1, 2. (a) Wai du Wiriba Russell akaragapai fu gu pasita naaida ka ino wai aDezire Yekova agbia marã tipa gayo asunge? (b) Ginipai ani ka wisigoho rogo gi kapita re?

TI GU kura regbo sa, pasita sa nga ga Agarasisi ko aye fuo Wiriba Charles Russell tipa ka ino wai du Abawiriki Ziazia Kekeapai agbia marã tipa kaa ngerafuo gayo asunge.

Wiriba Russell aya: “Ani arogodanga marã be aboro te.”

Gu pasita re asanahe nga: “Oni ni naagbia marã tie wai?”

Wiriba Russell akaragapai fuko nga: “Ka mi pe gupai foro du nga rengo, mo idinga ha te. Ho aboro aye ni tipa gaani adunguratise, i abingo wiri baga i nitanga na ni tipa aboro ba gamahe ku rogoho te. I nitiyo nabihe nga gi sunge re naida na marã. I kini ya, ‘Gi bambu re naida na marã . . . Wai du rengbe mi ka fu marã kandara tooni?’”

Gu pasita re aaidanga kuti gupai Wiriba Russell apehe re te.

Wiriba Russell aya: “Mi nape kina boro guhe foro nga rengo. I naasana re na kina gu sanahe nga, ‘Wai du rengbe mi ka fu marã kandara tooni tipa gi sunge re?’ Ho boro agbia aũborose ni na ki du na bete marã beni, ni naida ka mangasunge na ni fu Gbia. Ka he adunga be ni ya, tipagine si aida ani sosodi ni ti ni ngbaome?” *

² Wiriba Russell aape kina “boro rengo.” Tona bakuru kusayo, ga Mbori aboro aima digo nifu gamahe nitiyo tipa ka songoda ndikidi irisombori. Rogo gi kapita re, ani nika wisigopai tipa agu akpiapai nga ga Ziazia Kekeapai tipa gipai re kodihe na agu du ti gi gaani regbo re. Wa ani kaa wisigo wai ani agbia marã tipa agu asunge nga ga Kindo, si naida ani ni basasa sana tirani nga, ‘Wai du rengbe mi ka undo gu sunge nga ga Kindo?’

3, 4. (a) Gini kido du Yekova na ni kuti airisiko? (b) Wai du aYisaraere afu undo tipa sunge dua bamburoko?

³ Yekova na kido kuti ndikidi airisiko. Ko ima inoho nga ka i gbia momu, i duadu na ngbarago ka yugo gayo ranigose fuko rogo gamahe yo. Ani bingo akpiapai ue namangi ti regbo aYisaraere.

 ⁴ Fuo Yekova kusi aYisaraere Ezipeta yo, ko aya fuyo i dua bamburoko niba irisombori. Si adu nga si nika ida na bakere marã tipa ka dua gi bambu re na ka maa ahe ku vuruhe yo. Yekova arugu Moize ko fu momu fu aboro i songodi gi sunge re nga: “Gu ni kpotoni yo akpi nyemu he, ni yé na ni ni ga Yekova tumbatumba gamahe.” (Gate 35:5) Wai du agu aboro i “[a]rungosi yo ni kerehe na asunge mbugo” re akaragapai kuti gipai re? (Gate 1:14) I afu undo kina boro kpotoyo yo, nga dahabu, feda, na gu kura nyanyakipa ahe nga gu i agbiaha be agu abairayo nangia aEzipeto. (Gate 12:35, 36) AYisaraere afu ahe kisusi gu si aaidaha si ki da ti gupai nga i zayo ti ye na “tumbatumba agamahe berewe.”—Gate 36:4-7.

5. Wai du aYisaraere amangipai ti gu regbo Davide afu momu fuyo tipa i fu gamahe sa sunge dua yekaru?

⁵ Fuo bete agarã wa 475 kusa, Davide afu gamahe dagba ‘gako aũkumuko’ tipa sunge dua yekaru, si nangia gu bambata ndikidi bambu naadu tipa ndikidi irisombori. Fuani, ko afu momu fu kura aYisaraere tipa i gamuhe a tigayo, ko aya: “Da fu tini tie, ka kpara tini [na gamahe beni] fu Yekova areme?” Sidu, aboro “afu he ni nyemuhe, bambiko i afu he fu Yekova na kpotoyo yo ziazia.” (1 Peka 29:3-9) Fuo Davide inihe nga gi gamahe re aye be Yekova, ko akpari fuko nga: “Ahe dunduko naye kina be ro, kina dagba gamo ahe yo ani afu he ni foro.”—1 Peka 29:14.

6. Tipagine du si aida na marã ti ni tipa ka mangasunge Kindo areme, na gini asanahe nakura?

⁶ Moize watadu Davide, aamanganga ga Mbori aboro ngbaome i fu gamahe te. Kuba gure, aboro agamuhe wa kpotoyo yo akpinyemuhe. Na ginipai namanga tigaha areme? Ani dunduko niima inoho nga gu sunge ga Mbori Kindo amangaha naida na marã. Si naida na bakere marã tipa ka kusa Baibiri na agu awaraga du mburuhe rii Baibiri na kini kparakaha, ka dua aba irisombori na kini ngerefuoho na abe-basunge, na ka fu undo fu awirinarani aidipase ti regbo agberãngo. Sidu tie, nyanyakipa asanahe nakura nga: Wari du ani agbia marã ni? Ya mo si naida i sosodi apefuo Bakindo ngbaome i fu he?

7, 8. Tipagine du ga Yekova aboro ahõnga marã ti ni be aboro ya?

⁷ Wiriba Russell na abakureako aima ká ka wirika gu gbegberẽ mangapai apambori amangaha nga kaa zomia aboro i fu bakere marã fuyo. Rogo gu ue Ngbaõbambu Sinziri nakuru, riipai adu yo nga, “Mo naida na ‘Zion’s Watch Tower’?” Russell aya: “‘Ani idi kuti gupai nga YEKOVA du nga basongodi ‘Zion’s Watch Tower’ na wa duhe wo, si ahõnga he watadu ka zungodi aboro tipa i songodihe te. Guko naaya: ‘Adahabu dunduko, na agu afeda du rii agangara yo nga gimi,’ ho ko nika mbu songodaha ni na marã, ani nika rugatirani na ni nga gere nga regbo ka mbu kusaha.” (Agai 2:7-9) Fuo agarã naima susa 130  kusa, Ngbaõbambu Sinziri gbiati gu riigbu nakusaha nandu kindi kumbatayo nyanyaki!

⁸ Ga Yekova aboro ahõnga marã be aboro te. I atanga na kurungbu gamahe dagba aboro watadu ka keka awaraga tipa ka hõ gamahe a te. I amanganga abaangirã nga ga marã watadu ka sana aboro i ba ahe fuyo wa ka i bagihe ka gbia marã te. I kakuti gupai Ngbaõbambu Sinziri aima pehe dungu agarã kusayo nga: “Ani abingo ho ni wenepai ka ho marã be aboro ka songoda ga Gbia sunge na ni wai dungu apambori amangaha te . . . Ani bihe nga hõ marã ti rimo Gbia ngba gbegberẽ agene ngba arikoho dunduko agbanga tiko te, na ko afunga maku kurii gu boro fuhe watadu gu sunge si amangaha te.” *

9, 10. Gini ndupai duho na sarani ani fu gamahe kina boro ngbaduraniyo?

⁹ Wangia ani azogo nga ga Kindo, i amanganga rani amanga ngbaome ani fu he te. Kuba gure, ani na ngbarago ka mangasunge na gaani marã gbiati agu ahe du berani ka songoda agu asunge nga ga Kindo. Tipagine du du ani ti ni na nyemu ka fu he? Ani kparianga nduapai biata.

¹⁰ Bambataha nga, ani nagamahe kina boro kpotoraniyo mbiko ani nakpinyemu Yekova na ani naida ka manga “agu apai ngba angba bangiriko.” (1 Yo. 3:22) Yekova na ngbarago na gu irisiko nagamahe na kpotoniyo dunduko. Ani wisigingo afugo gu mokedi nangia Pauro tipa wai si aida Kristano gamu he. (Oni gedi 2 AKorindo 9:7.) I amanganga ndikidi Kristano ngbaome tipa ni gamu he te. Kuba gure, ni nagamahe wa ni ‘akpinyemuhe kpotoniyo.’ * Nga ka berã wenengai kurii gu zingo du ho na wai rengbe ni ka undo. Yekova nakpinyemu gu boro nagamahe wa gure, mbiko “Mbori nakpi nyemu kina gu boro nagama he esuesu.” Gu kura sasa afugo naya: “Mbori nakpinyemu agu aboro nakpinyemu ka gamahe.”

11. Ginihe nafõngbaduraniyo ani fu kina boro wene gamahe fu Yekova?

¹¹ Uehe nga, ani nagama agu ahe du berani mbiko si nga gu gene rengbe ani ka tambua Yekova ngbaha tipa agu ahe ko nafuhe furani. Ani bingo bangua rengo sa rogo ga Moize aNdiko yo nga gu nayugo wai du ngbadu boro yo. (Oni gedi Pa Fu Rugute ni Ue he 16:16, 17.) Ho aYisaraere anaandu ni tipa apumbo biata rogo garã yo, si adu nga gu ni nga kumba, ni fu gamahe “wa rengbe omeni na ni, kina ku sangba gu maku nga ga Yekova” ko nafuhe fu ni. Sidu, mbata fu akumba ndu tipa gu pumbo re, si adu nga i du wa ka i gedi agu amaku Yekova nafuhe fuyo na ki wisigi ngbaduyo yo, na ki diberã tipa gu wene gamahe rengbe yo ka fuhe. Wakina gure a, ho ani aberã ni kurii gu dungu agene Yekova nafu maku furani ngbaha, si nafõngbaduraniyo ani fu guhe ngbaangba gbe fuko. Gu gamahe ani afuhe na kpotoraniyo dũ nakoda agu aũborose du berãni, si  nayugopa wai ani abi agu amaku Yekova naukaha kurii rani na nyanyakipaha.—2 Kor. 8:12-15.

12, 13. Wai du gu gamahe naye ngbaduraniyo asongoda Bakindo, na bakio gu marã aboro afuhe ni basasa wai?

¹² Biataha nga, ho ani afu gamahe ni na nyemuhe, si nayugopa gaani nyemuse tipa gaani Bakindo nga Yesu Kristo. Wai du duhe wo? Oni kparianga gupai Yesu apehe fu gako abawiriki rogo gu yangara yuru ko adu auru kpotosende ane. (Oni gedi Yoane 14:23.) Yesu aya: “Si ngia boro nakpi nyemu re, ni ka kuti gi pai.” “Fugo” Yesu nakoda gu zinahe nga ga tungusa gu wene pangbanga nga ga Kindo auru kpotosende dunduko. (Mt. 24:14; 28:19, 20) Ani nadia gu “fugo” re kugume ho ani amanga ome ni ka mangasunge na gaani regbo, ome gbiati agu ahe du berãni tipa ka songoda sunge tungusapa Kindo. Gure nga ani nayugo gaani nyemuse tipa gu Bakindo nga Masiya.

¹³ Nirengo, nidu ani niruru azogo nga ga Kindo, ani naida ka yugoho na kpotoraniyo dunduko nga ani nasongoda Kindo  nifu ani gamahe nga ga marã. Wai du rengbe ani ka mangaha? Ga boro diaberã du. Boro na boro si aida ni gamuhe kina wai rẽhe na omeni. Ono tie, dungu awirina kinaho du aũzegino beyo ni kina betehe. (Mt. 19:23, 24; Yak. 2:5) Ono si naida i tingidi gupai nga Yekova na Wiriko nabi gu tooni gamahe i afuhe na kpotoyo yo dunduko na nyanyakipaha.—Mk. 12:41-44.

14. Tipa dungu agarã, aDezire Yekova anaakparaka gayo awaraga wai?

¹⁴ Tipa dungu agarã, aDezire Yekova anaaida boro fu marã mbata ni niru ka dia waraga. Gu marã i anaasanahe tipaha re anidu tooni tipa wa ka rungorungo aboro rengbe arengba a ka gbia awaraga. Rengo ngaha nga, ho irakporo anidu ni na nyemu waraga ono ka marã adunga beni ya, abatungusipa Kindo anaambu waraga ambu funi. Gupai i aakpinyemuhe angia agu apai du rogo gu waraga re zi ngbadu agu aboro yo rengbe ka gedaha.

15, 16. (a) Gini ariapai Riigbu Bipasunge amangihe nibipa kparaka gaani awaraga rogo 1990? (b) Wai du awirina afu gamahe? (Oni bi gu sanduki a nga “ Gaani Gamahe Nandu Kuari?”)

¹⁵ Rogo 1990, Riigbu Bipasunge atona ka manga ariapai rogo gu gene ani akparaka gaani awaraga ngbaha. Naatona rogo gu garã re Amerika yo, aboro atona ka dia awaraga naabaha riimburu gamahe. Gu waraga i akedihe fu adungurati dunduko rogo gu ringara re aya: “Amagazini gbiati awaraga i nikaa fuhe fu abatungusipai na fu agu aboro du na nyemuhe zanga sanahe tipa marã watadu ka ya fu boro ni fu gamahe mbata ni niru ka diaha. . . . Agu aboro dunduko naida ka fu gamahe tipa ka undo gu sunge yugopai ani amangaha, i ima rengba ka mangaha wo, ono i ima rengba ka dia waraga singia i fu gamahe watadu i afunga ha te.” Gu mbakadapai re adu tipa ka yugoho nga ani nafu tirani ka manga gaani sunge na nyemuhe, na si tipa irisombori na “ani wa agu yo nairasi [nabaga] ga Mbori pai” te. (2 Kor. 2:17) Kusa, gu mbakadapai nga ga fu gamahe re atona ka manga rogo abe-basunge rogo zegino dunduko.

¹⁶ Wai du aboro afu gi gamahe re? Rogo agu aBambu Kindo nga ga aDezire Yekova, wiri asanduki gamahe kina yo du ni aria ariaha. Boro ima rengba ka maa gaani gamahe koyo watadu ka keda gani gamahe nibasa ku rogo gu rimo be-basunge amangasunge na ni. Rogo agarã ni basasa, kekeapai naye rogo Ngbaõbambu Sinziri nayugo wai rengbe boro ka fu gamahe.

17-19. Oni sakingo rogo wai ani amangasunge na marã (a) nibipa sunge tungusapai, (b) dudua aBambu Kindo rogo zegino dunduko, na (d) gu marã nga ga dungurati.

¹⁷ Gu sunge du rogo zegino dunduko. I namangasunge na marã tipa ka undo gu sunge tungusapai namanga rogo zegino dunduko. Gi marã re nakoda sunge kusa awaraga tipa i kparakaha rogo zegino dunduko, dudua abe-basunge na kini ngerefuoho, gbiati ngerafuo agu asukuru ni bakiakia nga ga  siokrasia. Kurigure, i namangasunge na marã a ka ngerafuo amokedi, agu ababiapai ninaata ata, na kparakpara abazakigene. Ani namangasunge na gaani gamahe a tipa ka ngerafuo awirinarani aidipase ti regbo agberãngo. *

¹⁸ Dudua aBambu Kindo rogo zegino dunduko. I namangasunge na marã ka undo adungurati i dudua aBambu Kindo watadu ka mbakadaha. Wa vura duhe nga agamahe naye aye, si naida na bakere marã kindi tipa ka undo gu kura adungurati. *

¹⁹ Gu marã nga ga dungurati. I namangasunge na ni tipa agu apai si aidaha rogo dungurati na ka ngerafuo Bambu Kindo. Abaakumba rengbe ka diaberã nga i kedi bete marã ku be-basunge yo si undo gu sunge tungusapai namanga rogo zegino dunduko. Ho du pai ni wa gure, abaakumba nasana gu diaberã nga ga dungurati. Ka dungurati idihe, i ki kedi gu marã re. Rogo adiwi dunduko, gu wirina nangerafuo gu marã nga ga dungurati nambakada ripoti (rapport) nga ga marã i ki gedihe fu dungurati.

20. Wai du rengbe mo ka ‘íriso Yekova na gamo [nyanyakipa] ahe dũ’?

²⁰ Ho ani awisigo agu apai ni dunduko namanga tipa sunge tungusapa Kindo gbiati sunge sa aboro ni abawiriki rogo zegino dũ, si nafõngbaduraniyo ani “irisi Yekova na [gaani nyanyakipa] ahe dũ.” (Snz. 3:9, 10) Gu nyanyakipa ahe du berani nakoda gaani ome, berãpai, gbiati gu wene asino nga ga toro du tirani. Ani naida ka mangasunge na agi ahe re nyanyaki tipa gu sunge nga ga Kindo. Oni tingidi gupai nga, gu nyanyakipa ahe du berani nakoda agu aũborose du berã ni a. Ani dinga berã adia ka fu guhe rengbe omerani na ni na ti gu regbo rengbe ani ka fuhe ti ni. Gu gamahe ani afuhe na ngbaduraniyo dũ nafu taarimo fu Yekova na kini yugu wai ani aundo gu Bakindo nga Masiya.