1, 2. Ginipai si aida ani inihe tipa Satana gbiati adaimona?

RAKA nika ngba ni kerehe rogo ga Yekova vovo zegino. Ani nika raka niyangaraha wagu Mbori aaida ani raki. Ono ani naraka awere rogo gu zegino du kutiibe Satana gbiati gako adaimona. (2 AKorindo 4:4) Wa vura duhe nga ani arengbanga ka bi yo te, i kina ti ni na i na bakere ome tiyo.

² Rogo gi kapita re, ani nika sakapai tipa wai ani narengbe ka nye mbembedi na Yekova na ki bandatirani be Satana. Yekova kidohe nga ko nika undo rani aundo. Ono si naida ani ini agu abirĩ Satana na adaimona amangasunge na ni tipa ka nanga rani na ka zubo rani.

3. Ginipai Satana aida ka manga rani na ni?

³ Satana nagumba gupai nga aboro nairiso Yekova tipa kina agu ahe i agbiaha, na ka apai kpakara furani, ani nambu iriso Yekova nibasa. (Mo gedi Eyobo 2:4, 5.) Ho boro ayugo gupai ni nga ni naida ka wirikapai tipa Yekova, Satana na adaimona nainoho aino, na i ki asadi ka rugusa ni. I na kere zinga ho boro akpara tini ni fu Yekova na ki zi bapatiza. Ziazia Kekeapai naringbisa Bakitingbanga kuti “bahu nata ki nipoi.” (1 Petero 5:8) Satana naida ka gbarasa gaani pagume na Yekova.​—Atambuahe 7:1, 2; 2 Timoteo 3:12.

4, 5. (a) Ginipai Satana arengbanga ka mangaha ya? (b) Rogo gupai yo nga ka “ká fu bakitingbanga” nga gine?

 ⁴ Ono ndupai ho ani gunde be Satana na gako adaimona te. Yekova ambunga gene fuyo i mangi rani na ai gupai i aida ka mangaha te. Yekova kidohe nga, “bakere rimbasa aboro” nga aguyo nga ndikidi aKristano nika bata ti regbo “bakere gberãngbi.” (Yugoti 7:9, 14) Pai ho rengbe Bakitingbanga ka mangaha tipa ka rugusa gupai re ka si mangingo ya te, bambiko Yekova nabanda Gako aboro abanda.

⁵ Ka ani nye mbembedi na Yekova, Satana rengbenga ka gbarasa gaani pagume na Ko te. Fugo Mbori nakido rani  nga: “Yekova nidu na oni, kina ho du oni ni na ko.” (2 Pekapai 15:2; mo gedi 1 AKorindo 10:13.) Badungu ruru akumba na adee bakuru kusayo wa Ebere, Enoka, Noa, Sara, gbiati Moize aima ká fu Bakitingbanga ni nye yo mbembedi na Yekova. (AEbere 11:4-40) Ani ima rengba ka manga gu ngisapai re a. Fugo Mbori nakidohe nga: “Oni ká fu bakitingbanga, ko ki oro be roni.”​—Yakoba 4:7.

6. Wai du Satana azubo rani?

⁶ Wa vura duhe nga Satana ima ino gupai nga Yekova ambunga gene fuko ko mangi rani na gupai ko aidaha te, ko naasada kindi ka manga agu apai rengbe ko ka mangaha tipa ka rungburasi gaani pagume na Mbori. Areme, Satana nazubo rani rogo dungu agene nga gu du ni bakiakia, na ko namangasunge na agu abirĩ ko aima digo ni mangisunge na ni tipa akutu agarã. Bete agu abirĩ re nga gine?

7. Tipagine Satana azubo ga Mbori aboro ti ni?

⁷ Gu mokedi nangia Yoane akepai ki ya: “Zegino dunduko du ni zogozogo ho be gbegberẽ ko.” (1 Yoane 5:19) Satana na ome kurii gi gbegberẽ zegino re na ko naida kadu na ome kurii ga Yekova aboro a. (Mika 4:1; Yoane 15:19; Yugoti 12:12, 17) Bakitingbanga ima ino gupai nga kiingo gu regbo berewe nye fuko te, sidu, ko nasosoda rani dunduko nyanyaki tipa gupai nga ka ani dunga ni ruru rani fu Mbori ya. Kura aregbo, Satana namangasunge na agu azubohe i abihe abi, ono kura aregbo, ko namangasunge na agu azubohe i abingo ho abi ya.

8. Ginipai si aida aKristano inihe ni basasa dũ?

⁸ Ani nageda gupai rogo AEfeso 6:12 nga: “Gaani kenahe sa . . . agu atoro nga ga gbegberẽpai yo rogo agu arago du ngbangbaturũ yo.” AKristano ni basasa dũ nasovura kuti Bakitingbanga gbiati adaimona. Si naida ani ini gupai  nga, agu aboro dũ kpara gayo raka fu Yekova naso gi vura re. Rogo gu waraga yo gu mokedi nangia Pauro akehe fu aEfeso, ko angarasi aKristano bara biata i “ru” nyanyaki.​—AEfeso 6:11, 13, 14.

9. Ginipai Satana na adaimona aˈasada ka manga rani na ni?

⁹ Satana na adaimona naasada ka nanga rani ngba badungu agene. Pa ka ani fu Satana ngba kura gene ayugongo gupai nga ko arengbanga ka diabe rani ngba gu kura gene ya te. Bakitingbanga naasada ka ino bara gaani arungbura tipa gupai nga ko rengbe ka sia gu gbina nika zio rani. Ono si aidanga ko zi rani te, bambiko Baibiri nayugopai ayugo furani tipa agu agbina nga ga Bakitingbanga. (2 AKorindo 2:11; Mo bi gu 31 Rukutu Kekeapai du ti digido gi buku re.) Gbina sa dagba agu agbina re nga sino adaimona.

10. (a) Gine nga sino adaimona? (b) Wai du Yekova abi sino adaimona?

¹⁰ Sino adaimona nakoda gu iˈiriwoapai nga gu nasa boro ni fura na adaimona, wagu nga gumba agu apai du kumbatayo, sunge abinza, maa ngua, watadu asada ka fura na kpikpi aboro. Baibiri nagumba gupai furani nga, sino adaimona nga “kere gbegberẽ” pai na ani arengbanga kaa manga sino adaimona na ti kina gu ngisa regbo re ani kini irisi Yekova te. (Pa Fu Rugute ni Ue he 18:10-12; Yugoti 21:8) Si naida aKristano ne angbatunga sino adaimona dunduko.​—ARomo 12:9.

11. Nyemu inopai tipa i iˈiriwoapai rengbe ka gberani ku wari?

¹¹ Satana ima ino gupai nga ka ani du na nyemu ka inopai tipa iˈiriwoapai, si nika du taata fuko ko gbe rani ku rogo sino adaimona. Angbatunga sino adaimona dunduko rengbe ka gbarasa gaani pagume na Yekova.

12. Wai du Satana aida ka gbarasa berãrani?

¹² Satana naasada ka tudo gu berã nga ga aboro. Ko narimiso kapa ku berã aboro yo yeeye, ki sayo i naaya “ti gbigbitapai, wenepai, na ti wenepai, gbigbitapai.” (Yesaya 5:20) Bakitingbanga nasonosa gu bipai nga agu arugute nga ga Ziazia Kekeapai afunga undo te na ani rengbe kadu na bakere ngbarago ka ani abasa ga Mbori arugute.

13. Wai du Satana aasadi ka rimiso kapa ku berã aboro yo?

¹³ Urugo kapa ku berã aboro yo dagba agu abirĩ Satana naima du na diabese rogoho. Ko aima digo nimangisunge na ni tipa gbanga regbo. Ati Edene yo, ko aasadi ka rimiso kapa ku berã Eva yo ho ko asana ri ni nga: ‘Ati Mbori aya, Ka oni rí nga agu angua du ati yo dunduko ya?’ (Bambata Pai 3:1) Kusa ti rago Eyobo, Satana asana Yekova ku bangiri amaraika ki ya: ‘Eyobo nagunde ti Mbori gbua?’ (Eyobo 1:9) Tingbafuo Yesu zi bapatiza, Satana aya fuko: ‘Singia Wiri Mbori nga mo, mo gúmba ha fu agi ambia re si sa tihe ni kpokuta.’​—Matayo 4:3.

14. Wai du Satana narengbe ka sa aboro i naakapa singia gberẽ sino adaimona agberã?

¹⁴ Areme, Satana nandu kumbatayo kindi kaa rimiso kapa ku berã aboro yo. Ko naasada ka sa aboro i naakapa singia gberẽ sino adaimona agberã ni maa ko kura angbatungaha si naangera wa gupai adunga bapai ti ni ya. Zavura kura aKristano ima vurasi berãyo kuti gu kerepai du ti ni. (2 AKorindo 11:3) Sidu, ginipai rengbe ani ka mangaha tipa ka banda tirani? Ginipai rengbe ani ka mangaha tipa ka Satana nangingo rani na gako abirĩ ya? Ani wisigingo agene ue nga gu rengbe ko ka nanga rani ngbaha: aũngbarago gbiati agene husa.

15. Wai du rengbe ani ka rimiso tirani ku rogo sino adaimona vurube gaani aũngbarago?

¹⁵ Areme, badungu afirimi, avidio, agu apai do rogo terevizioni, ambaro kompiuta, gbiati agu abangiriba nga ga Internet na agu apai rogoho nga ga adaimona, sunge ngua, na iˈiriwoapai. Badungu aboro nabi agu ahe re nga si nga agu aũngbarago adunga gbegberẽpai ti ni ya na i ainongo gu kerepai du ti mbu adaimona i ye ku rogo gayo raka te. Boro ima rengba ka rimiso ti ni ku rogo sino adaimona vurube ba awede, kota wene ndue watadu gbegberẽ ndue, suka sangu ho uá akpara ni, iwa, ba dakpa, vo kura, kiso fogogude ku dimoyo na gbaka, gbiati bakabangirise be fugo gbuku. Bakitingbanga naigo gu kerepai aigo du ti gu ngbatunga mangaapai re na ki saha si naangera wa gupai ka boro aruganga tini na ni ya, du ni wenehe, na nga gu nafu ngbarago. Boro ima rengba ka berã gupai nga ka si du nga ni amanganga sunge adaimona amanga nzunzu te kerepai ho du ti bi guhe du na sino adaimona rogoho watadu iˈiriwoapai te. Gini kerepai du ti du na gu ngbatunga berã re?​—1 AKorindo 10:12.

16. Tipagine si aida ani sogo agu aũngbarago ti ni du na iˈiriwoapai rogoho?

¹⁶ Satana na adaimona arengbanga ka ino gupai du berãrani yo te. Ono i ima rengba ka ino gupai du nyemuhe tirani na wai ani aberã ni wisigo yo agu asiapai ani amangaha tipa tirani na tipa gaani ngbadimokporo, kodihe na gu gaani asiapai nabipa aũngbarago. Ka ani sia agu afirimi, amanzigo, watadu abuku nga gu du tipa sangba atoro, sunge abinza, akpiirĩ, airamangu, agbekure, watadu gu du tipa kura asino adaimona, Satana na adaimona ini gupai aino nga ani na nyemu ka inopai tipa yo. Ho nga ni re, i  kini asadi ka rimiso rani dudunguro ku rogo sino adaimona yo.​—Mo gedi AGaratio 6:7.

17. Wai du Satana narengbe ka mangasunge na gu gaani nyemupai nga ga du na kpotorani wenengai?

¹⁷ Satana ima rengba a ka mangasunge na gu nyemuapai du ani na ni nga kpotorani du wenengai zanga kaza. Areme, badungu aboro du kpotoyo kpokorokpokoro be akaza. Boro ima rengba ka asada dungu agene husa ka ni ahunga ya. (Marako 5:25, 26) Ni ima rengba kadu zanga maabangirise si ki da tini nga ai gu gene husa duho du ni na nyemu ka asadaha. Ono wangia ani aKristano, si naida ani du na rubangirise ka zanga sia agu agene husa nga gu nakoda “irairapai” watadu sino ngua.​—Yesaya 1:13.

18. Gini gene husa si aida Kristano nehe?

 ¹⁸ Rogo gu ringara aYisaraere naadu mbata, kura aboro kinaho namangisunge na “irairapai” watadu sino ngua. Yekova agumba gupai fuyo nga: “Ho oni ka nitaĩ beroni ni, mi aóka bangire be roni; ii, ho oni ka nikpári kpe ni ni dungu he, mi ayé nga ture sa ni te.” (Yesaya 1:15) Mo berẽnga gipai re, Yekova aká ka degatuko kuti gayo kparakpee! Si aidanga ani mangi ai gupai nga gu rengbe ka gbarasa gaani pagume na Yekova na ki sako ko du tuturũ tirani te, gu susi asusa gbe nga ho ani awoka ni. (Atambuahe 41:3) Sidu, ho ani abi gene husa ni nga gu ani aida ka mangaha, si naida ani wisigihe singia si na ngbanya dagbaha na sino adaimona watadu iˈiriwoapai. (Matayo 6:13) Ka ani bi gupai nga wiri ngbanya kina dagbaha na ni, si naida ani nehe!​—Mo bi gu 32 Rukutu Kekeapai du ti digido gi buku re.

19. Wai du Bakitingbanga nasa aboro i du na gunde?

¹⁹ Wa duhe nga kura aboro naberãha nga Bakitingbanga gbiati adaimona nga kungbo sangbariiyo, kura aboro ima ino gupai nga i nga ndikidi aboro mbiko agu apai agu aboro re nasusi rogoho. Badungu aboro naraka rogo bakere gunde be gbegberẽ atoro na i nga akanga fu gu sino mangaapai adunga rogoyo ti ni ya. Agu akurayo nasa aboro i naagunde be adaimona ni gumbayo agu apangbanga nga adaimona namanga aboro na kereapai. Dedede, aboro na nyemu kaa gia agu apangbanga re na i na ngbarago ka gumba agu apangbanga re fu kura aboro. Na agu apangbanga re nasa aboro i naagunde be Bakitingbanga.

20. Wai du rengbe ani ka urugo agu aziree nga ga Satana?

²⁰ Mo berẽnga kurii gipai re, Satana naida aboro  naagunde beko. (2 ATesaroniko 2:9, 10) Ko nga gu iraziree naima ino wai ka nanga rii agu aboro yo du na nyemu sino adaimona na ki sayo i idi kuti agu apai nga gu adunga ni rengo ya. Gu ngbatunga aboro re rengbe ka peka agu apangbanga i aberãha nga i abihe na ki gihe. Wa aboro nikaa dogoda agu apangbanga re, i natona kaa ba tikpo ti ni. Si aidanga ani undo Satana ti gupai ko amangaha nga ga ba gunde ti aboro ni dogoda ani gu ngbatunga apangbanga re te.​—Yoane 8:44; 2 Timoteo 2:16.

21. Kuba gupai nga ani naagumba agu apangbanga du tipa adaimona, ginipai rengbe ani kaa fura tipaha?

²¹ Ka si du nga boro dagba ga Yekova aboro yo agbia tini mbata na agu apai nga ga adaimona, si aidanga ni naape paha tipa ka sa ngbarago ti aboro te. Ndupai ho ga Yekova aboro gunde be gupai rengbe Bakitingbanga na gako adaimona ka mangaha te. Kuba gure, si naida ani moi berãrani fuo Yesu gbiati gu ome Yekova nafuhe fuko. (AEbere 12:2) Yesu anaapenga agu apangbanga du tipa adaimona fu gako abawiriki kaa sa ngbarago tiyo te. Ko amoi berãko fuo gu pangbanga nga ga Kindo gbiati “agu apai du na tandu nga ga Mbori.”​—Amokedi 2:11; Ruka 8:1; ARomo 1:11, 12.

22. Ginipai mo nadiberã ka mangaha?

²² Ka bangirani gonga ti gupai nga ga Satana sásá nga ka gbarasa gaani pagume na Yekova ya. Ko nika asada ai pai tipa ka sa gu gako sásá re si mangi. Ono ani ima ino ga Bakitingbanga abirĩ na ani ima diaberã ka ká angbatunga sino adaimona dũ. Ani ‘ambakadanga gene fu bakitingbanga’ ko rungburasi gu gaani diaberã re te. (Mo gedi AEfeso 4:27.) Nirengo, ka ani ká fu Bakitingbanga, ani zingo ti gako agbina te na Yekova banda rani abanda.​—AEfeso 6:11.