1, 2. Ginipai nafõngbaduroyo tipa mo kpinyemu Yekova Mbori?

YA MO mo nakpinyemu Mbori? Si ima rengba ka du nga mo ima kpinyemu ko ni bakerehe gbe, si ki sa ro mo kpara gamo raka fuko. Mo ima rengba kaa bihe nga ko nga bawene Bakureamo. Ono mbata fu mo kpinyemu ko, ko aima kpinyemu ro. Rogo Ziazia Kekeapai yo, ani nageda gupai nga: “Nyemuse ti rani, bambiko ko nyemurani adu ti ko mbata.”​—1 Yoane 4:19.

² Mo berẽnga pa agu agene Yekova nayugu gako nyemuse ngbaha furani. Ko ima fu kpotosende furani ni bawene kpurani na agu ahe dunduko ani aidaha tipa ka gbia ngbarago rogo raka yo. (Matayo 5:43-48; Yugoti 4:11) Ko naida ani du na wene pagume na ko, na ko ima saha furani taata tipa ani wirikipai tipa ko. Ho ani ageda Ziazia Kekeapai ni, gure nga ani nadega turani fu Yekova. Na ho ani akpara ni, ko nadega tuko adega furani. (Atambuahe 65:2) Ko nangbembatayo furani na kini nyakasi rani na gako ziazia toro. (Ruka 11:13) Ko akedi bangisa Wiriko ku zegino ko batasirani be ingapai na kpio.​—Mo gedi Yoane 3:16; ARomo 5:8.

3. Wai gu ani abanda wene pagume na Yekova?

³ Mo berẽnga pa boro sa dagba mbembedi abakureamo, gu boro niidu na mo ti regbo ngbarago watadu ti  regbo gberãrago. Si naida na bakere asadatise tipa ka banda mbembedi pa bakure wa gure tipa si du nyanyaki. Gure a nga gu rengo du tipa gaani pabakure na Yekova, gu mbembedi Bakure adunga guni berewe wa ko ya. Gaani pabakure na ko nika nyeanye kindi. Ziazia Kekeapai nagumba gupai furani nga: “Oni bánda tironi rogo ga Mbori nyemuse yo.” (Yuda 21) Wai gu rengbe ani ka manga gipai re? Ziazia Kekeapai nakaragapai nga: “Gi nga du na nyemu Mbori re, nga ka ani kuti gako rugute. Gako rugute asusa nga omerani te.”​—1 Yoane 5:3.

4, 5. (a) Gine “ga Mbori nyemuse” ayugoho? (b) Wai gu gamo nyemuse tipa Yekova atona ka sona?

⁴ Ginipai Ziazia Kekeapai ayugoho ho si aya ni “gi nga du na nyemu Mbori re”? Gere afuranga tipa ga Mbori nyemuse tipa rani te ono si nafura tipa gaani nyemuse tipa ko. Ya mo mo natingida pa gu regbo mo atona ka kpinyemu Yekova?

⁵ Mo tingidinga pa wai mo adu ho mo awirikipai ni ni bambataha nga Yekova naida mo raki nyeanye kindi rogo gako vovo zegino. Mo awirikipai tipa agu apai dunduko nga gu ko namangihe tipa ka sa gipai re si mangi, na mo arugu tiro na pa gu nyanyakipa gamahe Yekova afuhe furani ho ko akedi bangisa Wiriko ni ku zegino. (Matayo 20:28; Yoane 8:29; ARomo 5:12, 18) Ho mo awirikipai ni tipa bakio wai Yekova akpinyemu ro, ngbaduroyo afõ ro, na mo atona ka kpinyemu ko a.​—Mo gedi 1 Yoane 4:9, 10.

6. Ginipai kpinyemu boro akodaha? Ginipai gamo nyemuse tipa Mbori asa ro mo mangihe?

⁶ Ono gu nyemuse tipa Mbori re adu gbua nga tonatonapai. Ni kpiapai, ho ani akpinyemu boro ni, ani  namangapai susi gu gbua nga ka pe gu fugo nga “mi nakpinyemu ro.” Nyemuse nasarani ani idi ka manga agu apai nika sa gu boro re ni du na ngbarago. Teketeke a, gamo nyemuse tipa Yekova nasa ro mo idi ka raka ngba gu gene nga gu rengbe ka fu ngbarago fuko. Wa gu nyemuse re asono, mo akpara gamo raka fuko na ki zi bapatiza. Ni manga mo ho wo, mo akidohe tipa ka mangasunge fu Yekova nyeanye kindi. (Mo gedi ARomo 14:7, 8.) Wai gu rengbe mo ka banda gu kidohe re?

7. Ka si du nga ani nakpinyemu Yekova, ginipai ani ka mangaha? Bete gako arugute nga gine?

⁷ Gaani nyemuse tipa Yekova nasarani ani ‘kakuti gako arugute.’ Wai gu ani amanga gipai re? Ni gia ani sangbako. Rogo Ziazia Kekeapai yo, ani nawirika wai Yekova aida ani raki. Ni kpiapai, ko nape gupai furani nga si ni gbegberẽpai ka kpi buda, ka dĩ he watadu ka pe ziree, ka manga kodaba na gu boro mo amanganga rogatise na ni ya, watadu ka iriso boro watadu kura he kuba iriso ko.​—1 AKorindo 5:11; 6:18; 10:14; AEfeso 4:28; AKorosaio 3:9.

8, 9. Wai gu rengbe ani ka ino gupai Yekova akpinyemuhe ka ani gbiatirani na gupai adunga ndiko tipaha rogo Ziazia Kekeapai yo ya? Mo funga kpiapai.

⁸ Ono tipa ka sa ngbarago ti Yekova, si naida ani mangi kura apai amanga susi gu gbua nga ka kakuti gako arugute. Ko atangaranga andiko furani dunduko tipa agu apai rengbe ani ka du rogoho dunduko te. Sidu, regbo nika du kinaho ndiko nikaa dunga rogo Ziazia Kekeapai yo tipa ka gumba gupai furani si aida ani mangihe ya. Wai gu rengbe ani ka manga wene adiaberã? (AEfeso 5:17) Ani nabi bangua arengo rogo Ziazia Kekeapai yo, nga agu arengo nayugopai furani tipa wai Yekova abi apai. Na  wa ani ageda Ziazia Kekeapai, ani naye ka ino Yekova ni ndikidi Boro. Ani nawirikapai tipa gako aberãpai, kodihe na gupai ko akpinyemuhe na agu apai ko asogaha.​—Mo gedi Atambuahe 97:10; Asanza 6:16-19; mo bi gu 1 Rukutu Kekeapai du ti digido gi buku re.

⁹ Ni kpiapai, wai du ani amanga diaberã tipa agu ahe ani abihe rogo terevizioni watadu rogo Internet? Yekova apenga gupai furani nzunzu si aida ani mangihe te. Ono gu bangua arengo ko nafuhe furani rogo Ziazia Kekeapai yo nika undo rani ani mangi wene adiaberã. Badungu aũngbarago areme hi be zuu na pa kodaba. Rogo Ziazia Kekeapai, Yekova nape gupai furani yo nga, ko “nasoga airazuu,” na “airameteka na airabari Mbori asapa ngbanga yo asapa.” (Atambuahe 11:5; AEbere 13:4) Wai gu rengbe gi bangua arengo re ka undo rani ani mangi wene adiaberã? Bara sa kindi ani nabi gupai nga Yekova nasoga pai watadu ko nabihe ni wasiwasihe, si naida ani nehe.

10, 11. Tipagine ani agiasangba Yekova ti ni?

¹⁰ Tipagine ani aka ti ni kuti ga Yekova arugute? Ani akanga kuti ni gbua mbiko gupai nga ani naida ka ne mbusa watadu gu kpakaraapai naye mbiko manga gbegberẽ diaberã te. (AGaratio 6:7) Oó, ani nagiasangba Yekova mbiko ani nakpinyemu ko. Kina wai du tooni agude na nyemu ka sa ngbarago ti bayo, kinawo a, ani aida ka sa ngbarago ti gu Barani du ngbangbaturũ yo. Pai ho ngba susi pa ino ani gupai nga Yekova na ngbarago na ani te!​—Atambuahe 5:12; Asanza 12:2; mo bi gu 2 Rukutu Kekeapai du ti digido gi buku re.

¹¹ Ani agianga sangba Yekova kinaho duhe ni taata furani ani mangihe watadu ho duhe ni nga kurapai ho rengbe ani ka mangaha te te. Ani asianga agu andiko na  arugapai ani aida ka pekafuoho na gu ani aidanga ka pekafuoho ya te. (Pa Fu Rugute ni Ue 12:32) Kuba gure, ani nagiasangbako na ngbadurani yo dunduko, wakina Bake papara Atambuahe naya: “Bambiko mi bi pa gi ngbarago rogo sangbaro nga gu mi nakpi nyemu he.” (Atambuahe 119:47; ARomo 6:17) Ani naida ka du wakina Noa, nayugu gako nyemuse tipa Yekova ni manga ko agu apai dunduko Yekova arugu ko ko mangi he. Ziazia Kekeapai nape gupai tipa Noa nga, “kina wo ko amangi he dũ.” (Bambata Pai 6:22) Ya mo mo naida Yekova gumba pai wa gure tipa ro?

12. Wai gu rengbe ani ka sa ngbarago ti Yekova?

¹² Wai gu du Yekova ho ani agiasangba ko ni? Ani nafu ‘ngbarago ku kpotoko yo.’ (Asanza 11:20; 27:11) Mo berẽnga kurii gipai re! Ani nasa Bakusi zegino dũ ko du na ngbarago ho ani agiasangba ko ni. Ono ko aziongo rani ngbaome ani mangi gipai re te. Kuba gure, ko ima fu ranirii nga ga siapai furani. Gere nayugo gupai nga ani na ranirii ka sia ka manga wenepai watadu gbegberẽpai. Yekova naida gaani nyemuse tipa ko fõ rani ani mangi wene adiaberã nga gu rengbe ka sarani ani du na wene raka.​—Pa Fu Rugute ni Ue he 30:15, 16, 19, 20; mo bi gu 3 Rukutu Kekeapai du ti digido gi buku re.

13, 14. Wai gu ani ainoho nga ga Mbori arugute ni ba kpakarakpakaraha tipa ani irisihe te? Mo funga kpiapai.

¹³ Na ka si du nga ani naberãha nga ga Yekova arugute ima kpakara tipa ani irisihe watadu si nika dia gaani ranirii kusayo? Ziazia Kekeapai nakaragapai ziazia nga: “Gako rugute asusa nga omerani te.” (1 Yoane 5:3) Gu pa-Giriki i asaha nga “asusa nga omerani te” rogoyo nga,  “rõrõi he.” Rogo kura aBaibiri, i mangisunge na gi fugo re ka sakapa agu arugute arunga ya watadu agu aboro naasada ka maapai rii akurayo na ka imisa yo. (Matayo 23:4; Amokedi 20:29, 30) Gu Baibiri nga New English Translation nagumbaha wa gere: “Gako arugute agburianga rani ku sande te.” Ga Yekova arugute ni “rõrõihe” te, naida ka ya, si ni ba nyanyakihe furani ka irisoho te. Agu apai ko asana rani ani mangihe ni kina ruruhe.

¹⁴ Ni kpiapai, ani yanga bawene bakureamo naga ku rogo gu kura kporo, na ni ki gumba gupai foro nga mo undo ni ti tinda gani ahe. Ni ima maa gaani ahe dunduko ku rogo asanduki. Bete agu akuraha ni aakpuraha rengbe boro arengba ka tumbaha nisani, ono agu akuraha naida aboro ue tipa i tumbaha. Ya mo bakureamo rengbe ka sana ro tipa mo tindi gu rõrõihe arengbanga na omero ya? Wagusa te! Tipagine? Bambiko ni aidanga ka imisa ro te. Wakina gu bakure re, Yekova arengbanga ka sana rani ani mangi gupai du ni ba kpakarakpakaraha te. (Pa Fu Rugute ni Ue he 30:11-14) Yekova ima rugatiko na pa rani. Ko ima “ino pa bororani, ko natingida pa rani ya nvutu sende nga ani.”​—Atambuahe 103:14.

15. Wai gu rengbe ani ka inoho nzunzu nga ga Yekova arugute tipa kina gaani wenepai?

¹⁵ Moize agumba gupai fu awiri aYisaraere nga ga Yekova arugute “adú ni wenepai fu yo” na gayo giasangba ‘nika banda yo ni ungayo.’ (Pa Fu Rugute ni Ue he 5:28-33; 6:24) Kina gu bangisa pai re du areme. Agu apai Yekova asana rani ani mangihe nika sa gaani raka si du wenengai. (Mo gedi Yesaya 48:17.) Barani nga Yekova ima ino gupai du ni wenehe tipa rani. (ARomo 11:33) Ziazia Kekeapai nagumba gupai furani nga: “Mbori nga nyemuse.” (1 Yoane 4:8) Gere nayugo gupai nga agu apai  nabaha Yekova agumbaha na gu ko amangaha narurii nyemuse.

16. Wai gu ani ainoho nga ani rengbe arengba ka giasangba wa vurangia ani kpakpa aboro na kini raki rogo gbegberẽ zegino?

¹⁶ Anga si taata ti aregbo dunduko furani ka giasangba Mbori te. Ani naraka rogo gbegberẽ zegino Bakitingbanga azogaha. Ko naˈasada ka sosoda aboro tipa i mangi gupai du ni gbegberẽhe. (1 Yoane 5:19) Ani nasovura a na gaani kpakpa aberã gbiati abipai, mbiko si ima rengba ka sa rani ani basasangba Mbori. (ARomo 7:21-25) Ono gaani nyemuse tipa Yekova nafu ome furani tipa ani mangi gupai du ni ruruhe. Ko nabi gu ome abi ani amangaha ka giasangba ko, na ko naundo rani ni fuko gako ziazia toro furani. (1 Samuere 15:22, 23; Amokedi 5:32) Ziazia toro naundo rani ani sonosi agu asino nasaha furani taata tipa ani gisangba ko.​—AGaratio 5:22, 23.

17, 18. (a) Gini apai ani ka wirikapai tipaha rogo gi buku re? (b) Ginipai ani ka sakapai tipaha rogo gu kapita ngbefuo gere?

¹⁷ Rogo gi buku re, ani ka wirikapai tipa wai ka raka ngba gu gene nafu ngbarago fu Yekova. Ani ka wirikapai tipa wai ka mangasunge na bangua arengo nga ga Ziazia Kekeapai. Mo tingidi gupai nga Yekova aziongo rani ngbaome ani giasangba ko te. Ho ani asia ka giasangba ni, si nasa gaani raka si du ni wenehe na ani ki du na bawene maabangirise tipa raka kumbatayo. Gu nyakipaha kisusi nga, gaani gisangba nika yugo bakio wai fu Mbori ani nakpinyemu ko.​—Mo bi gu 4 Rukutu Kekeapai du ti digido gi buku re.

¹⁸ Tipa ka undo rani ani ini gupai du ni ruruhe watadu gu du ni gbegberẽhe, Yekova ima fu sangbakpotoseyo furani ni basasa dũ. Ka ani raba sangbakpoto rani yo wenengai, si nika undo rani ani “ka kuti gako rugute.” Sidu, ginihe nga sangbakpotoseyo? Ani bingoho.