20) Ko aima yugo gu sino a si nika ida mbedimbedi apefuoko du na ni tipa ka manga gu sunge re. Rogo gini gene? Rogo gu gako kpiapai nga ga ngasu adee, ko aya si naida mbedimbedi aKristano ningere angera kakaka rogo toro yo, ka i aida ka du na ko rogo gu pumbo diadee nika manga ngbangbaturũ yo, nga gu regbo Kristo nika kodatiko na ‘gu dee i afongo ri nika dia kumba’ nga gu mbedimbedi aKristano du bangeyo nga 144,000. (Yugo. 21:2) Fuani, rogo gu ga Yesu kpiapai nga ga ataranda, ko ayugu gupai nga mbedimbedi apefuoko nika manga gu sunge tungusapai ko nambuhe fuyo re kakaka.—Mt. 25:1-30.

 ¹³ Vuru gu kama agarã susi, mbedimbedi aKristano ima yugo na ni nga i anyomoronga te na i nangera angera kindi. Zanga kapa, i nika fu mosoro afu fuyo tipa wai i angera angera kindi! Ono tie, ya mo sunge keahe adu tipa kina dungura agu aboro nika zogorago na Kristo nga 144,000?

14, 15. Gini abadona aboro biama i asakipai tipa yo rogo gu buku nangia The Finished Mystery?

¹⁴ Ruru akumba na adee aima du na nyemu ka inopai tipa gu “bakere rimbasa aboro” (“ndurumo aboro,” King James Version) i nafura tipa yo rogo Yugoti 7:9-14. Si airiwongo te nga, mbata fu regbo da be Yesu ko yugu ada nga gu bakere badona aboro re, gu dungu apai i apekehe tipa gipai re aima du kia ti gu taata arengo ani nainipai tipaha na ki kpinyemuhe areme.

¹⁵ Rogo 1917, gu buku nga The Finished Mystery (Le Mystère Accompli) ape gupai nga “gu bata nga ga ngbangbaturũ na arikoho ue, na gu bata nika du auru kpotosende a na arikoho ue.” Gini badona aboro biama du naadu na agu amaabangirise nga ga bata re? Bambata yo nga agu boro nga 144,000, nika zogarago na Kristo. Ue yo nga bakere rimbasa aboro. Ti agu aregbo re, berãpai adu nga gu bakere rimbasa re nga agu aboro naya i nga aKristano ono du kindi rogo ziree apambori yo. Si adu nga i na kina bete idapase tiyo ono gu idapase re asanga yo i kakuti ruru mangaapai te. Sidu, i nika fu gu ba anyakanga paha ya fuyo ngbangbaturũ yo. Nibipa kpotosende, i aberẽhe nga gu biata badona nakoda gu “nyanyakipa aboro naadu mbata” wa gu ruru akumba nangia Abarayama, Moize, na gu kura aboro, i du nika du na pagbia kurii gu biama badona aboro, nga agu aboro nika du auru kpotosende ane.

16. Gini aimarago nga ga toro nahasi rago rogo 1923 na rogo 1932?

¹⁶ Wai du ziazia toro aundo apefuo Kristo i rugutiyo na gu giarogopaiyo ngba tirani areme? Si amangi yeeye vurube agu aimarago toro aakusaha ti mburu kuraha. Naatona rogo 1923, Ngbaõbambu Sinziri aima gbeberã aboro kuti gu badona aboro adu nga na maabangirise ku ngbangbaturũ yo ya ono nika raka tii ga Kristo zogarago auru kpotosende ane. Rogo 1932, Ngbaõbambu Sinziri asakipai tipa Yonadaba, naazi tiko kuti Bakindo Yeu nangia ga Mbori mbedimbedi boro ka songoda ko ko sovura kuti airisi kungbo ambori. (2 Aba. 10:15-17) Gu kekeapai re aya aboro kinaho du ti gi gaani regbo re wa Yonadaba, nga aguyo Yekova nika batasa yo “ti gu kpakarakpakara regbo nga ga Aramegido” i raki auru kpotosende ane.

17. (a) Rogo 1935, gini imarago nga ga toro nahasi rago? (b) Ginipai gi vovo giarogopaiyo nga ga bakere rimbasa re adu na ni kurii ruru aKristano? (Oni bi gu sanduki nga “ Ani Agbia Zereda Berãrani Yo.”)

¹⁷ Rogo 1935 imarago nga ga toro ahasi rago ni bakerehe. Ti regbo gu bakere dunguratise namangi Washington yo, i aye ka ino gupai nga, bakere rimbasa nga agu aboro nika raka auru kpotosende ane, kina yo du a nga gu kura akandoro du payo rogo ga Yesu sanza nga ga akandoro na ameme. (Mt. 25:33-40) Si adu nga  bakere rimbasa nika ngia “gu kura akandoro,” nga aguyo Yesu aya tipa yo wẽ: “Mi ayé aye na ami a.” (Yo. 10:16) Ho Wiriba Rutherford asanahe ni nga: “Ya mo agu aboro dunduko du na maabangirise tipa ka raka auru kpotosende rengbe ka ru kuari?” agu aboro naaru aima susa bebere agu aboro naadu pati gu bakere dunguratise re! Ko aya: “Oni ngere! Bakere rimbasa du re!” Rago aima ngba ti dungu aboro ka ino gayo maabangirise niyangaraha.

18. Wai du apefuo Kristo namoi berãyo kuti tungusapai, na sangbanaha nga gine?

¹⁸ Naatona ti gu regbo re, Kristo ima ngbembatayo fu gako aboro tipa ka gbeberãyo kuti dungura agu aboro du na maabangirise tipa ka da ni gu bakere rimbasa nika bata ni ungayo ti regbo bakere gberãngbi. Ti tonatonaha, si aangera wa agu aboro re angenga te. Ti kura regbo sa, Wiriba Rutherford aya: “Si nangera wa ‘bakere rimbasa’ akiongo berewe ti gere te.” Rengo ngaha nga, awere ani ima ino wai Yekova nafu maku ni bakerehe kurii gu sunge keahe naatona ti gu regbo re! Vurube gu ngbembatayo nga ga Yesu na ziazia toro, mbedimbedi aKristano gbiati agu awirinayo nga “kura akandoro” ima da kina wai Yesu afura tipa yo nga “rimbasara adú adu sa,” kini mangisunge sa tiibe ‘babanda akandoro sa.’

19. Wai du rengbe ani ka undo tipa bakere rimbasa nge kumbatayo?

¹⁹ Bakere rimbasa ruru aboro nika raka nyeanye kindi rogo paradizo auru kpotosende, nga gu Kristo na gako abadia zogarago nga 144,000 nikaa ngerakuriihe. Anga pa ngbarago ngaha ka berãkuriipa wai Kristo nangbembatayo fu gako aboro i girogo gu maabangirise du kumbatayo re te? Nairiwo gu momu du berani re nga ka pe gipai re fu agu aboro ani agbiayo gene tungusapai yo! Ani mangingo ome amanga a wa rẽ omerani na ni tipa bakere rimbasa nizugo kina kumbatayo, kaa ta ngbayo na taarimo fu Yekova!—Oni gedi Ruka 10:2.

20. Ga Satana riigbu nakoda gini ahe, na wai du si abipa ga Kristano du ni ruruse?

²⁰ Wa ga Mbori aboro aandu kindi kumbatayo kaa wirikapai tipa Kindo, si aaida i rugutiyo wenengai a na ginihe nga du ni ruruse fu gu zogarago du ngbangbaturũ yo. Nibi gipai re, rogo 1922, Ngbaõbambu Sinziri ape gupai nga ariigbu ho ue namangasunge, ga Yekova na ga Satana, ga Satana nakoda ababagaahe, apambori, na aboro poritiki. Agu aboro du niruru yo fu ga Mbori Kindo tiibe Kristo du wa ka i banda padu niruru yo ki zanga rimiso tiyo dudunguro ku rogo papara ga Satana riigbu. (2 Kor. 6:17) Rogo gupai yo re nga gine?

21. (a) Wai du ruru kangara moyambu naza ga Mbori aboro tipa kikindigi ababagaahe? (b) Rogo 1963, ginipai Ngbaõbambu Sinziri apehe tipa ‘Bakere Babera’?

²¹ Gu riahe nga ga toro naye be ruru kangara moyambu ima kusa agu abiriki du rogo kikindigi ababagaahe na si ima za ga Mbori aboro ti rimiso tiyo ku rogo bakere nyemu aũzegino. (Mt. 6:24) Wakina gure a, gaani awaraga ima gbeberã rani kuti gu papara ga Satana riigbu nga apambori. Rogo 1963, Ngbaõbambu Sinziri apepai gbaiga nga, anga kina agu apambori naya si nga ga  aKristano sa nga ‘Bakere Babera’ te, ono ziree apambori ngba arikoho dũ rogo zegino. Rogo gi gene re, a wa ani ka bihe rogo Kapita 10 nga ga gi buku re, i ima undo ga Mbori aboro rogo arago dunduko i “kúru yo du ri ni,” ki girisi tiyo ti gu mangaapai nga ga ziree apambori.—Yugo. 18:2, 4.

22. Ti regbo gu Bambata Vura Nga ga Zegino, wai du dungu ga Mbori aboro agirogo gu rugute yo du rogo ARomo 13:1?

²² Ginipai tie du tipa gu ga Satana papara riigbu nga poritiki? Ya mo si naida ndikidi aKristano rimisi tiyo ku rogo avura na gu tagbagaapai nga ga rikaaboro? Ti regbo gu Bambata Vura Nga ga Zegino, Abawiriki Ziazia Kekeapai aima rugatiyo na ni nga si aidanga apefuo Kristo imi boro te. (Mt. 26:52) Ono tie, tipa dungu awirina, gu rugute du rogo ARomo 13:1 tipa giasangba “abaira tandu,” i agirogoyo nga i ima rengba ka da ni asekere, ka vo roko asekere, na ka tinda bundu; ono tie, ho daha ni nga i imi avura yo, si naida i ba bundu ku wege yo.

23, 24. Gaani giarogopaiyo angia gine tipa ARomo 13:1 ti regbo gu Ue Vura Nga ga Zegino, na gini wene giarogopaiyo apefuo Kristo agbiaha?

²³ Ho Ue Vura Nga ga Zegino atona ni rogo 1939, Ngbaõbambu Sinziri asakipai dudunguro tipa kparatise kusayo ti agu apai nga ga poritiki. Gu kekeapai re apehe ziazia nga si aidanga aKristano rimisi tiyo ku rogo agu avura na agu atagbaga apai nga ga agu aboro du rogo ga Satana zegino te. Gu rugute re aye kina boro ti regboho! Apefuo Kristo adu ni bandabanda yo be gu bape kure naadu kurii rikaaboro ti regbo gu vura re. Ono tie, naatona rogo 1929, gaani awaraga anaaya agu abaira tandu du rogo ARomo 13:1, i nga abazogo te, ono aYekova na Yesu. Gayo giarogopaiyo aaida i kpuruwaha.

 ²⁴ Ziazia toro angbembatayo fu apefuo Kristo tipa gipai re rogo 1962, ho nyanyakipa kekeapai asakipai ni tipa ARomo 13:1-7 rogo gu Ngbaõbambu Sinziri nangia ga Ngbangba 15 na Banduru 1. Niyangaraha, ga Mbori aboro arugutiyo na pa gu ra fu abaira tandu Yesu apehe nga: “Agu ahe nga ga Kaisara oni fú kina ha fu Kaisara, agu ahe nga ga Mbori oni fú kina ha fu Mbori.” (Rk. 20:25) Ndikidi aKristano ima rugatiyo na ni awere nga abaira tandu nga agu abazogo nga ga zegino yo na si naida aKristano ni irisiyo airisa. Ono tie, gu ranigose re ku gene. Ho agbia-ngbii asana rani ni ani basasangba Mbori, ani nakaragapai wa gu amokedi akaragaha nga: “Ani gi nga sangba Mbori agia susi ga aboro.” (Amo. 5:29) Rogo Kapita 13 na 14 nga ga gi buku re, ani nika wirikapai ni bakere tipa wai ga Mbori aboro namangisunge na gu rugute nga ga zanga rimiso tise ku rogo agu atagbagapai nga ga zegino.

25. Tipagine mo abi gu ngbembatayo nga ga ziazia toro ti ni na nyanyakipaha tipa ka rugutiro na ga Mbori Kindo?

²⁵ Oni berẽnga kurii agu apai dunduko i nayuguhe fu apefuo Kristo vuru gu sa kama agarã susi re. Ani ima wirikapai tipa gu regbo i asigira ga Mbori Kindo ti ni ngbangbaturũ yo na wai nyakipaha. Ani ima inopai tipa agu amaabangirise ue du tipa ruru aboro, aguyo naga ku ngbangbaturũ yo na aguyo nika nye auru kpotosende ane. Na ani ima ino wai ka yugo gaani padu ni ruruse fu ga Mbori Kindo, na ti kina gu regbo re kini yugu ranigose ku gene fu agbia-ngbii a. Mo sananga tiro nga, ‘Ya mo ka mi arengbe ka ino agi arengo re ka si adu nga Yesu Kristo aangbenga mbatayo fu ruru kangara moyambu auru kpotosende i girogoyo na kini yuguhe te?’ Nairiwo gu maku du ani na ni nga Kristo gbiati ziazia toro ningbe furani kumbatayo re!