1, 2. Ginipai rengbe ani ka mangaha tipa ka nye rogo ga Mbori nyemuse yo?

ANI dunduko naida kadu ngangarã na kidu na wene kpotorani. Sidu, ani naasada ka ri wene riahe, kaa manga mangonvo dedede na kini ngerefuo kpotorani. Wa vura duhe nga bakere ome si aidaha, ani nagbia ngbarago agbia ti sangbanaha, sidu, omerani abatanga te. Ono si naida ani duadu a ngangarã na wene kpotorani rogo kura bangiriba.

² Wa vura duhe nga ani ima manga gu wene diandue nga ka ino Yekova, si naida ani banda gaani pagume na ko si du ni nyanyakihe. Ho Yuda angarasi aKristano ni nga, “oni bánda tironi rogo ga Mbori nyemuse yo,” ko asakipa wai fuyo si aida i mangihe. Ko aya fuyo: ‘Oni sonosi tironi rogo gaoni ziazia idapase.’ (Yuda 20, 21) Sidu, wai du rengbe ani ka sonosa nyanyaki idapase?

3-5. (a) Wai du Satana aida mo naabi ga Yekova arugute? (b) Gini bipai du mo na ni tipa ga Yekova andiko gbiati gako arugute?

³ Si ni nyanyakipa pai mo idi kuti gupai nitiro nga ga Yekova agene ngba kisusi. Satana naida mo niberẽ gupai nga ga Yekova agene ima kpakara boro raki kuti ni na mo  nika du na ngbarago kisusi ka si du nga mo du na sia gupai mo abihe nga si du ni ruruhe watadu si ni irairaha. Naatona kina ati Edene yo, Satana ima asada ka sa aboro i idi kuti gipai re. (Bam. P. 3:1-6) Na areme, ko namanga ome nyanyaki kindi.

⁴ Ya mo ru ga Satana pai aru? Ya mo ga Yekova arugute ni kere dingisoro furani? Oó. Ni kpiapai, mo berẽnga gupai nga mo na ta rogo gu ba i naabanda anya rogoho. Mo kini bi ndugu nga gu nadada kura ba. Mo ima rengba ka berã gupai nga, ‘Tipagine gi ndugu re akiso gene ti ni bere?’ Ono ti gu regbo re, mo kini gi paa bahu u ni gbungu ku vuru gu ndugu re yo. Gini bipai du mo na ni awere tipa gu ndugu re? Mo na tambuahe nga si nabanda ro bahu andu ka rita ro! Ga Yekova arugute wakina gu ndugu re, na Bakitingbanga tigako wakina gu bahu re. Fugo Mbori naza rani nga: “Oni dú na rugatise ki ningere; bambiko wa bahu nata ki nipoi, nigbata boro ka rita ni, kina wo vuraroni nga bakitingbanga nata.”​—1 Petero 5:8.

⁵ Yekova naida ani raki gu raka ngba kisusi. Ko aidanga Satana nangi rani te. Si nga ndu gupai ko na fu andiko ti ni gbiati arugute si nibanda rani na kini sarani ani du na ngbarago. (AEfeso 6:11) Yakoba akepai ki ya: “Gu ni nangana gu ziazia rugute nga ga raniri, ki nye rogo ho . . . i afu maku afu fu ni rogo gani manga sunge.”​—Yakoba 1:25.

6. Wai du rengbe ani ka ida kuti gupai nga ga Mbori arugute ngba kisusi?

⁶ Ho ani apekafuo ga Yekova arugapai ni, gaani raka nada ni wenehe na gaani pabakure na ko nada ni ba nyanyakihe. Ni kpiapai, ani nagbia undo agbia ho ani adia gu gako yambahe ni kugume nga ga kpara fuko dedede. (Matayo 6:5-8; 1 ATesaroniko 5:17) Ani na ngbarago ho ani amangapai ni kuti gu gako rugapai nga ani dunguratirani  ka iriso ko na ka nyakasa akuarani gbiati ho ani afu tirani ni kakaka kuti sunge tungusapai gbiati yugopai. (Matayo 28:19, 20; AGaratio 6:2; AEbere 10:24, 25) Ho ani aberã ni kuriipa wai agi apai re naundo rani tipa ani banda gaani idapase nyanyaki, si nasarani ani idi kuti gupai nzunzu nga ga Yekova arugute ngba kisusi.

7, 8. Ginipai rengbe ka undo rani ka ani naabakanga bangirani tipa agu aˈasada rengbe ka ye kumbatayo ya?

⁷ Ani rengbe kaa bakabangirani nga kumbatayo, ani nika gbia tirani na kpakarakpakaraha asada kuti gaani idapase kisusi. Ka si du nga mo aima berãpai wa gu re, mo tingidi gi fugo Yekova du re: “Ya Yekova wẽ, nga gu Ko natumo ro, nga ga Yisaraere Ziazia Ko; ‘Mi nga Yekova ga Mbori, nayugo pai foro sa u, nga gu ko nangbe ku mbata yo foro ngba gu gene mo ka ndu ngba ha. Akõ! ka  mo adege turo sa gimi arugute! Si du ka ga zereda adu ti ni wa di, na ga rurupai wa ngiri baime.’”​—Yesaya 48:17, 18.

⁸ Ho ani agiasangba Yekova ni, gaani zereda nada wakina gu ime kaa ugudanga ya, na gaani rurupai nada wakina gu ngiri baime nga gu ni naagangia ti aregbo dũ ku pangba baime. Ka kina ginipai vura kaa manga vurũ rogo gaani raka, ani ima rengba kadu ni rururani. Baibiri kidohe nga: “Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.”​—Atambuahe 55:22.

9, 10. Rogo gupai yo nga ka nyaka nga gine?

⁹ Wa mo nikaa nyakasa gamo pagume na Yekova, mo nika susa ‘ku mbata yo dati du mo ziazia,’ watadu dati nyaka. (AEbere 6:1) Rogo gupai yo nga ka nyaka nga gine?

¹⁰ Ani adanga ni nyanyaki aKristano mbiko gupai gbua nga garã rani nange te. Tipa ka nyaka, ani duwa ka ani sa Yekova ni wene Bakurearani na kini asadi kaa bi apai kina wai ko abihe. (Yoane 4:23) Pauro akepai nga: “Agu yo du sangba borose yo i naberã agu apai nga ga borose, ono agu yo du sangba Toro yo i naberã agu apai nga ga Ziazia Toro.” (ARomo 8:5) Nyanyaki boro agbenga berãni kina kuti gani aũngbarago watadu aũzegino te. Kuba gure, ni nagbe berãni kuti iriso Yekova na kini mangi siapai na tatamana rogo raka yo. (Asanza 27:11; mo gedi Yakoba 1:2, 3.) Ni ambunga ti ni fu irairapai te. Nyanyaki boro ima ino gupai du ni ruruhe na ni na diaberã ka mangaha.

11, 12. (a) Ginipai Pauro agumbaha tipa agu aKristano rengbe “gayo berã na wisiga pa wenepai na gbegberẽpai”? (b) Wai du du pada ni nyanyaki Kristano sa wakina pada ni bangi ambaro?

 ¹¹ Nyanyaki asadatise du si aidaha tipa ka da ti nyaka. Gu mokedi nangia Pauro akepai ki ya: “Ono nyanyaki riahe du tipa sosono aboro, nga agu yo rengbe gayo berã na wisiga pa wenepai na gbegberẽpai, mbiko manga yo pai na ni.” (AEbere 5:14) Gu fugo nga “rengbe” du kura rogoyo nga naraba, nasarani ani berẽpa gu rabahe angi ambaro naagbiaha.

¹² Ho ani abi gu boro ni ini wai ka ngi mbaro na birĩ ni ningi mbaro, ani ima ino gupai nga si adi ni adia na regbo gbiati wene rabahe tipa ni sonosi gu birĩ re. I aavunganga ni na gu birĩ re te. Ho i avunga gude ni, u ainongo wai nzunzu ka mangasunge na beru gbiati nduru te. Ono fuo bete regbo kusa, u nawirika wai ka zio he na wai ka ndu. Ho u agbia rabahe ni, u ima rengba kada ni bangi ambaro. Wakina gure a, si nadia regbo adia na rabahe tipa ani da ni nyanyaki aKristano.

13. Ginipai nika undo rani ani wiriki wai ka berã wakina gu Yekova aberã?

¹³ Rogo gi buku re, ani ima wisigo wai rengbe ani ka berã kina wai Yekova aberã na kini bi apai wakina gu ko abihe. Ani ima wirika wai ka du na tambuahe na wai ka kpinyemu ga Yekova arugute. Ho ani amanga diaberã ni, ani na sana tirani nga: ‘Gini ndiko watadu gini rugute nga ga Baibiri nafura tipa gipai re? Wai du rengbe mi ka mangasunge na ni? Ginipai Yekova akpinyemu mi mangihe?’​—Mo gedi Asanza 3:5, 6; Yakoba 1:5.

14. Ginipai si aida ani mangihe ka si du nga ani naida ka sonosa gaani idapase?

¹⁴ Ka ani mbunga sonosa gaani idapase kuti Yekova ya. Kina wai ri wene riahe aundo ka sa kpotorani si du nyanyaki,  kina wo a wirikapai tipa Yekova aundo rani ani sonosi nyanyaki idapase. Ho ani atona wirika Baibiri ni, ani awiriki bangua arengo tipa Yekova na gako agene. Ono wa regbo asusa, si naida ani rugutirani na dudunguro apai. Gure nga gupai Pauro aaida ka pehe ho ko aya ni wẽ: “Nyanyaki riahe du tipa sosono aboro.” Ho ani amanga agu apai ni ani awirikaha, ani nagbia tatamana. Baibiri naya: “Mo nigbáta tatamana.”​—Asanza 4:5-7; 1 Petero 2:2.

15. Wai du nyakipa gupai nga ani du na ndikidi nyemuse tipa Yekova na tipa awirinarani?

¹⁵ Boro ima rengba ka du nyanyaki na kpotoni wenengai, ono tipa ka nye wa gure, ni ima ino gupai nga si naida ningerefuo tini wenengai. Wakina gure a, nyanyaki boro ima ino gupai nga si naida ni mangi ome nyanyaki ka banda gani pabakure na Yekova. Pauro atingidi rani nga: “Oni wísigi tironi si ngia oni rogo idapase yo; oni ásadi tironi.” (2 AKorindo 13:5) Wa vura duhe wo, ani aidanga gbua na kina nyanyaki idapase sa te. Si naida gaani nyemuse tipa Yekova na tipa awirina naasona kina kumbatayo. Pauro aya: “Ka mi rengbe . . . ki ini pa gbugbu apai, ka mi du na idapase dunduko rengbe na gbisa abaagangara, [ka] nyemuse adu nga ti re ya, mi du nga ni he te.”​—1 AKorindo 13:1-3.

16. Gini bipai Satana aida ani du na ni?

¹⁶ Satana naida ka sarani ani nibi tirani nga ani arẽnga ka sa ngbarago ti Yekova te. Ko naida ani du na gberãrago na kini berẽ gupai nga ziga ho kuti gaani akpakarapai te. Ko aidanga ani kido kuti awirinarani te na ko aidanga ani du na ngbarago a te. (AEfeso 2:2) Satana ima ino gupai nga gbegberẽ aberã ima rengba ka gbarasapa rani  gbiati gaani pabakure na Yekova. Ono Yekova ima fu he furani si undo rani ani sovura kuti gaani gbegberẽ aberã. Ko ima fu maabangirise furani.

17. Wai du nyakipa maabangirise?

¹⁷ Rogo 1 ATesaroniko 5:8, Baibiri ringbisi gaani maabangirise kuti gu kpakpari marã ni naabanda rii banzengere ho du ni ni ti ngba vura, si nayamba gu kpakpari marã re nga “maabangirise tipa bata.” Du na maabangirise kuti ga Yekova akidohe ima rengba ka banda gaani aberã na ki undo rani ani sovura kuti gbegberẽ aberã.

18, 19. Wai du ga Yesu maabangirise anyakasi ko?

¹⁸ Ga Yesu maabangirise asako ko du nyanyaki. Rogo gu yangara yuru nangia ga gako raka auru kpotosende, ko agbiatiko na fudifudiapai ti mburu kuraha. Mbembedi bakureako abagi ko. Gu kura ko ki oro rimoko. Aguyo ki mbu ko ki oro. Gako aboro ringara azingi kuti ko, ki ya i imiko ni asako ti ngua. Ginipai naundo ko ko hi agi aimisiri  re? ‘Mbiko gu ngbarago nadu fu ko ku mbata yo, ko abasapa zee, ki ima sunga pati kumbabe gu mbata nga ga Mbori.’​—AEbere 12:2.

¹⁹ Yesu aima ino gupai nga ni nye ko ni ruruko, ko nika ye na taarimo fu Bako na ki yugu Satana ni iraziree. Gi maabangirise re afu bakere ngbarago fuko. Ko aima ino gupai a nga barambeda, ko nika duadu na Bako sa ngbangbaturũ yo. Gi maabangirise re aundo ko ko hipai. Wakina Yesu, si naida ani moi berãrani fuo gaani maabangirise. Si nika undo rani ani hipai ka kina ginipai vura kaa manga vurũ.

20. Ginipai rengbe ka undo ro mo du na ruru bipai?

²⁰ Yekova nabi gamo idapase abi gbiati gamo hipai. (Yesaya 30:18; mo gedi Maraki 3:10.) Ko kidohe nga “ko afú agu ahe foro du nyemu he kpotoro yo.” (Atambuahe 37:4) Sidu, mo moi berãro fuo gamo maabangirise. Satana aidanga mo du na maabangirise te na ko naida mo  naabihe nga ga Yekova akidohe adanga ti rengo te. Ono si aidanga mo mbu tiro fu gbegberẽ aberã te! Ka si du nga mo nabihe nga gamo amaabangirise berewe ni ndikidipai foro te, mo sana Yekova tipa undo. Mo tingidi agu afugo du rogo AFiripoio 4:6, 7 nga gu naya: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.”

21, 22. (a) Ga Yekova ringbisapai nga gine tipa kpotosende? (b) Ginipai di mo berã ka mangaha?

²¹ Mo naadia regbo dedede kaa berãkurii gu weneapai du kumbatayo. Barambeda, agu aboro dunduko nika du ni ungayo nikaa iriso Yekova. (Yugoti 7:9, 14) Mo berẽnga kuriipa wai raka nika du rogo vovo zegino. Si nika ngba kisusi agu apai ani aberãha! Satana, gako adaimona, na gbegberẽ apai dunduko nika go kusayo. Mo awokanga te na mo akpingo a te. Kuba gure, aˈuru dunduko mo nikaa zinga rameyo na ome tiro na kidu na ngbarago kadu ni unga ro. Aboro dunduko nikaa mangasunge kina sa tipa ka sa kpotosende ni paradizo. Aboro dunduko nika du na wene riahe na wene ba kaa raka rogoho. Aboro adunga yo nika ngia aira zuu te ono aboro adu na weneringise fu akurayo. Fuo bete regbo kusa, aboro dunduko auru kpotosende nika gbia ngbarago ti du na “gu taarimo nga ga awiri Mbori.”​—ARomo 8:21.

²² Yekova naida mo sako ko du ni bawene Bakureamo. Sidu, mo mangi ome nyanyaki kaa giasangba Yekova na kaa mbeda na ko na aˈuru dũ. Nirengo, ani nyenga anye wa du ani dunduko rogo ga Mbori Nyemuse yo!​—Yuda 21.