1-3. (a) Wai du kura aboro abi gayo sunge? (b) Gini asanahe ani nika wisigopai tipaha rogo gi kapita re?

ABORO rogo zegino dunduko namangasunge nyanyaki tipa ka undo tiyo gbiati gayo aborokporo. Dungu aguyo akpingo nyemu gayo asunge ya, na aguyo na ngbarago ka ndu kuba gayo asunge yo na aˈuru dũ te. Ka si du nga wo du mo, ginipai rengbe mo ka mangaha ka gbia ngbarago rogo gamo sunge? Wai du rengbe mo ka du na ngbarago na gamo sunge?

² Yekova naya furani wẽ: “Ga Mbori gamahe fu aboro ni ba sa sa nga ri riahe ki mbiri he, ki du na ngbarago ti ni rogo gani sunge dunduko.” (Batungusipai 3:13) Yekova akusi rani na gu nyemupai nga ani du na nyemu ka mangasunge. Ko naida ani du na ngbarago be gupai ani amangaha.​—Mo gedi Batungusipai 2:24; 5:18.

³ Ginipai tie rengbe ka undo rani ani gbia ngbarago ti gaani sunge? Gini ngbatunga asunge si aida aKristano nehe? Wai du rengbe ani kaa mangasunge amanga kini irisi Yekova? Na gini nyanyakipa sunge du ho si aida ani mangihe?

4, 5. Ga Yekova bipai nga gine tipa sunge?

⁴ Yekova nitiko ima kpinyemu ka mangasunge. Bambata  Pai 1:1 naya: “Ho rago aenge ni Mbori afu ngbangbaturũ na kpotosende.” Tifuo Mbori nyasi mbakada kpotosende na agu ahe dũ du rogoho, ko aya gako kusikusi ahe adu “ni wene he gbe.” (Bambata Pai 1:31) Rago aima ngba ti bakusirani na agu ahe ko akusihe.​—1 Timoteo 1:11.

⁵ Yekova aambunga mangasunge te. Yesu aya: “Buba namanga sunge amanga kindi a.” (Yoane 5:17) Wa vura duhe nga ani ainongo pai tipa gu weneapai dunduko Yekova adigi nimangihe te, ani ima inopai tipa bete agu. Ko aima digo ni sia agu aboro nika zogarago na Wiriko nga Yesu Kristo ni papara gu Kindo re. (2 AKorindo 5:17) Yekova nangbe kumbatayo fu aboro na kini ngerefuo yo a. Ni sangbana gu tungusapai namanga rogo zegino dũ, amirioni aboro naye ka ino Yekova na du na gu maabangirise nga ga raka nyeanye kindi rogo paradizo auru kpotosende.​—Yoane 6:44; ARomo 6:23.

6, 7. Gini ngbatunga bamangisunge nga Yesu?

⁶ Wakina Bako, Yesu ima kpinyemu sunge a. Mbata fu Yesu ye ku auru kpotosende no, Ko angia ga Mbori “bangbasia boro sunge,” i akusi agu ahe sa du ngbangbaturũ yo na gu du auru kpotosende no. (Asanza 8:22-31; AKorosaio 1:15-17) Ho Yesu adu ni auru kpotosende no, ko aandu kumbatayo kindi kaa mangasunge nyanyaki. Wa ko angia paranga kumba, ko awiriki wai kadu ni gu bakpengua du na tatamana, si nawira wa ko anaakpengua na kini meke abambu. Yesu aamanga gako sunge wenengai si ki da nga aboro naayamba ko nga “basekengua.”​—Marako 6:3.

⁷ Wa vura duhe wo, gu sunge paha anyaki gbe fu Yesu mbuko auru kpotosende ane angia tungusa wene pangbanga na yugopai fu aboro tipa Yekova. Agarã adu gbua fuko bita na beberehe tipa ko nyasi gako sunge tungusapai, na ko anaamangasunge tona ngbatutu wiso ki da ku yuru.  (Ruka 21:37, 38; Yoane 3:2) Yesu anaandu akama amairo ngba agu agene du na nvutu ngbaha kaa tungusa wene pangbanga fu dungu aboro.​—Ruka 8:1.

8, 9. Tipagine Yesu agbia ngbarago ti ni ti gako sunge?

⁸ Tipa Yesu tigako, manga ga Mbori sunge adu fuko wakina riahe. Gi sunge re du nanaafu ome fuko. Kura aˈuru adu kinaho Yesu amangisunge ka regbo adunga beko tipa ko ri riahe ya. (Yoane 4:31-38) Ko amangisunge na agu amomu dunduko ko anaagbiaha ka yugopai fu kura aboro tipa Bako. Si du ko arengbe ti ni ka ya fu Yekova: “Mi taasi rimoro rogo kpotosende, mi nyasi gu sunge fu mo fere mi mangi he.”​—Yoane 17:4.

⁹ Si tie ziazia nga, Yekova gbiati Yesu namangasunge nyanyaki na i nagbia ngbarago agbia ti gayo sunge. Ani naida ka da a ni ‘awíriki Mbori,’ na ani naida ka ‘peka fuo [Yesu]’ mbembedi. (AEfeso 5:1; 1 Petero 2:21) Si nga ndu gupai ani aasada ti ni ka manga agu asunge ani amangaha nyanyaki na omerani dũ.

10, 11. Ginipai rengbe ka undo rani ani du na ruru bipai tipa gaani sunge?

¹⁰ Wangia ani ga Yekova aboro, ani namangasunge nyanyaki ka undo tirani gbiati gaani aborokporo. Ani naida rago ngba tirani na gu sunge ani amangaha, ono si ima rengba kadu ni kpakarapai. Sidu, ginipai rengbe ani ka mangaha ka sidu nga ani agbianga ngbarago ti gaani sunge te?

¹¹ Mo du na ruru bipai. Ka ani arianga gu ba ani amangasunge rogoho watadu gu bakio regbo ani amangasunge kuti ni te, ono ani ima rengba ka aria gaani bipai. Pa ruga ani tirani na gupai Yekova aidaha berani ima rengba ka undo. Ni kpiapai: Yekova naida bariikporo ngerefuo agu  azingo nga ga gani aborokporo wa rengbe ome ni na ni. Nirengo, Baibiri naya gu boro kaa ngera nga fuo gu zingo nga ga gani aborokporo ya ni “gberẽ susi gu ni aida nga pai ya.” (1 Timoteo 5:8) Ka singia bariikporo nga mo, mo mangisunge nyanyaki ka ngerafuo gamo aborokporo. Singia mo kpinyemu gu sunge mo amangaha watadu mo akpingo nyemuhe te, mo ini gupai nga ho mo angera ni fuo gamo aborokporo, gure nga mo na sa ngbarago ti Yekova a.

12. Wai du mangasunge nyanyaki gbiati du ni irarengo afu undo furani?

¹² Mo du ni nyanyaki bamangisunge na ni irarengo. Gere rengbe ka saha foro taata mo gbia ngbarago ti ga sunge. (Asanza 12:24; 22:29) Ndupai sa nga, gamo bairasunge nika duadu na kido kuti ro. Agu aboro nafu sunge fu aboro naida na agu aboro nga airarengo mbiko i adĩngo gayo marã, gayo ahe, watadu gayo regbo te. (AEfeso 4:28) Gu nyakipaha anyaka gbe nga, Yekova ima ino gu regbo mo amangasunge nyanyaki na kidu ni irarengo. Mo ima rengba kadu na “wene sangba kpoto yo” mbiko ino mo gupai nga mo nasa ngbarago ti gu Mbori mo akpinyemu ko.​—AEbere 13:18; AKorosaio 3:22-24.

13. Gini kurapai berewe rengbe ka manga mbiko du mo ni irarengo basunge yo?

¹³ Mo ini gupai nga gamo mangaapai basunge yo ima rengba ka taasa rimo Yekova. Gere nafu kura ndupai furani ani gbia ngbarago ti gaani sunge. (Tito 2:9, 10) Si ima rengba kadu nga kura kuaro basunge yo ima rengba ka ida ka wirika Baibiri mbiko gamo wene kpiapai.​—Mo gedi Asanza 27:11; 1 Petero 2:12.

14-16. Ginipai si aida ani wisigihe ho ani asia sunge ni?

¹⁴ Baibiri atangaranga pa gu ngbatunga asunge si aida  Kristano mangihe na gu si aidanga ni mangihe ya te. Ono si na bangua arengo rogoho nga gu rengbe ka undo rani ani mangi wene diaberã nibipa sunge. (Asanza 2:6) Ni manga ani sunge na gu bangua arengo nga ga Baibiri, ani rengbe ka sana tirani na agi asanahe du re.

¹⁵ Ya mo gi sunge re nika ida mi mangi gupai Yekova naya si angbanga te? Ani ima wirikapai tipa agu apai Yekova asogaha, wa gu nga dĩ gbiati peziree. (Gate 20:4; Amokedi 15:29; AEfeso 4:28; Yugoti 21:8) Sidu, ani na rubangirise ka ne gu sunge andunga kuti ga Yekova gene mangaapai ya.​—Mo gedi 1 Yoane 5:3.

 ¹⁶ Ya mo gi sunge re nasongoda watadu nasonosa gu mangapai Yekova asogaha? Ni kpiapai, na ka i ya i fu gu sunge foro nga ga dia aboro kugume ngbadimo gu bambungua i aba agude rogoho? Pai ho gberẽ ti mangasunge dia aboro kugume te. Ono mo ima ino ga Yekova bipai tipa ba gude. Sidu, wa vura duhe nga mo ni tiro nikaa ba agude te, ya mo mo arengbanga ka bihe nga ringbisihe kuti ga Yekova bipai mo ima fu bee sa gu ingapai re te?​—Gate 21:22-24.

17. Ginipai rengbe ka undo rani ani amangi gu diaberã rengbe ka sa ngbarago ti Mbori?

¹⁷ Ni manga ani sunge na gu bangua arengo nga ga Baibiri, ani rengbe kadu ni gu ngbatunga aboro i nafura tipa yo rogo AEbere 5:14, “nga agu yo rengbe gayo berã na wisiga pa wenepai na gbegberẽpai, mbiko manga yo pai na ni.” Mo sananga tiro nga: ‘Ka mi idi pa gi sunge re, ya mo si kotosi kura aboro? Ya mo gi sunge re asa re mi mbu diare gbiati awire ka ga ku rogo kura ringara? Gini maapai rengbe gipai re kadu na ni kuriyo?’

18. Ginipai rengbehe kadu ti ni ni kparakakparakaha ani gbe berãrani kuti gaani irisombori?

¹⁸ Si ima rengba ka du ni mbumbuhe ani peresipa iriso Yekova rogo gi “gbegberẽ rago” re. (2 Timoteo 3:1) Gbia sunge na ka bandapa ha ima rengba kadu ni kpakarapai. Si naida ani ngere angerafuo gaani aborokporo, ono ani ima ino gupai nga gaani irisombori nga bambatapai rogo gaani raka yo. Ani arengbanga ka mbu aũzegino si da ni nyanyakipa he kisusi rogo gaani raka yo te. (1 Timoteo 6:9, 10) Sidu, wai du rengbe ani ‘ka ida pa agu apai nangba’ do rogoyo nga ka rugatirani na pa agu apai nyakipaha gbe na ti  kina gu ngisa regbo re ani kini ngere angerafuo gaani aborokporo?​—AFiripoio 1:10.

19. Wai gu du kido kuti Yekova narengbe ka undo rani ka ani funga tirani tipa kina sunge ya?

¹⁹ Mo kido kuti Yekova na ngbaduro yo dũ. (Mo gedi Asanza 3:5, 6.) Ani ima ino gupai nga Mbori ima inopa agu ahe nzunzu ani aidaha na ko nangera angerafuo rani wenengai. (Atambuahe 37:25; 1 Petero 5:7) Fugoko naya furani wẽ: “Ka oni dú nga ni akanga fu nyemu marã ya; agu ahe du be roni si ki rengbe bangironi, bambiko ko aya tigako, ‘Mi ahe nga unda ro wa sa te, mi ambú nga ro a wa sa te.’” (AEbere 13:5) Yekova aidanga ani ni bakibangirani abaka ti aregbo dũ tipa pa ngerafuo gaani aborokporo te. Dedede, ko aima yugo gupai nga ko rengbe arengba ka ngerafuo gu zingo nga ga gako aboro. (Matayo 6:25-32) Ka si vura du nga ani namanga kina gini ngbatunga sunge vurũ, si naida ani naawisigo Fugo Mbori dedede kini tungusipai na kini ndu tipa gaani adunguratise.​—Matayo 24:14; AEbere 10:24, 25.

20. Wai du rengbe ani ka sa gaani raka taata?

²⁰ Mo rugu bangiro kuti iriso Yekova. (Mo gedi Matayo 6:22, 23.) Gere nayugo gupai nga si naida mo sa gamo raka si du taata tipa gupai nga mo moi berãro sa tipa kina iriso Yekova. Ani ima ino gupai nga si ni pamungo ka ani mbu marã, wene gene raka, watadu gu vovo ahe nakura awere si du na nyanyakipaha furani kisusi gaani pabakure na Mbori. Sidu, Ginipai nika undo rani ani peresipa agu apai mbatayo si aida ani peresipaha? Si naida ani mangi ome nyanyaki ka zanga du na bape kurirani. Ka si dunga bape kina kuri ro awere, mo mangi mbakadapai tipa ka zogosa betehe watadu ka gasaha dũ. Ka ani adunga na rubangirise ya, aũzegino ima rengba ka dia bakere gaani  regbo na gaani ome na ka regbo adunga berani ka manga kparakpee, ka wisigopai, watadu ka tungusapai ya. Kuba gupai nga ka mbu aũzegino si sa gaani raka ni kpakarakpakaraha, si naida ani wiriki ka rengba kina be agu ahe si aidaha tipa boro, du wa “riahe na roko.” (1 Timoteo 6:8) Ka kina ginipai vura du tipa rani vurũ, si ni wenepai ani ni sungu kini wisigi agu apai du tipa rani ka bi wai rengbe ani ka mangasunge fu Yekova bakere gbe.

21. Tipagine du si aida ani diberã ti ni tipa gupai du ni bambataha rogo gaani raka yo?

²¹ Mo peresipa agu apai mbatayo du na nyanyakipaha. Si naida ani mangisunge na gaani regbo, gu ome du  tirani, gbiati gaani aũborose na tatamana. Ka ani adunga na rubangirise ya, agu apai anyakanga paha ya wa gu nga, wirikapai watadu marã, nika dia gaani regbo adia. Yesu aya: “Oni gbáta gako [Kindo] mbata.” (Matayo 6:33) Gu sia pai ani amangaha, asino rani, agu apai ani amangaha na aˈuru dũ, gbiati gaani asásá nayugopa gupai du rogo bambata bangiriba ngbadurani yo.

22, 23. (a) Wangia ani aKristano, gini nyanyakipa sunge du berani? (b) Ginipai nika undo rani ani gbia ngbarago ti gaani sunge?

²² Gu nyanyakipa sunge kisusi du berani nga ka iriso Yekova na ka tungusa wene pangbanga fu kura aboro. (Matayo 24:14; 28:19, 20) Si naida ani mangi gu sunge re na ome rani dũ kina wai Yesu amangihe a. Kura aboro ima ga kaa tungusapai rogo agu arago du na bakere zingo abatungusipai rogoho. Gu kura aboro nawirika gu kura afugo tipa ka tungusapai fu agu aboro nape agu afugo re. Mo fura na agu aboro mangi agu apai re, na ki sanayo tipaha. I nika gumba gupai foro nga raka yo ima ye ka hi be ngbarago na si awere na bakere rogoyo ti ni.​—Mo gedi Asanza 10:22.

²³ Areme, badungu rani si aida ani di badungu asaa ku basunge yo watadu ani mangi dungu asunge tipa ka ngerafuo agu azingo nga ga gaani aborokporo gbua. Yekova ima inopai tipa gupai re, na ko nabi agu apai abi dũ ani amangaha tipa ka ngerafuo gaani aborokporo na nyanyakipaha. Sidu, ani wirikinga Yekova awirika gbiati Yesu ni manga ani sunge nyanyaki, ka ani vura kaa manga kina gini ngbatunga sunge vurũ. Na ani tingidinga gupai atingida nga, gu nyanyakipa sunge kisusi du berani nga ka iriso Yekova na ka tungusa gu wene pangbanga nga ga ga Mbori Kindo. Gure du nika ye na ndikidi ngbarago furani.