1, 2. (a) Ginihe ga Yekova aboro aima digo ni mangihe naatona bakuru kusayo? (b) Ginihe Yekova abihe na nyanyakipaha?

GA YEKOVA ruru amoyambu aima digo ni dudua agu abambu nafu taarimo fuko. Ni kpiapai, aYisaraere adu zaaza na ngbarago ka dua bamburoko na ki gamu agu ahe naadu beyo tipaha na kpotoyo yo dunduko.—Gate 35:30-35; 36:1, 4-7.

² Anga Yekova nabi aũ dua bambu ni agu ahe naye na ngbarago fuko te, ko abingo ho a na nyanyakipaha gbe te. (Mt. 23:16, 17) Gu gamahe Yekova abihe na nyanyakipaha nga gu naye na ngbarago fuko kisusi ahe dunduko, nga gu iriso gako amoyambu afuhe fuko, kodihe na gu toro futise du tiyo na gu kakaka sunge i amangaha. (Gate 35:21; Mk. 12:41-44; 1 Tim. 6:17-19) Si nga gupai nyakipaha fuko. Tipagine? Bambiko i nadua bambu si ki gbegberẽ agberã. Ni kpiapai, bamburoko gbiati yekaru areme ti ni te. Agu abambu re aima gburuwa kusayo, ono bangiri Yekova agonga ti gu gamahe na gu sunge gako amoyambu afubee sa ni re te.—Oni gedi 1 AKorindo 15:58; AEbere 6:10.

3. Ginipai ani nika fugöpai tipaha rogo gi kapita re?

³ Gu ga Yekova amoyambu du ti gi gaani regbo re ima manga ome a ni bakerehe tipa ka dudua aba irisombori. Na agu apai ani namangihe tii gu ngbembatayo nga ga gaani Bakindo nga Yesu Kristo ima du ni iˈiriwoho! Si tie ziazia nga, Yekova ima fu maku kurii gaani ome. (Tam. 127:1) Rogo gi kapita re, ani nika fugöpai tipa gu bete asunge mangi na wai si naye na taarimo fu Yekova. Ani nika gia apangbanga agia a ngba agu aboro namangi agi asunge re

4. (a) Tipagine ani aida na dungu aba irisombori ti ni? (b) Tipagine i nakodi gu kura abe-basunge ti ni kuti agu akuraha? (Oni bi gu sanduki nga “ Dudua Abe-basunge—Mangapai Kuti Ariapai.”)

⁴ A wa ani asakipai tipaha rogo Kapita 16, Yekova naida ani dunguratirani tipa irisombori. (Eb. 10:25) Anga gaani adunguratise nanyakasa kina gaani idapase sa te, ono si nasarani a ani du zaaza tipa tungusapai. Wa digido arame ambeda ka nyasa, Yekova naipiso gu sunge re kina kumbatayo a. Ni sangbanaha, akama akutu nga ga aboro naye ku rogo riigbu na agarã dũ. (Yes. 60:22) Wa duhe nga azogo nga ga Kindo nange kina kumbatayo,  si nasa gupai a nga ani kiisi aba gbingbida agu awaraga du mburuhe rii Baibiri. Ani naida na dungu aba irisombori a.

5. Tipagine rẽ gu rimo ti ni nga Bambu Kindo? (Oni bi gu sanduki a nga “ Gu Kanisa Nga ga Vovo Imarago.”)

⁵ Ti tonatonaha, Abawiriki Ziazia Kekeapai abi gupai nga si naida i dudua gayo aba adunguratise nitiyo. Si nawira wa gu bambata ba irisombori i aduaha adu rogo gu gbata nga West Virginia, Amerika yo rogo 1890. Rogo 1930, ga Yekova aboro aima dua dungu aba irisombori watadu ka mbakada agu akuraha, ono agu aba irisombori re aadunga na kparakpara rimo riihe te. Rogo 1935, Wiriba Rutherford andu ku rogo gu gbata nga Hawaii, yo i aadua vovo ba irisombori ni ti bangisa regbo sa na vovo be-basunge. Ho awirina asana ko ni nga rimo gi bambu re nika ngia gine, ko aya: “Ya mo oni abingo ho nga si naida ani yambuhe nga ‘Bambu Kindo’ te,’ wa duhe nga si nga gupai ani amangaha nga ka tungusa gu wene pangbanga nga ga Kindo?” (Mt. 24:14) I afu gu rimo re fu gu  bambu re na si ki da ni gu rimo agu aba irisombori gu dungurati nga ga aDezire Yekova amangasunge na ni rogo zegino dunduko.

6, 7. Surungba dua aBambu Kindo ni ipiˈipihe angia gine?

⁶ Bara rogo 1970, zingo aBambu Kindo atona ka maapai. Tipa ka mangapai sa ni, awirina Amerika yo akusi vovo birĩ nga ga dua wene aBambu Kindo vuru bete aˈuru yo gbua. Bara rogo 1983, bange agu aBambu Kindo i aduaha Amerika yo na Kanada yo adu wa 200. Tipa ka manga gi sunge re, awirina akusi agu aRondo Nga ga Ringara Du Tipa Mekaarago. Gi mbakadapai re aima mangasunge wenengai na rogo 1986, Riigbu Bipasunge aidipa gi mbakadapai re, na rogo 1987, bange agu aRondo Nga ga Ringara Du Tipa Mekaarago adu nga 60 Amerika yo. * Rogo 1992, agi arondo re atona ka mangasunge a rogo agu aringara nga Argentina, Austroria, France, Germani, Japan, Mekisiko, South Africa, na Sepania yo. Zanga kapa, si naida ani undo agu awirinarani namangasunge nyanyaki tipa ka dudua aBambu Kindo, na aBambu Bakere Dunguratise, mbiko gu sunge i amangaha re nga ziazia sunge.

⁷ Agu aBambu Kindo i aduduaha ni ipo re aima manga wene dezirepai fu agu aboro duhe rogo gayo dagbarago. Ni kpiapai, waraga apangbanga sa Sepania yo adu na riipai rogoho nga, “Gu Idapase Naturã Agangara.” Gu waraga apangbanga re aafura tipa gu Bambu Kindo naadu rogo gu gbata nga Martos nga: “Wai du duhe nga rogo gi zegino aboro aperesa  kina pa tiyo mbatayo rogoho re, abaundosunge rogo papara [Sepania] naabaha ye ku Martos ane tipa ka dua bambu vuru umba regbo kisusi wai i naadua abambu, na ki du ni kodikodi yo kina sa?” Gu kekepai re ape fugo Dezire Yekova sa naaundo sunge yo nga: “Karagapai gbua taata nga, ani nga agu aboro Yekova ayugopai fuyo.”

8. Rogo 1999, gini vovo mbakadapai Riigbu Bipasunge aidipaha, na tipagine?

⁸ Ho 20 kama agarã aambeda ka digo ni, dungu aboro atiria ku rogo ga Yekova riigbu rogo agu aringara du na rungo rogoho. Agu adungurati naadu rogo agu aringara re amangi gu ome narẽ nayo tipa ka dua aba adunguratise. Ono rogo kura aringara, wo aboro anaasoga awirina na kini sawia yo mbiko gayo aBambu Kindo adu ni rungorungoho ringbisihe kuti gu kura aba irisombori. Ono tie, naatona rogo 1999, Riigbu Bipasunge aidipa meka aBambu Kindo rogo agu aringara du aboro rogoho na bakere zingo mosoro. Awirina rogo kumukokumuko aringara atona ka dungura marã tipa “wa ka ahe nge be” aguyo du na zingoho. (Oni gedi 2 AKorindo 8:13-15.) Na aguyo rogo kura aringara afutiyo tipa ka undo sunge.

9. Gini sunge si awira wa si aima kpakara, ono ginipai namangi?

⁹ Ti tonatonaha, gu sunge re aangera wa si ima kpakara. Tingidapai rogo 2001 aya si naida na aBambu Kindo koyo nga 18,300 rogo aringara 88 du na zingo bakere mosoro rogoho. Mbiko gu undo nga ga ga Mbori toro gbiati gaani Bakindo  Yesu Kristo, sunge ho rengbe ka gasa te. (Mt. 19:26) Vuru agarã yo wa 15, naatona rogo 1999 kuti 2013, ga Mbori aboro ima dua aBambu Kindo nga 26,849 ni papara gi mbakadapai re. * Yekova nafu maku kindi kurii sunge tungusapai, sidu, rogo 2013, agu aBambu Kindo si aaida i duaha rogo agu aringara re adu wa 6,500, na awere, agarã dunduko si aida i dua akama aBambu Kindo.

10-12. Wai du sunge meka aBambu Kindo naye na taarimo fu Yekova?

¹⁰ Wai du pa dua gu vovo aBambu Kindo re nataasirimo Yekova? Tingidapai aye rogo gu be-basunge du Zimbabwe yo nga: “Diwi sa fuo dua yo Bambu Kindo, bange agu aboro naye tipa dunguratise dedede nakio kina kumbatayo.” Rogo dungu aringara, si nawira wa aboro aidanga ka ye sa gaani adunguratise te da kinaho i abi wene ba irisombori ni. Bara sa kindi i nadua Bambu Kindo, si nahi be aboro na si kini idi i dua gu kuraha. Ono tie, anga kina gu bambu re nasa gupai nga aboro mbedi na Yekova te. Gu ndikidi nyemuse nga ga aKristano du ti agu aboro naduaha namanga ariapai amanga ti gu bipai nga ga agu aboro nabi ga Yekova riigbu. Oni kparianga bete akpiapai.

¹¹ Indonesia. Ho kumba sa aye ka ino gupai ni nga agu aboro ko abiyo i nidua Bambu Kindo angia abaundosunge, ko aya: “Gupai du tipa roni ima iiriwo! Mi ima bi wai oni amangasunge ni basasa na kpotoroniyo dunduko na ngbarago, wa vura duhe vurũ nga i atumongo roni te. Mi nabihe nga riigbu pambori ho du wa gaoni te!”

¹² Ukraine. Gu dee nanaasusa na aregbo dunduko pati gu Bambu Kindo i aaduaha ada kuti gupai nga aba duaha nga aDezire Yekova na gu bambu re nika ngia Bambu Kindo. Ri aya: “Tamere nga Dezire Yekova aima fura fere tipa aDezire Yekova. Fuo bi mi wai oni nadua gi bambu re, mi adiberã a nga mi naida kadu rogo gaoni badona. Mi ima bi wai oni ayugo nyemuse.” Gi dee re aidipa wisigo Ziazia Kekeapai na ki zi bapatiza rogo 2010.

13, 14. (a) Ginipai mo nawirikihe ti wai arogotise sa amangipai fuo biyo gupai naamanga pati dua Bambu Kindo? (b) Ginipai rengbe mo ka mangaha ka sa gupai nga gamo ba irisombori nifu taarimo fu Yekova?

¹³ Argentina. Arogotise aye fuo gu wirina naangerafuo sunge dua Bambu Kindo. Gu ko nga kumba aya, “Si ima dia rani na gbanga regbo wa ani adigi nibi roni oni dua gi bambu re, na . . . ani diberã nga ani naida ka wirikapai tipa Mbori rogo gi ba re.” Fuani ko asanahe nga, “Ginipai rengbe ani ka mangaha tipa ka rẽ ka ye sa adunguratise ku ane?” Agu arogotise re aidipa wisigo Baibiri, na ki pe gupai nga i naida gayo aborokporo dunduko wisigihe a. Awirina aima du na ngbarago na ki idi kuti gayo pai.

¹⁴ Si rengbe kadu nga momu aadunga bero tipa ka undo sunge dua gu Bambu Kindo mo amanga adunguratise rogoho awere te, ono mo ima rengba ka manga ome tipa gu ba irisombori  re fu taarimo fu Yekova. Ni kpiapai, mo ima rengba ka yamba gu boro mo naawirika Baibiri na ni, gu ni mo atungisipai funi, watadu gu kura aboro i ye kadu na mo pati dunguratise Bambu Kindo yo. Mo a na kina momu bero ka undo sunge giriso rago na kini ngerefuoho. Ka mo mbakadi tiro wenengai, mo ima rengba ka fu marã a ni gamahe tipa si ngerefuo gu Bambu Kindo du mo rogoho watadu ka fuhe i dua gu kura aba irisombori na ni rogo gu kura aba. (Oni gedi 1 AKorindo 16:2.) Agi apai re dunduko nataasarimo Yekova.

15-17. (a) Ada namanga bakere sunge mekaarago? (b) Ginipai mo nawirikihe be agu afugo agu arogotise mangisunge mekaarago rogo dungu aringara?

¹⁵ Agu aboro nadua aBambu Kindo, aBambu Bakere Dunguratise na abe-basunge nga agu awirina nga akumba na adee du rogo gu ringara re. Ono dedede tie, agu awirina du na bakere inohe rogo meka abambu rogo gu kura aringara naundo yo aundo. Bete agu abaundosunge re nambakada agu apai du tipa gayo raka wa ka i ruho ka mangasunge rogo gu kura aringara tipa bete aposo. Aguyo nafutiyo ka mangasunge tipa dungu agarã, kaa tanga na sunge dua aBambu Kindo rogo aba ni bakiakia.

¹⁶ Sunge mekaarago rogo gu kura aringara na kina gaha akpakarapai, ono aundo kina ti ni a. Ni kpiapai, Timo na Lina ima ta rogo agu aringara du Asia yo, Putu yo, na gu papara Amerika du ku padiyo tipa ka dudua aBambu Kindo, aBambu Bakere aDunguratise, na abe-basunge. Timo aya: “Tipa agarã 30 awere, wo i akekeda re ku rogo aba ni bakiakia fuo agarã ue.” Lina, namangi rogatise na Timo agarã 25 kusayo aya: “Mi ima mangasunge na Timo rogo aringara bawe. Si nadia bakere  ome na regbo tipa boro inidi tini na vovo riahe, vovo rago, vovo fugo, na vovo dagbarago nga ga tungusapai na ka gbia vovo abakure.” * Ya mo gu manga ome re na wene sangbanaha ti ni? Lina aya: “Agu akpakarapai re aima ye na bakere amaku furani. Awirina ima yugo gu nyemuse nga ga aKristano furani na kini di rani kugume, na Yekova ima ngerafuo rani a. Ani ima bi digisidigisi agu afugo Yesu apehe fu gako abawiriki du rogo Marako 10:29, 30 si nida ti rengo. Ani ima gbia akama awirina rogo toro yo nga akumba na adee gbiati anarani.” Timo aya: “Si nafu bakere ngbarago furani nga ani namangasunge na gaani inohe tipa wene ndupai, nga ka fubee sa ngeesa ga Bakindo ahe.”

¹⁷ Darren na Sarah, nga agu aboro undo sunge mekaarago vuru Afirika, Asia, Amerika, Putu, na agu akisanga du Pasifiki yo nabihe nga gu wenepai i nagbiaha ima susa gu i nafuhe. Wa vura duhe nga i aima gbiatiyo na akpakarapai, Darren aya: “Momu du ngaha nga ka mangasunge na awirina rogo papara zegino ni bakiakia. Mi ima bihe nga gu nyemuse du ti ga Yekova aboro wakina gu gire du rogo zegino dunduko nadungura rani ku rogo ba sa.” Sarah aya: “Mi ima wirika dungu apai be awirina na asinoyo ni bakiakia! Pa bi wai i ambupa gayo apai ka mangasunge fu Yekova nafõngbadureyo mi nifu gu he ngba gbe fu Yekova.”

18. Wai du gu sangbanebi du rogo Atambuahe 110:1-3 adigiso tihe?

¹⁸ Bakindo Davide ape sangbanebi kumbatayo nga, ka agu azogo nga ga Kindo yo vura gbiatiyo na akpakarapai wai vurũ, i ‘afutiyo zaza’ ka manga agu apai nga ga Kindo. (Oni gedi Atambuahe 110:1-3.) Agu aboro dunduko nafubee sa agu asunge nga ga Kindo nadigiso gu sangbanebi re. (1 Kor. 3:9) Gu badungu abe-basunge i naduduaha, akama aBambu Bakere Dunguratise, na agu akutu aBambu Kindo du rogo zegino areme nayugo gu nyanyaki gopai nga ga Mbori Kindo nga ndikidipai na si nazogarago awere. Nairiwo gu wene momu nga ka mangasunge fu gu Bakindo nga Yesu Kristo rogo gu sunge nafu gu taarimo fu Yekova rẽ ko na ni!