BAKABANGIRISE namanga aboro dunduko kodihe na ga Mbori aboro. Bake papara Atambuahe aya: “Sakapai ku kpotore yo ni badungu he.” (Atambuahe 94:19) Na Yesu ape gupai nga ti yangara arame, “berã pa gi unga re” nika sa iriso Yekova ni kpakarakpakaraha. (Ruka 21:34) Ginipai du tipa ro ti gamo? Ya mo berãpa marã, agu akpakarapai nga ga ramukporo, watadu akaza nafu bakere bakabangirise foro? Wai rengbe Yekova ka undo ro mo hihe?

Ani arengbanga ka diabe bakabangirise ni tirani te. Gu mokedi nangia Pauro aya: “I nagbisa rani kirikiri; pai nagasa rani . . . ; i nado rani.” Ono ko aya berewe wẽ “i adingisa nga rani te,” “si adia nga be rani te” na “i agbarasa nga rani te.” Ginipai naundo rani? Gupai naundo rani nga “gu bakere tandu susi” nga gu ome naye be gu gaani Mbori du na tanduapai dũ, nga Yekova.​—2 AKorindo 4:7-9.

Mo berẽnga pa gu regbo mo agbia “gu bakere tandu susi” mbata kusayo. Ya mo mo natingidanga pa gu gumbapai nasa ro mo du na bakere tambuahe tipa ga Yekova nyemuse? Ya mo gamo idapase kuti ga Yekova akidohe anyaki ho mo anaayugopai ni fu kura aboro tipa gu maabangirise nga ga Paradizo? Ho ani andu ni tipa adunguratise na kini pekepa gaani idapase fu kura aboro, ani nagbia ome tipa kaa hi gu bakabangirise nga ga raka na ani nadu na zereda berã rani yo wa ka ani mangisunge fu Yekova na ngbarago.

Nirengo, si rengbe kadu nga dungu apai si aida ani mangihe ti bangisa regbo. Ni kpiapai, Yekova naida gupai nga ani gbata Kindo mbata na kini mangi agu apai nga ga toro. (Matayo 6:33; Ruka 13:24) Ono tie, na ka si du nga rungosi, kaza, watadu agu akpakarapai nga ga ramukporo nabatasa kina omero? Watadu na ka si du nga gu sunge mo amangaha nadia gu ome na gu regbo ka mo nidihe kuti agu apai nga ga dungurati? Omero ima rengba ka bata ho duhe ni nga si naida mo mangi dungu apai ti bangisa regbo, ono omero na gu regbo du bero kidu tooni ka mangaha. Mo ima rengba ka tona bihe nga Yekova nahõ dungu apai bero.

Yekova ima ino agu apai du tipa rani. Ko aidanga ani mangi gupai arẽnga na omerani ya te. Na ko ima ino gupai nga si nadia rani adia na regbo ani du berewe wenengai ti kpotorani na berãrani yo be agu apai fudirani.​—Atambuahe 103:13, 14.

Ni kpiapai, mo bingo wai Yekova angerefuo gu nebi nangia Eriya. Ho Eriya aoro ni ku ngbakungbo yo mbiko gupai nga ko adu na bakere gberãrago na gunde, ya mo Yekova azingi kutiko ki ya fuko ko karagatiko kuti ngba gako sunge? Oó. Yekova akedi maraika fuo Eriya bara ue ko zingisi ko rame yo na ki fu riahe fu ko ko rihe. Wa si avura du wo, fuo  arame 40, Eriya aabakabangiriko kindi na kidu na bakere gunde. Gini kurapai Yekova amangihe ka undo ko? Bambatapai nga, Yekova ayugu gupai fuko nga ko ima rengba ka bandako. Ue pai nga, Yekova angarãsi Eriya ni “bayee fugo.” Ni yangaraha, Yekova ayugu gupai fuko nga kura akutu aboro adu kinaho nairisombori ni ruruyo. Fuo bete regbo, Eriya ada berewe ni zaaza nebi. (1 Abakindo 19:1-19) Ginipai ani awirikaha? Ho Eriya adu ni rogo bakere bakabangirise, Yekova adu na hipai na ki mangipai na ko rogo nunga. Yekova arianga sinoko te. Ko nangerafuo rani wakina gure a.

Ho mo aberã pa guhe ni rengbe mo ka fuhe fu Yekova, si naida mo berẽ kina pa gupai rengbe mo ka mangaha. Ka mo ringbisinga gupai rengbe mo ka mangaha awere na gu mo anaamangaha mbata kusayo ya. Ani yugungo ho na kpiapai: Ka si du nga boro anaaora oto abaangira aora mbata wenengai, ono ní kini mbuhe tipa dungu adiwi watadu agarã, ní arengbanga ka tonaha kini oro kina wai ní anaaora mbata te. Kuba gure, ní natonaha ní maa ní rukutu asasa nga gu nika undo ni ní gbia ome na ki wiriki hipai berewe. AKristano wakina agu aboro naora oto abaangirã. I nata ora kidu na wene sasa berãyo yo. (1 AKorindo 9:24-27) Mo ima rengba ka maa sasa sa nga ga toro nga gu rengbe mo kada ti ni awere. Ni kpiapai, mo ima rengba ka maa gu sasa nga ga ndu tipa adunguratise. Mo sana Yekova ko undo ro mo da ti gu gamo sasa re. Wa mo nikaa gbia ome rogo toro yo berewe, mo nika “ía Yekova ka bi ko ko du ni wene ko!” (Atambuahe 34:8) Mo tingidi gupai nga, gupai rengbe mo ka mangaha ka yugo gamo nyemuse na ni tipa Yekova, ka si vura du ni wiri toonihe, ko nabihe abi na nyanyakipaha.​—Ruka 21:1-4.

Wai gu Yekova afu ome fu June ri karagatiri fuoko? Ri aya: “Mi anaakpara akpara kindi fu Yekova, kini sanako ko undo re. Dia-wire agumbapa gu bakere dunguratise fere si adu nga si nika manga rogo gu gbata mi adu rogoho. Mi adiberã ka ndu ku pati gu bakere dunguratise re tipa uru sa. Si aima du ni bawenepai gbe kadu na ga Yekova aboro berewe. Gu bakere dunguratise re aima fõ re. Awere, mi namangasunge fu Yekova na ngbarago berewe. Raka ima du na rogoyo ti ni fere. Mi ima ino gupai awere nga, si aidanga mi kpara tire ti awirina te na mi arengbanga ka mangapai zanga gayo undo te. Mi na ngbarago nga regbo adu kindi fere tipa mi karagatire.”