1-3. Ginipai Yesu amangihe ho ko abi gupai ni nga i nabirikosi yekaru?

YESU aima du na bakere irisa tipa gu yekaru naadu Yerusarema yo mbiko ko aima ino gupai si aarukubaha. Tipa gbanga regbo, gu yekaru re angia gu ba nga ga ndikidi irisombori auru kpotosende. Ono si aaida iriso Yekova du ni ziaziaha na ni gigirihe. Oni berẽnga pa gu gberãrago Yesu adu na ni ho ko aye ni ku yekaru yo rogo Nisani 10, 33 Fuo Batikayo Kristo na ki bi gupai nga i nabirikosi he. Ginipai naamanga yo?—Oni gedi Matayo 21:12, 13.

² Rogo gu vurukporo nangia ga aGendiria, angbuangbu ababagiahe gbiati abaundaamarã anaadĩ agu airisimbori nanaaye ka fu gayo motumo fu Yekova. * Yesu ‘abafu aguyo ku zegiyo dunduko nanababaga ahe na aguyo nanangbeka ahe yekaru yo, ki vavagadi ga abaundaamarã ambisa.’ (Oni ringbisinga ha na Nemaya 13:7-9.) Ko azingi kuti agu airagbangbati re tipa aria ga Bako bambu “ni yaro abatuka.” Rogo gi gene re, Yesu ayugu gako irisa tipa yekaru na gupai si arukubaha. Gu iriso nga ga Bako du wa ka si du ni gigirihe!

³ Kama agarã kusa, fuo i moi Yesu ni Bakindo gu Kindo nga ga Masiya, ko agirisi yekaru berewe nga gu nakoda agu aboro dunduko areme naida ka iriso Yekova ngba ruru gene. Gini yekaru du ko agirisi he?

4, 5. (a) Wai du i akpuruwa mbedimbedi apefuo Yesu na ki girisiyo rogo 1914 ka da kuti tonatona 1919? (b) Ya mo gure angia digido kpuruwa ga Mbori aboro na ka giriso yo? Oni sakingo rogoyo.

⁴ A wa ani abihe rogo Kapita 2 nga ga gi buku re, fuo i moi Yesu ni Bakindo rogo 1914, ko aye na Bako tipa ka wisigo gu Yekaru nga ga toro nga gu mbakadapai du tipa ziazia irisombori. * Ni sangbana gu wisigo he re, Bakindo abi gupai nga mbedimbedi aKristano nga “awiri Revi,” naida i kpuruwa yo na ki girisi yo. (Mara. 3:1-3) Naatona rogo 1914 kuti tonatona 1919, Bagirisi ahe nga Yekova, ambu gako aboro i susi rogo aˈasada ngba arikoho ni bakiakia gbiati agu akpakarapai naakpuruwa yo na ki girisiyo. Si nafu kina ngbarago tie nga, gu mbedimbedi aKristano re akuru rogo gu kere aˈasada re ni gigiri yo, na kidu zaaza tipa ka songoda ga Masiya Kindo!

⁵ Ya mo gure nangia digido kpuruwa ga Mbori aboro na ka giriso yo? Oó. Vuru yangara arame yo naabaha, Yekova nandu  kumbatayo kindi kaa undo apefuo Yesu vurube gu Kindo nga ga Masiya i du ni gigiri yo tipa wa ka i nye rogo gu yekaru nga ga toro. Rogo agu akapita ue ngbefuo gere, ani nika bi wai ko nakpuruwa gayo mangaapai na gayo riigbu. Ni bambataha tie, ani furanga tipa gu girisohe nga ga toro. Wisigo gupai Yesu amangihe gbaiga tipa ka undo apefuoko i du gigiri rogo toro yo gbiati agu ko amangihe zanga aboro inipai tipaha nanyakasa gaani idapase.

6. Wai du ga Yekova zinahe fu agu aYudo i aga nayo ku Babera yo aundo rani ani ini gupai girisotise rogo toro yo akodaha?

⁶ Ginihe nga girisotise rogo toro yo? Tipa ka karagapai kuti gu sanahe re, ani wisigingo agu afugo Yekova agumbaha fu aYudo ho i aambeda ni ka gauri Babera yo rogo sita kama agarã M.B.K. (Oni gedi Yesaya 52:11.) Gu bambatapai agu aYudo re aaga ti ni ku Yerusarema yo angia ka dua yekaru na ka karaga ndikidi irisombori kubaha. (Eza. 1:2-4) Yekova aaidanga gako aboro ga na gu ngbatunga ziree airisombori naadu Babera yo te. Oni kparia gupai nga ko afu azinahe fuyo timburu kuraha: “Ka oni zádi nga birikobiriko he wa sa ya” “oni kúru yo,” na “oni gírisi tironi.” Si aidanga gu ziazia irisombori nga ga Yekova du ni birikosibirikosihe be ziree irisombori te. Gini digisopai tie rengbe ani kada kutini? Girisotise rogo toro yo nakoda bandatise ti agu ayugopai na mangaapai nga ga ziree pambori.

7. Da Yesu amangasunge na ni tipa ni undo apefuoko i du gigiri rogo toro yo?

⁷ Ngbutuko fuo i moi Yesu ni Bakindo, ko amoi gu mbakadapai du gbaiga nga gu ko naundo apefuoko vuru behe i du gigiri rogo toro yo. Gu mbakadapai re nga gu ruru kangara moyambu Kristo asia ni rogo 1919. (Mt. 24:45) Bara rogo gu garã re, abawiriki Ziazia Kekeapai aima giriso tiyo be dungu agu ayugopai nga ga ziree pambori. Wa si avura duwo, si aaida i girisiyo berewe ni bakerehe rogo toro yo. Vurube ga Kristo ruru kangara moyambu, ko atona ka yugopai yeeye fu apefuoko tipa agu aˈuru ongoda aboro aairiso ho gbiati gu kura mangaapai si aaida i mbuhe. (Snz. 4:18) Ani wisigingo pai awere tipa betehe.

8. Ginipai Abawiriki Ziazia Kekeapai aima inoho bakuru kusayo tipa Krisimasi, ono wasi avura duwo, ginihe i aabingo ho ya?

⁸ Abawiriki Ziazia Kekeapai aima inoho bakuru kusayo nga mburu Krisimasi aenge ti apagano na i aavunganga Yesu rogo Banduru 25 te. Gu magazini (Zion’s Watch Tower) nangia ga Banduru 1881 aya: “I aye na amirioni aboro nangia apagano ku rogo kanisa. Ono i amangi ariapai kina rogo rimo yo gbua, mbiko apasita apagano ada ni agu apasita nga ga akristano yo na agu aˈuru ongoda nangia ga apagano i afu gu rimo nga ga akristano kuriihe—Krisimasi nga uru ongoda sa dagbaha yo.” Rogo 1883, Ngbaõbambu Sinziri asakipai tii gu riipai nangia “Gini Regbo I Abatika Yesu Ti Ni?” si aya i abatika Yesu bara  ti tonatona Tanvuo. * Wa si avura du wo, Abawiriki Ziazia Kekeapai aabingo ho nga si naida i mbu iriso Krisimasi te. Zavura agu aboro Betere nga ga Brooklyn yo i anaamangaha amanga a. Ono tie, tingbafuo gu garã nangia 1926, apai atona ka ariatihe. Tipagine?

9. Ginipai Abawiriki Ziazia Kekeapai aye ka inoho tipa Krisimasi?

⁹ Pa wisigo Abawiriki Ziazia Kekeapai gipai re sirisiri asayo i ye ka rugatiyo na ni nga mburu Krisimasi na gu mangaapai du rogoho afunga irisa nzunzu fu Mbori te. Gu magazini nangia The Golden Age [Awake!] nga ga Banduru 14, 1927 adu na kekeapai rogoho riihe adu tipa mburu Krisimasi aya, Krisimasi nga gu pumbo nga ga apagano naperesa kina pa ngbarago gbiati irisokpiahe. Gu kekeapai re afura gbaiga nga, anga Kristo naaya i nimangihe te na si adigisihe na agu afugo tipa Krisimasi nga: “Gu rengo nga, zegino, bororani, gbiati Bakitingbanga nasongoda pa iriso gu uru re, nga gu yangarapai sarani ani dakuti gupai nga si arẽnga fu agu aboro kpara gayo raka fu Yekova i irisihe te.” Si airiwongo te nga, agu aborokporo nga ga Betere yo aairisongo Krisimasi rogo Banduru rogo gu garã re te—na berewe a te!

10. (a) Gini kura apai naaye ka kura ku yangura tipa Krisimasi rogo Banduru 1928? (Oni bi gu sanduki a nga ““ Krisimasi pa Engaha, na Ndu Mangaha.”) (b) Wai du i aundo ga Mbori aboro i inipai tipa gu kura aˈuru ongoda na airiso nga gu si aaida i mbuhe? (Oni bi gu sanduki a nga “ Kusa Kuraapai Tipa Aˈuru Ongoda na Apumbo ku Yangura.”)

¹⁰ Rogo gu garã nangbefuo gure, Abawiriki Ziazia Kekeapai aini dungu apai berewe tipa Krisimasi. Rogo Banduru 12, 1928, Wiriba Richard Barber, naadu dagba agu awirina nga ga rii-basunge yo, amangi gumbapai rogo radio nakusi gu gbegberẽ mangaapai du tipa gu uru-ongoda re. Ginipai ga Mbori aboro  amangihe kuti gu ziazia rugapai naaye be rii-basunge re? Wiriba Charles Brandlein natingida pa gu regbo ko na diako ambu manga Krisimasi ti ni niya: “Ya mo rago agberẽ tirani tipa mbu agu apai nga ga apagano re? Wagusa te! . . . Si adu wakina ura bibiriko roko na ki baha kusayo.” Wiriba Henry Cantwell, naada kusa ni babi adungurati aya: “Ani adu na ngbarago nga ani mbu gu kura apai tipa ka yugo gaani nyemuse fu Yekova.” Ruru apefuo Yesu aima du na nyemu ka manga agu ariapai si aaidaha, na i aaidanga ka kodatiyo berewe na gu pumbo mburuhe aenge ti bibiriko irisombori te. *—Yo. 15:19; 17:14.

11. Wai du rengbe ani ka songoda gu Bakindo nga Masiya?

¹¹ Nairiwo gu wene kpiapai gu ruru Abawiriki Ziazia Kekeapai re amoihe furani! Wisigo gayo kpiapai rengbe ka sarani ani sana tirani nga: ‘Wai du mi naabi agu arugapai naye be ruru kangara moyambu? Ya mo mi nadia gupai kugume mi awirikaha na ngbarago na kini mangipai kutini?’ Ka ani du na nyemu ka giasangba, gure nga ani nasongoda gu Bakindo nga Masiya namangasunge na kangara moyambu i nifu riahe ti regboho.—Amo. 16:4, 5.

12. Tipa dungu agarã, wai du Abawiriki Ziazia Kekeapai aabi kuruse?

¹² Tipa dungu agarã, Abawiriki Ziazia Kekeapai aabi kuruse ni gu kpiahe rẽarẽ na gu pambori nga ga aKristano. Ono i aabingo ho nga si naida i irisihe airiso te, mbiko i aima inoho nga gbegberẽpai du nga ka irisokpiahe. (1 Kor. 10:14; 1 Yo. 5:21) Bara rogo tonatona 1883, Ngbaõbambu Sinziri  aima gumbaha gbaiga nga “irisokpiahe nga gbegberẽpai bangiri Mbori.” Ono wa si avura duwo, ti tonatonaha, Abawiriki Ziazia Kekeapai aabihe nga rẽhe arẽ ka mangasunge na kuruse. Ni kpiapai, i anidu na ngbarago ka vo karte naadu na kpakpari bakindo na kuruse rogoho tipa i ini yo ti ni. Tipa yo tigayo, i anaabihe nga si nayugo gupai nga ka i nye niruru yo dati kpio, i nika gbia kpakpari unga. Ti tonatona 1891, gu kpakpari bakindo naadu na kuruse ti ni re akuru ti Ngbaõbambu Sinziri.

13. Gini imarago apefuo Kristo aye ka gbiaha tipa mangasunge na kuruse? (Oni bi gu sanduki a nga “ We Atona ka Kii Yeeye Kuriipa Mangasunge na Kuruse.”)

¹³ Rago aima ngba ti Abawiriki Ziazia Kekeapai na gi gayo karte re. Ono tie, tona bara ti digido agu agarã naatona rogo 1920, apefuo Kristo atona ka ino dungu apai tipa mangasunge na kuruse. Wiriba Grant Suiter namangisunge kusa rogo Riigbu Bipasunge natingidapa gu bakere dunguratise namangi rogo 1928 rogo gu gbata nga Detroit, Michigan, Amerika yo nga: “Ti regbo gu bakere dunguratise re, i ayuguhe nga gu kpakpari bakindo du na kuruse ti ni re sunge ti ni te na si ni gbegberẽhe.” Rogo agu agarã nangbefuo ho, dungu apai atona ka kura tipa kuruse. Si adu ziazia nga ba ho tipa kuruse rogo gu irisombori du ni ziaziaha na ni gigirihe rogo toro yo te.

14. Ginipai ga Mbori aboro amangihe tipa gu we naatona ka kii yeeye tipa kuruse?

¹⁴ Ginipai ga Mbori aboro amangihe tipa gu we naatona ka kii yeeye tipa kuruse re? Ya mo i akakuti ni mbiko wa si aima ngbatiyo gbe? Wirinarani nga Lela Roberts niima iriso Yekova tipa gbanga regbo aya, “Ani ambuhe nibasa fuo ino ani guhe si aarukubaha.” Gu kura ruru wirinarani nga Ursula Serenco, ape gu bipai naadu ti dungu aboro ki ya: “Ani aye ka bihe nga gu kpiahe naangba angba tirani gbe re watadu ani aabihe nga si narukuba kpio gaani Gbia na padu ani niruru rani nga aKristano angia gu kpiahe nga ga apagano. Ringbisihe kuti Asanza 4:18, ani adu na ngbarago nga imarago ima tona ka hasa rago kurirani.” Ruru apefuo Kristo aaidanga ka kodatiyo ku rogo gu mangaapai nga ga ziree pambori te!

15, 16. Wai du rengbe ani ka yugoho nga ani ima diaberã tipa ka sa ga Yekova yekaru nga ga toro auru kpotosende ane ni gigirihe?

¹⁵ Kina gu bangisapai re du tipa rani areme. Ani ima inoho nga Kristo namangasunge na ruru kangara moyambu tipa ka aundo gako aboro i du gigiri rogo toro yo. Sidu, ho gu riahe nga ga toro ani agbiaha atingida rani ni na pa aˈuru iriso, mangaapai, watadu agu asino du ni bibirikoho be ziree pambori, si naida ani degeturani kuti ni na ki mbuhe nibasa. A wa si adu tipa agu awirinarani naraki ti tonatona gu regbo naayugo padu Kristo na ome kindo beko, si naida ani mangi ome ka banda gu ga Yekova yekaru nga ga toro si du ni gigirihe.

¹⁶ Vuru yangara arame yo naabaha, Kristo aima digo nimangi agu pai ani abingo ho ya tipa ka banda adungurati be agu aboro rengbe ka birikosihe rogo toro yo. Wai du ko namangi gipai re? Ani bingo ho.

17, 18. Rogo gu kpiapai nga ga pio atĩo, ginipai (a) rẽ pio atĩo ime yo ayugoho, (b) ‘zio ngbatunga atĩo dunduko,’ (d) rogoda “wene atĩo ku pere yo,” na (e) ‘bafa’ gbegberẽ atĩo kusayo?

¹⁷ Bakindo Yesu Kristo nabanda agu adungurati nga ga ga Mbori aboro rogo zegino dunduko. Kristo gbiati amaraika aima digo nikparaka aboro ngba gu gene ani arengbanga ka inoho ya. Yesu aringbisipa gu sunge re rogo gu gako kpiapai nga ga pio atĩo. (Oni gedi Matayo 13:47-50.) Ginipai gu kpiapai re aida ka yugoho?

¹⁸ Ba ‘pio atĩo, ku baime yo.’ Gu pio atĩo re narukuba gu sunge tungusapa Kindo nga gu namanga rogo gu baime nga aboro. ‘Zio ngbatunga atĩo dunduko.’ Wene pangbanga nangba ti ngbatunga aboro dunduko—aguyo namanga diandue tipa kada ni aKristano, kodihe na aguyo rengbe ka du na nyemupai ono ka i amanganga diandue tipa ndikidi irisombori ya. * Rogoda ‘wene atĩo ku pere yo.’ I nadungura ruru ngbadu aboro yo ku rogo pere nga dungurati, ku rogo gu ba rengbe yo kafu gigiri iriso rogoho fu Yekova. Bafa ‘gbegberẽ’ atĩo kusayo. Vuru yangara arame yo naabaha, Kristo na amaraika aima digo ni “kpara gbegberẽ aboro ti wene yo.” * Ni sangbanaha, agu aboro adunga ngbaduyo yo wenengai ya—isoke aguyo aidanga ka mbu gayo gbegberẽ aida watadu mangaapai ya—i ambunga yo i birikosi adungurati te. *

19. Gini bipai du mo na ni tipa gupai Kristo adigi nimangihe tipa ka banda ga Mbori aboro i du gigiri na tipa ziazia ndikidi irisombori?

¹⁹ Anga wenepai ngaha ka ino gupai nga gaani Bakindo nga Yesu Kristo nabanda agu aboro du kutii beko te? Na anga pa wasa ngaha ka ino gupai nga ko kindi na kakaka nyemu ndikidi irisombori gbiati ndikidi airisimbori kina wai ko adu na ni ti gu regbo ko agirisi yekaru rogo bambata sa kama agarã te? Nairiwo gu ngbarago du ani na ni nga Kristo aima digo nimangisunge ka banda ga Mbori aboro gigiri rogo toro yo gbiati ndikidi irisombori! Ani rengbe ka songoda Bakindo na gako zogarago ni zanga rimiso ani tirani kandara tooni ku rogo ziree pambori yo.