YEKOVA naaringbisa tiko dedede kuti babanda akandoro. Ko nakido rani rogo fugoko yo nga: “Mi ni tire nikangera tipa gimi akandoro, ki nigbata ra.”​—Yezekere 34:11, 12.

Ada nga ga Yekova akandoro? Ka pepai ni wiri guruhe, ga Yekova akandoro nga agu aboro nakpinyemuko na kini irisiko. Ziazia Kekeapai naya: “Ani ta irisa ko nizungadi tirani; ani nikúku bara bangiri Yekova nga Bafurani! Bambiko ko nga gaani Mbori, ani nga aboro gako banambu, nga gako akandoro.” (Atambuahe 95:6, 7) Wakina wai akandoro naapefuo babandara, airisi Yekova na nyemu ka pekafuo gayo Babanda Akandoro. Ya mo ingapai tiyo te? Oó. Ti kura aregbo, kura ga Mbori “akandoro nigbandaka” ki da ni “ingiingi akandoro” na kini ‘ngbuo angbuo.’ (Yezekere 34:12; Matayo 15:24; 1 Petero 2:25) Wa vura duhe wo, ho boro ainga ni, Yekova na gu kido nga ni nika karagatiní akaraga berewe fuoko.

 Ya mo mo nabihe nga Yekova kindi nga Babanda ro? Wai gu du Yekova ni Babanda akandoro areme? Ani makianga agene biata:

Ko nariga rani rogo toro yo. Yekova naya: ‘Mi aríga ra na wene banambu, ami apika sande rogo wene nvuo ami arí wene wesewese nvuo.’ (Yezekere 34:14) Yekova nafu dungu ariahe furani nga ga toro ti regbo ho. Ya mo mo natingidanga pa gupai mo agedihe rogo gaani awaraga, mo agihe rogo gumbapai, watadu mo abihe rogo vidio nga gu nakaragapai kuti gamo kpee tipa undo? Ya mo si aasanga ro mo bihe nga Yekova naberãpa ro aberã te?

Ko nabanda rani na kini songodi rani. Yekova nakidohe nga: ‘Mi ayega na gu ngbuongbuo ra, mi ki vodi gu gbarĩgbarĩ ra, mi ki nyakasi gu rurungbura ra.’ (Yezekere 34:16) Yekova nanyakasa agu aboro narungbura be bakabangirise. Ko navoda aro nga ga gako akandoro, kini undo yo i hu ka si du nga boro watadu kina akurayo aidipase aimisi yo. Na ko nakaraga aguyo fuoko ingi na aguyo du ni fudifudiyo kpotoyo yo.

Ko naberãpa rani aberã. Yekova naya: “Mi ka gbata gimi akandoro, mi ki batasi ra rogo arago dunduko yo ami agbandaka ku ho ni. . . . Mi agbáta ingiingi ra.” (Yezekere 34:12, 16) Ho kandoro ainga ni, Yekova abingo ní nga ni arengbanga ka manga ariapai berewe te te. Ho kandoro ainga ni, ko ima inoho, ko nagbata ru, na ko nadu na bakere ngbarago ho ko agbia ru ni. (Matayo 18:12-14) Nirengo, ko naya ti airisiko wẽ “gimi akandoro, nga agu akandoro nga ga gi banambu ra.” (Yezekere 34:31) Mo kina dagba agu akandoro re.

Tipagine Yekova agbata ro ti ni na kini yamba ro mo karagatiro fuoko? Bambiko ko naida mo du na ngbarago. Ko nakidohe nga ko nika fu maku afu fu gako akandoro. (Yezekere 34:26) Anga kungbo kidohe nga ha te. Mo nitiro ima bi wai ga Yekova akidohe adigisotihe.

Mo tingidinga pa gu regbo mo atona ka ino Yekova. Ni kpiapai, mo adu wai ti gu regbo mo aini gu rengo du tipa rimo Mbori gbiati gako ringbisapai tipa aboro? Ya mo mo natingidapa wai rago anaangba tiro kadu na awirina pati bakere adunguratise? Ho mo anitungusi wene pangbanga ni fu gu boro du na nyemupai tini, ya mo mo anaaganga ku kporo yo na bakere ngbarago te?

Mo ima rengba kadu na ngbarago wa gure berewe. Gu ga Mbori amoyambu naadu bakuru kusayo akpari ki ya: “Ako Yekova, mo káraga rani koyo du mo ni berewe, si du ani ka karagatirani ti ni! Mo mbákadi pa gaani arame berewe a wa si adu mbata!” (Abia Kpenunga 5:21) Yekova aima karagapai kuti gu kparakpee re, na gako aboro akaragatiyo ka irisoko na ngbarago berewe. (Nemaya 8:17) Yekova nika manga kina gu bangisapai re tipa ro.

Wa vura duhe wo, si ni taatapai ka karagatise fuo Yekova te. Mo bingo bete agu akpakarapai du ti karagatise fuo Yekova na wai rengbe mo ka diabehe.