WIRIKAPAI 01
Waigu Rengbe Baibiri ka Undo Ro?
Ani dunduko du na nyemu ka ino dungu apai tipa raka, arungo, kpio, gbiati gupai nika manga kumbatayo. Ani dunduko naida na undo a tipa wai rengbe ani ka gbia marã ka ngerafuo gaani aborokporo na tipa wai rengbe ani ka raka gu ramukporo du na ngbarago. Dungu aboro bi gupai nga, anga Baibiri naundo yo sa ka karagapai kina kuti gayo nyanyakipa asanahe te, ono si naundo yo aundo a na wene arugute nibipa wai kaa raka na aˈuru dunduko. Aboro dunduko rengbe ka gbia undo ti Baibiri.
1. Gini bete ngbatunga asanahe Baibiri akaragapai kutini?
Baibiri nakaragapai kuti gi nyanyakipa asanahe re: Waigu raka aenge? Tipagine aboro araka ti ni? Tipagine aboro arungo ti ni? Ginipai ninaamanga ho boro akpi ni? Ka si du nga aboro dunduko naida zereda, tipagine tie du avura ti ni ni bakerehe? Ginipai nika manga tipa kpotosende kumbatayo? Baibiri naundo rani ani gbia akaragapai kuti agu asanahe re, na amirioni aboro ima bi gupai nga gaha akaragapai ni bawenehe gbe.
2. Waigu Baibiri narengbe ka undo rani ani gbia ngbarago rogo gaani raka yo na aˈuru dunduko?
Baibiri nafu wene arugute furani. Ni kpiapai, si nayugo wai fu aborokporo rengbe yo ka raka na ngbarago. Si nafu arugute nibipa wai ka mangapai kuti fuda berãse yo na wai rengbe ani ka gbia ngbarago ti gaani sunge. Mo nika wirika gupai Baibiri ayugoho tipa agi apai re gbiati agu akuraha wa ani nikaa ndu kumbatayo kaa wisigo gi buku re kina sa. Mo nika ye ka ida kuti gupai nga, ‘Ziazia Kekeapai dunduko [ai gupai du rogo Baibiri]’ si na undo ti ni.—2 Timoteo 3:16.
Gi buku re adianga ba Baibiri te. Kuba gure, si naundo ro mo wisigi Baibiri nitiro. Sidu, ani nangarasa ro nga mo gedi agu averesi du rogo gi wirikapai re na kini ringbisihe na agu apai mo awirikaha.
MO WIRIKI KURA DUNGU APAI
Mo bi wai Baibiri naundo kura aboro, wai rengbe mo ka gbia ngbarago ti gedaha, na ndu gupai duhe ti ni ni wenepai tipa mo gbia undo tipa ka rugatiro na ni.
3. Baibiri ima rengba ka ngbembatayo furani
Baibiri wakina gu barõ, watadu bataria nahasa rago ni bakerehe. Ani ima rengba ka mangasunge na Baibiri tipa si yugu wai furani rengbe ani ka manga wene adiaberã na si undo rani ani ini ginipai nika manga kumbatayo.
Mo gedi Atambuahe 119:105, na tifuoho mo ki sakipai tipa agi asanahe du kusende re:
-
Waigu gu bake papara Atambuahe re aabi Baibiri?
-
Waigu mo abi Baibiri?
![Kumba nandu nziinzii rago pangba ime ri ambia ima bataria [baro].](https://assetsnffrgf-a.akamaihd.net/assets/m/1102021201/univ/wpub/1102021201_univ_cnt_02_xs.jpg)
4. Baibiri ima rengba ka karagapai kuti gaani asanahe
Kura dee sa abi gupai nga Baibiri ima karagapai kuti gu gari asanahe naima fuda ri tipa dungu agarã. Mo bi gu VIDIO re, na tifuoho mo ki sakipai tipa agu asanahe ngbe fuoho.
-
Rogo gu vidio re, gini ngbatunga asanahe gi dee re adu na ni?
-
Waigu wirika Baibiri aundo ri?
Baibiri nangarasa rani ani naasasanahe. Mo gedi Matayo 7:7, na tifuoho, mo ki sakipai tipa gi pai re:
-
Gini asanahe du mo na ni nga gu Baibiri narengbe ka karagapai kutini?
5. Mo ima rengba ka gbia ngbarago ti geda Baibiri
Badungu aboro nagbia ngbarago ti geda Baibiri na kini gbia undo ti ni. Mo bi gu VIDIO re, na tifuoho, mo ki sakipai tipa agu asanahe ngbe fuoho.
-
Rogo gu vidio re, ga paranga aboro bipai ningia gine tipa gedapai?
-
Wa vura duhe nga i akpingo nyemu gedapai te, tipagine i aida aida ti ni ka geda Baibiri?
Baibiri nagumba gupai nga, si ima rengba ka fu agu arugute furani nga gu rengbe ka fu wasa na maabangirise. Mo gedi ARomo 15:4, na tifuoho mo ki sakipai tipa gi sanahe re:
-
Ya mo gu kidohe nga ga Baibiri du tipa fu wasa na maabangirise angbanga tiro te?
6. Kura aboro ima rengba ka undo rani ani girogo Baibiri yo
Dungu aboro bi gupai nga, kupati gupai nga ka geda Baibiri nisayo, sakapai tipaha na kura aboro ima du na undo ti ni. Mo gedi Amokedi 8:26-31, na tifuoho mo ki sakipai tipa gi sanahe re:
-
Waigu rengbe ani ka rugatirani na Baibiri?—Mo bi veresi 30 na 31.
Kumba nga boro Etiopia aaida na undo tipa ka giarogo Ziazia Kekeapai yo. Dungu aboro areme nabihe nga undo kina ti sakapai tipa Baibiri na kura aboro
GU KURA ABORO NAPE GUPAI NGA: “Wirika Baibiri nga kungbo gbarasa regbo.”
-
Ginipai rengbe mo ka pehe tipa gipai re? Na tipagine?
GINIPAI MO NAWIRIKIHE?
Baibiri na arugute rogoho tipa agu apai ani amangaha na aˈuru dunduko, si nakaragapai kuti nyanyakipa asanahe, na si nafu wasa gbiati maabangirise.
Fugöpai
-
Gini ngbatunga arugute rengbe ani ka gbiaha rogo Baibiri?
-
Gini ngbatunga asanahe Baibiri akaragapai kutini?
-
Ginipai mo akpinyemu ka wirikaha rogo Baibiri?
MO WETEKE GU KURA APAI
Mo bingo wai rengbe agu arugute nga ga Baibiri ka undo ro areme.
“Agu Ayugopai Nga ga Ziazia Kekeapai—Gu Tatamana Kaa Nyasanga Ya” (Ngbaõbambu Sinziri Na. 1 2018)
Mo bingo wai Baibiri aundo kumba nga gu ko naasota na bakabangirise mbuko kindi ni gude.
Mo wisigingo agu arugute nga ga Baibiri tipa aborokporo.
“Gbugbu Apai 12 Nasa Ramukporo Si Du Na Diabese” (Awake! Na. 2 2018)
Mo bingo wai Baibiri akusa gu iraira bipai ku yangura du dungu aboro na ni tipa gu boro nzunzu nazoga gi zegino re.
Gupai Si Aida Mo Wiriki Ziazia Kekeapai Ti NI—Gu du ni Gbangaha (3:14)
