1. Ho abawiriki adunguratiyo ni, gini undo i agbiaha, na tipagine i aaidaha ti ni?

NGBUTUKO fuo zinga Yesu be kpio, abawiriki adunguratiyo tipa ka ngarasa tiyo. Ono tie, i akisi angbadimo mbiko gunde be avurayo. Si nawira wa gunde aima guari kusayo tiyo ho Yesu ayugu tiko ni fuyo na ki ya: “Oni dí Ziazia Toro ku gume”! (Oni gedi Yoane 20:​19-​22.) Kusa, i adunguratiyo berewe ku rogo ba sa, na Yekova ki uka ziazia toro kuriyo. Nairiwo gu ome i agbiaha rogo gu uru re tipa gu sunge tungusapai naadu kumbatayo re!​​—⁠Amo. 2:​1-7.

2. (a) Wai du Yekova afu ome furani, na tipagine ani aidaha ti ni? (b) Tipagine du du gu mbakadapai nga ga gu Irisombori Nga ga Aborokporo ti ni na nyanyakipaha? (Oni bi rukutu kekeapai na gu sanduki nga “ Gu Irisombori Nga ga Aborokporo,” kpewaraga 175.)

² Ani nagbiatirani na akpakarapai wakina gu naadu tipa agu awirinarani naadu rogo bambata sa kama agarã re. (1 Pet. 5:⁠9) Ti gu kura aregbo, agurani naawoka awoka be gunde be aboro. Na ani naida na ga Yekova ome si undo rani ani hipai ti ngba tungusapai. (Ef. 6:​10) Yekova nafu ngbatunga gu ome re furani vurube gaani adunguratise. Ani awere na momu berani ka ye sa adunguratise ue rogo poso yo nga gu Dunguratise Du Tipa Aboro Dũ na Wisigo Ngbaõbambu Sinziri gbiati gaani dunguratise nga ga bebere poso nga, Gaani Raka Nga ga AKristano na Gaani Sunge. * Ani a na adunguratise biama namanga na agarã dũ, gu nga ga uru biata, na gu nga ga uru sa bara ue gbiati Tingidapa Kpio Kristo. Tipagine duhe ti ni ni nyanyakipa pai nga ani du pati agu adunguratise re dũ? Wai du gu gaani adunguratise du awere re atona? Na ginipai gaani bipai tipa adunguratise ayugoho tipa rani?

3, 4. Ginipai Yekova aidaha be gako aboro? Oni funga akpiapai.

³ Naatona bakuru kusayo, Yekova aima ya ko naida gako aboro ni dunguratiyo tipa kaa irisoko. Ni kpiapai, rogo 1513 M.B.K., Yekova arũ andiko fu aYisaraere, na gu Ndiko re aakoda iriso Rago Sabiti na aposo dũ tipa wa ka aborokporo ni basasa irisiko na i niyugu gako aNdiko fuyo. (Pa Rug. 5:​12; 6:​4-9) Ho aYisaraere anaapekafuo gi zinahe re ni, si anaanyakasa aborokporo na gu rikaaboro re dunduko anidu gigiri rogo toro yo na ki du nyanyaki. Ho i anizanga manga agu andiko re ni, wa gu nga ka kpa ti ye sa agu adunguratise du tipa iriso Yekova dedede, Mbori anaaidanga na gayo pai te.​​—⁠Pa Mot. 10:11; 26:​31-​35; 2 Peka 36:​20, 21.

 ⁴ Oni kparianga gu kpiapai a Yesu amoihe. Sinoko aningia kaa ndu ku bambutiria yo rogo aposo ni basasa Rago Sabiti. (Rk. 4:​16) Fuo Yesu kpi na ki zingi be kpio, gako abawiriki anye kuti gu sino nga ga dunguratiyo dedede zavura wa i aadunga tii gu ndiko nga ga Rago Sabiti ya vurũ. (Amo. 1:​6, 12-​14; 2:​1-4; Rom. 14:5; Koro. 2:​13, 14) Pati agu adunguratise re, agu aKristano re anaawirikapai na kini gbia ngarasaro na kini fu gayo motumo tambuahe fu Mbori rogo kparakpee yo, karagapai pati dunguratise gbiati bi abia.​​—⁠Koro. 3:​16; Eb. 13:⁠15.

5. Tipagine ani andu ti ni tipa adunguratise na aposo dũ gbiati agu kikindigihe? (Oni bi gu sanduki a nga “ Agu Adunguratise Nakoda ga Mbori Aboro,” kpewaraga 176.)

⁵ Wakina gure a, ho ani aye ni tipa gaani adunguratise nga ga poso gbiati gu kikindigihe ani amangaha na agarã dũ, gure nga ani nasongoda ga Mbori Kindo, ani nagbia ome be ziazia toro, na kini ngarasi akuarani rogo gaani akaragapai nga ga idapase. Gu nyakipaha gbe nga, ani na momu tipa ka iriso Yekova vurube gaani akparakpee yo, akaragapai, na abia. Gaani adunguratise rengbe kadu kia ti gu nangia ga aYisaraere gbiati agu aKristano naadu rogo bambata sa kama agarã, ono pa gaani ima nyaka wakina gayo. Wai du agu adunguratise du ti gi gaani regbo re atona?

6, 7. (a) Ndu manga gaani adunguratise nga gine? (b) Wai du adunguratise adu ni bakiakia rogo arago?

⁶ Ho Wiriba Charles Taze Russell atona ka gbata rengo ni rogo fugo Mbori yo, ko abihe nga si rẽarẽ ko nikodi tiko na agu aboro naadu na kina gu bangisa sasa re a. Rogo 1879, Russell aya: “Mi gbiati gu kura aboro Pittsburgh no, ima mbakadatirani tipa kaa manga sukuru na kaa weteka Ziazia Kekeapai na kini dungura tirani Rago Aposo dunduko.” I angarasi agedi  Ngbaõbambu Sinziri (Zion’s Watch Tower) i nimangi adunguratise, na rogo 1881, i atona manga adunguratise rogo gu gbata nga Pittsburgh, Pennsylvania, na Rago Aposo dũ gbiati Rago Biata. Gu Ngbaõbambu Sinziri nangia ga Ngbangba 1895 aya ndu manga agu adunguratise re adu tipa ka sonosa “gu pagume nga ga aKristano, nyemuse gbiati fugodagbase” na ka fu momu fu agu aboro ye kupati dunguratise i ngarasi akurayo.​​—⁠Oni gedi AEbere 10:​24, 25.

⁷ Tipa dungu agarã, agu abadona nga ga Abawiriki Ziazia Kekeapai anaamanga gayo adunguratise ni bakiakia. Ni kpiapai, gu badona naadu Amerika yo, ake waraga rogo 1911 nga: “Ani namanga adunguratise bara bisue rogo poso sa.” I anaamanga agu adunguratise re Rago Sa Sunge, Rago Biata, Rago Bisue, na Rago Poso bara ue. Gu badona naadu Afirika no ake kura waraga rogo 1914 nga: “Ani namanga adunguratise bara ue rogo diwi sa, Rago Bisue na Rago Poso.” Ono tie, fuo bete regbo, gu vovo gene ani amanga gaani dunguratise ngbaha awere akuru. Ani wisigingo pai ni guruhe tipa adunguratise ni bakiakia.

8. Bete rii agu agumbapai naadu mbata angia gine?

⁸ Gu Dunguratise du Tipa Aboro Dũ. Rogo 1880, nga gu garã Wiriba Russell atona kusa Ngbaõbambu Sinziri (Zion’s Watch Tower) rogoho, ko apekefuo gu kpiapai Yesu amoihe na ki tona ndu agu anunguro nga ga tungusapai. (Rk. 4:​43) Rogo agu anunguro re, Wiriba Russell amoi kpiapai tipa wai ka manga gu Dunguratise du Tipa Aboro Dũ. Ngbaõbambu Sinziri atakipande pa gu nunguro re ki ya Russell “nika du na ngbarago ka manga gu gumbapai du riihe nga ‘Agu Apai Nabipa ga Mbori Kindo.’ ” Rogo 1911, fuo i sigira adungurati rogo dungu aringara, i angarasi adungurati ni basasa i nikedi wene abagumbapai i nindu kaa manga agumbapai rogo gu kura arago, agu agumbapai re adu sita, na gu riiapai si aafura tipaha angia sapangbanga, na motumo. Ti digido agu agumbapai re ni basasa, i anaape pa rimo gu boro nika manga gumbapai rogo gu poso ngbefuo gure na rii gani gumbapai.

9. Wai du gu Dunguratise Du Tipa Aboro Dũ na ariatihe vuru agarã yo, na wai du rengbe mo ka songodaha?

⁹ Rogo 1945, Ngbaõbambu Sinziri atakipande pa tona gu tua namangi rogo zegino dũ tipa gu Dunguratise du Tipa Aboro Dũ nga gu nakodi agumbapai muambe naafura tipa “agu akpakarapai du ti gi gaani regbo re.” Tipa dungu agarã, abagumbapai anaamanganga kina agu agumbapai nga ga ruru kangara moyambu sa te, ono agu agumbapai a kina yo anaambakadaha. Ono tie, rogo 1981, i arugu abagumbapai dunduko nga i nimangi kina agu agumbapai dungurati nafuhe fuyo. * Da ku rogo 1990, gu kura agumbapai kinaho nanaaida agu aboro du pati dunguratise sakipai watadu mangi yugopai na kpiapai; ono tie, ariapai amangi nga i nimangi gumbapai nisaha zanga rimiso kura aboro ku rogoho. Gu kura ariapai amangi berewe rogo Ngi 2008 ho  i aumbasi regbo gumbapai ni ti aminiti 45 kuti aminiti 30. Wa vura duhe nga ariapai aima manga, wene mbakadimbakadi gumbapai kindi nanyakasa gaani idapase kuti Fugo Mbori, na kini yugu gu kura dungu apai furani tipa ga Mbori Kindo. (1 Tim. 4:​13, 16) Ya mo mo naayamba agu aboro mo akaraga tiro ka biyo gbiati agu aboro angianga aDezire Yekova ya na ngbarago i ye ka gia gu nyanyakipa agumbapai du mburuhe rii Ziazia Kekeapai re?

10-12. (a) Gini ngbatunga aˈariapai mangi ti Wisigo Ngbaõbambu Sinziri? (b) Gini asanahe si aida mo sana tiro na ni?

¹⁰ Wisigo Ngbaõbambu Sinziri. Rogo 1922, agu awirina nangia pilgrims, riigbu anaakeda yo i ndu ka manga agumbapai rogo adungurati na i ningbembatayo rogo sunge tungusapai yo, afu gu berãpai nga si naida adungurati nimangi adunguratise dedede kaa wisigo Ngbaõbambu Sinziri. Awirina aima ida kuti gi berãpai re, na ti tonatonaha, i anaawisigo Ngbaõbambu Sinziri bebere poso watadu Rago Poso.

¹¹ Gu Ngbaõbambu Sinziri nangia ga Banzinga 15, 1932, afu kura rugapai tipa wai ka manga gi dunguratise re. Ni pekafuo kpia wai Aboro Betere aamangaha, gu kekeapai re aya wirina nga kumba si aida ni ngbembatayo rogo nungusaha. Awirina biata aima rengba ka sungo rii bambata gene ba ba dunguratise yo tipa ka geda agenewaraga, guni na gedaha ki mbuhe fu guni. Gu kekeapai naadu ti gu regbo re aadunga na asanahe rogoho te, rugute adu fu ba nungusihe nga ni nisana agu aboro du pati dunguratise i kusi asanahe tipa gupai i awisigoho. Fuo gure, ni ki tona ka fu momu fu aboro i fuku gayo akaragapai kuti agu asanahe re. Ka si du nga aboro afunga wene karagapai te, ba nungusihe anifu “ruru karagapai ni guruhe” tipa ka sakarogoyo.

¹² Ti tonatonaha, i aidihe fu adungurati ni basasa i nisia gu kekeapai ngba ti dungu aboro i aida ka wisigoho. Ono tie, gu  Ngbaõbambu Sinziri nangia ga Zerekpe 15, 1933, afu gu berãpai nga adungurati dunduko nimangisunge na vovo kekeapai. Rogo 1937, rugapai aye nga si naida gu wisigopai re nimangi Rago Poso. Gu kura kpuruwahe tipa manga adunguratise wai ani amangaha areme akuru rogo gu Ngbaõbambu Sinziri nangia ga Tanvuo 1, 1942. Ti tonatonaha, gu magazini re aya asanahe nikaa kura tii gu kekeapai i awisigoho na si naida i mangisunge na agu asanahe re. Fuani, si aya si naida gu dunguratise re du tipa saa sa gbua. Na si angarasi agu aboro nakaragapai nga i fu akaragapai kina “rogo afugoyo yo” kuba gupai nga ka gedaha ageda. Wisigo Ngbaõbambu Sinziri kindi ni gu bangua dunguratise ruru kangara moyambu afu gu riahe nga ga toro furani ngbaha ti ragoho. (Mt. 24:45) Si naida boro sana tini nga: ‘Ya mo mi naambakada gu wisigopai nga ga Ngbaõbambu Sinziri na aposo dunduko? Ya mo mi naasada ka karagapai ho du gene ni?’

13, 14. Wai du gu Wisigo Ziazia Kekeapai Nga ga Dungurati atona, na ginipai ngba tiro na gi dunguratise re?

¹³ Gu Wisigo Ziazia Kekeapai Nga ga Dungurati. Rogo 1890, fuo i kusi gu buku nga Millennial Dawn (Aurure du Millénnium) ni dunguhe, Wirina sa nga Rahn, nangia Bawiriki Ziazia Kekeapai rogo gu gbata nga Baltimore, Maryland, Amerika yo, afu berãpai nga si naida i naamanga adunguratise tipa kaa wirika agi abuku re (“Dawn Circles”). Ti tonatonaha, agu adunguratise i anaamangaha dedede rogo akporo re, angia asadapai. Ono tie, rogo Mbirinvuo 1895, agi adunguratise naadu tipa wisigo abuku re atona ka manga rogo dungu agbata Amerika yo na wene sangbanaha. Gu Ngbaõbambu Sinziri nakuru rogo gu gara re afu berãpai nga abawiriki rengo dunduko tona ka manga agu adunguratise re. Si afu rugute nga si naida banungusi he ngia wene bagedipai. Si adu nga ni nageda gene kekeapai na ki pidi agu aboro du pati wisigoho i karagapai. Fuo ni gedi gene kekeapai ni basasa rogo gu gene waraga re na ki sakipai tipaha, si anaaida ni gedi agu averesi du rogoho. Ti digido gu kapita re, agu aboro du pati wisigoho ni basasa si anaaida i fugupai ni guruhe riihe.

¹⁴ Rimo gi dunguratise re aima ariatihe bara dunguhe. Kusa, rimoho ada nga gu Dunguratise Nga ga Aboro Beroya Tipa Wisigo Ziazia Kekeapai, i adihe ti gu kpiapai nangia ga agu aboro Beroya naadu rogo bambata sa kama agarã nanaawisigo Ziazia Kekeapai sirisiri. (Amo. 17:11) Kusa berewe, gu rimo re ada nga gu Wisigo Buku Nga ga Dungurati. Rimoho awere nga gu Wisigo Ziazia Kekeapai Nga ga Dungurati, na aboro dũ naye ku Bambu Kindo yo tipa ka wisigoho kuba gupai nga abadona aboro nimangihe rogo akporo. Vuru gu dungu agarã susi, i ima mangasunge na abuku ni bakiakia, aburosua, na zavura kekeapai rogo aNgbaõbambu Sinziri tipa ka wisigoho. Ti kina tonatonaha, i angarasi agu aboro dunduko naaye tipa adunguratise i nifu  akaragapai. Gi dunguratise re ima mangapai ni bakerehe tipa ka kiiso gaani inohe tipa Ziazia Kekeapai. Ya mo mo naambakada gi dunguratise re dedede na kini fu karagapai ngba wene gene baha yo?

15. I akusi gu Sukuru Nga ga Siokrasia tipa ginipai?

¹⁵ Gu Sukuru Nga ga Siokrasia. Wirina nga Carey Barber naamangasunge rogo gaani rii-basunge nga ga zegino Brooklyn, New York yo aya: “Rago Sa Sunge yuru rogo Wegebe 16, 1942, agu awirina dunduko nga akumba naamangasunge Betere yo, i asanayo i ye ka rimo gu sukuru rimoho ada kusa nga Gu Sukuru Nga ga Siokrasia.” Wiriba Barber, namangisunge fuo gbanga regbo kusa ni boro Riigbu Bipasunge, aringbisi gu sukuru re nga: “Si nga gu nyanyakipa sonakumbatayo nayugopa wai Yekova amangapai na gako aboro ti gi gaani regbo re.” Gu sukuru re aima du na diabese rogo undo awirina yo i sonosi gayo birĩ yugopai gbiati tungusapai tona rogo 1943, na awirina atona ka  mangasunge na gu tooni buku nangia Course in Theocratic Ministry (Cours pour le ministère théocratique) rogo adungurati rogo zegino dũ. Gu Ngbaõbambu Sinziri nangia ga Banzinga 1, 1943, ape gupai nga i akusi gu Sukuru Nga ga Siokrasia si undo ga Mbori aboro “i raba tiyo ka du ni wene abatakipande pa Kindo.”​​—⁠2 Tim. 2:​15.

16, 17. Ya mo gu Sukuru Nga ga Siokrasia adu tipa ka yugo kina abirĩ tungusapai? Oni sakinga rogoyo.

¹⁶ Ti tonatonaha, si aima kpakara fu dungu aboro i nifura barabangiri dungu aboro. Clayton Woodworth, i azi bako na Wiriba Rutherford zanga nduhe na gu kura aboro rogo 1918, apepa wai ko adu ho ko arimi gu sukuru re ni rogo 1943. Ko aya: “Si aima kpakara fere mi mangi gumbapai. Mi abi tire wa ka i ya mirãre ima gizo na sure ki ugu ngbare yo naabaha, na fugore ki ariatihe.” Ono tie, ho ko aini manga gumbapai ni, ko agbia momu nga ga manga dungu agumbapai gbaiga. Gu sukuru re aima yugo dungu apai fuko kisusi. Si ayugu pa nyaka padu na  umbasitise na pa kido kuti Yekova. Ko aya: “Mi aye ka rugatire na ni nga pa bagumbapai anyakanga te. Ono ka ni mbakadi gani gumbapai wenengai na ki kido kuti Yekova, aboro nika du na ngbarago ka giaha na ki wirikipai ti gupai ni agumbaha.”

¹⁷ Rogo 1959, i aidihe fu agu awirina nga adee i tona manga gu sukuru re. Wirinarani nga Edna Bauer natingidapa gu regbo i amangi gu tingidapai re pati bakere dunguratise. Ri aya: “Mi natingidapa gu ngbarago atingida agu awirina nga adee adu na ni ti gu regbo re. I akiisi gayo amomu berewe kumbatayo.” Tipa agarã, dungu awirina nga akumba na adee aima dia gu momu re na ki rimi gu Sukuru Nga ga Siokrasia re tipa Yekova yugupai fuyo. Areme, ani nagbia gu rabahe re kindi rogo gaani dunguratise nga ga bebere poso.​​—⁠Oni gedi Yesaya 54:⁠13.

18, 19. (a) Wai du ani agbia rabahe awere tipa tungusapai? (b) Tipagine ani abibia ti ni pati gaani adunguratise? (Oni bi gu sanduki nga “ Bibia Tipa gu Yugopai Nga ga Rengo.”)

¹⁸ Gu Dunguratise Nga ga Sunge. Naatona rogo 1919, i asigira adunguratise nga ga sunge tungusapai. Ti gu regbo re, anga agu aboro dunduko du rogo dungurati nanaaye tipa agu adunguratise re te ono kina agu aboro naakparaka awaraga. Rogo gu garã nangia 1923, gu Dunguratise Nga ga Sunge re anaamanga rogo diwi yo bara sa, na aboro dũ i anaaida i niye tipaha. Rogo 1928, i angarasi adungurati si nimangi gu Dunguratise Nga ga Sunge na aposo dũ, na rogo 1935, Ngbaõbambu Sinziri angarasi adungurati dũ nga mburu gayo Dunguratise Nga ga Sunge du rii gu waraga nga Director (rimoho ada kusa nga Informant, na kusa Gaani Sunge Nga ga Kindo). Fuoho aimanga te, adungurati dunduko ki tona ka manga gi dunguratise re.

¹⁹ Areme, ani nagbia agu arugute du tipa wai ka tungusapai rogo gaani adunguratise nga ga bebere poso. (Mt. 10:​5-​13) Ka si du nga mo ima rẽ tipa i fu waraga dunguratise nga ga bebere poso foro, ya mo mo nawisigoho na kini mangi agu aberãpai i afuhe rogoho tipa tungusapai?

20-22. (a) Tipagine ani naamanga tingida pakpio Yesu ti ni? (b) Gini undo mo agbiaha ti ye kupati Tingida Pakpio Yesu na agarã dũ?

²⁰ Yesu aya fu apefuoko wẽ i ni tingidipa kpioko daho ko nika ye ni. A wa si adu tipa Pumbo Susiri, Tingidapa Kpio Kristo nga gupai namanga bara sa rogo garã yo. (1 Kor. 11:​23-​26) Gi dunguratise re nadungura amirioni aboro ku rogo bangisa ba sa na agarã dũ. Si natingida mbedimbedi aKristano na pa gu momu du yo na ni kadu ni adikumbo Kindo. (Rom. 8:​17) Na tipa kura akandoro, si nasayo i du na bakere irisa na ki du ni ruruyo koyo du gu Bakindo ni nga ga ga Mbori Kindo.​​—⁠Yo. 10:⁠16.

²¹ Wiriba Russell na abakureako aima rugatiyo na pa nyakapa Ga Gbia Riahe na i aima inoho nga si naida i nimangihe bara sa rogo garã yo. Gu Ngbaõbambu Sinziri nangia ga Zerekpe 1880 aya: “Tipa dungu agarã, si aima satihe ni sino agurani du Pittsburgh ane kaa . . . tingidapa Pumbo Susiri [Tingida Pakpio Yesu] na kini ri gu kpakuto narukuba kpoto Gbia na kureko.”  Fuoho aimanga te i ki tona kaa manga Tingida Pakpio Yesu ti regbo bakere adunguratise. Gu bambata regbo gipai re amangi ti ni angia 1889, na aboro nga 225 naadu pati ni na 22 ki zi bapatiza.

²² Areme, ani amanganga Tingida Pakpio Yesu ni papara gu mbakadapai du tipa bakere dunguratise te, ono ani nayamba aboro dunduko i ye kadu na ani pati ni rogo gaani aBambu Kindo watadu gu kura aba. Rogo 2013, bange agu aboro naadu pati Tingida Pakpio Yesu adu nga amirioni 19. Nairiwo gu momu du ani na ni nga kadu pati Tingida Pakpio Yesu na ka ngarasa kura aboro i ye kadu na ani pati ni! Ya mo mo naayamba dungu aboro na ngbarago na agarã dũ i ye tipa Tingida Pakpio Yesu?

23. Gini bipai du mo na ni tipa gaani adunguratise?

²³ Ga Yekova ruru amoyambu abingo gu rugute du tipa dunguratiyo ku rogo bangisa ba sa wa sunge mbugo te. (Eb. 10:​24, 25; 1 Yo. 5:⁠3) Ni kpiapai, Bakindo Davide aima kpinyemu kaa ndu ku rogo ga Yekova bambu yo tipa irisombori. (Tam. 27:⁠4) Ko adu na ngbarago ka mangaha wo dagba gu rimbasa aboro naadu na nyemu Mbori tiyo. (Tam. 35:18) Na oni berẽnga pa ga Yesu kpiapai. Zavura ho ko adu ni ni tooni gude, ko aima du na bakere nyemu kadu tii gu bambu i anaairiso Bako rogoho.​​—⁠Rk. 2:​41-​49.

24. Ho ani ye ni kupati adunguratise, gini momu si afuhe furani?

²⁴ Ho du ani ni pati adunguratise, ani nayugo gaani nyemuse tipa Yekova gbiati gu nyemupai du tirani ka ngarasa akuarani aidipase. Ani nayugo gu nyemupai a du tirani tipa ka raka wa agu azogo nga ga ga Mbori Kindo, mbiko gaani adunguratise gbiati kikindigihe nafu ngbatunga gu rabahe re furani. Kurigure, gaani adunguratise nafu gu birĩ gbiati ome ani aidaha tipa ka hipai kuti ngba gu nyanyakipa sunge ga Mbori Kindo amangaha ka sa aboro ni ga Bakindo Yesu Kristo abawiriki na kini rabayo. (Oni gedi Matayo 28:​19, 20.) Zanga kapa, padu ani na bakere nyemu ka dunguratirani kina sa nayugo wai du ga Mbori Kindo ni ndikidipai furani wa du ani ni basasa. Ani ni bingo gaani adunguratise abi na nyanyakipaha ti aregbo dũ!