Dungu aboro rogo zegino na agu akpakarapai nga gu nasayo i du na gberãrago gbiati abakabangirise na si ki niye na imisiri fuyo. Ya mo pai tipa ro wa gure? Isoke, mo narungo be kaza watadu mbiko pakpio ga boro. Mo ima rengba ka sana tiro nga, ‘Ya mo apai angbaangba nzunzu rogo raka yo?’ Gu karagapai Baibiri afuhe kuti gu sanahe re nafu maabangirise.

1. Wai du Baibiri afu maabangirise?

Anga Baibiri nasakapai sa tipa kina ndu gupai du akpakarapai ti ni rogo zegino te, ono si nape gu wene pangbanga a nga agu akpakarapai re gbua tipa bete regbo na barambeda, si nika go dunduko kusayo. Agu akidohe nga ga Baibiri ima rengba ‘ka fu maabangirise fu rani tipa gaani apai kumbatayo.’ (Mo gedi Yeremaya 29:11, 12.) Agu akidohe re naundo rani a ani mangipai kuti agu akpakarapai du ani na ni awere, ani du na ruru bipai, na ani ki gbia nyenye ngbarago.

2. Gini ngbatunga raka Baibiri nasakipai tipaha kumbatayo?

Baibiri nape gupai kumbatayo nga, ‘kpio adúnga berewe te, rungo adúnga na akpe na ima a te.’ (Mo gedi Yugoti 21:4.) Agu akpakarapai nasa aboro ka i dunga na maabangirise areme ya, wagu nga rungo, iraira sarangbanga, akaza, gbiati kpio, si adunga berewe te. Baibiri nakidohe nga aboro nika raka na ngbarago nyeanye kindi rogo Paradizo auru kpotosende ane.

3. Waigu rengbe mo ka sonosa kido kuti gu maabangirise Baibiri afuhe?

Dungu aboro namaabangiriyo tipa weneapai si mangi, ono i arengbanga ka du nzunzu na gu kido nga gu gayo maabangirise re adigiso tihe te. Agu akidohe nga ga Baibiri kia. Ani ima rengba ka sonosa gaani kido kuti gupai si apehe ‘niwisigo ani Ziazia Kekeapai’ wenengai. (Amokedi 17:11) Wa mo nikaa wirika Baibiri, mo nika bi gu nduapai abi nitiro rengbe mo ka ida ti ni kuti gupai si apehe tipa raka kumbatayo.

 MO WIRIKI KURA DUNGU APAI

4. Baibiri nafu gu maabangirise nga ga raka nyeanye kindi auru kpotosende zanga na akparakapai

Mo bingo agu akidohe Baibiri afuhe. Ginigu dagbaha yo mo nakpinyemuhe gbe? Na tipagine duhe ti ni na nyanyakipaha foro?

Mo gedi agu averesi i nakehe pati agu akidohe re, na mo ki sakipai tipa agi asanahe re:

• Ya mo mo nabihe nga agi averesi re nafu maabangirise? Ya mo si rengbe kafu maabangirise fu gamo aborokporo gbiati abakureamo?

Mo bingo tiro nga mo naraka rogo gu zegino

 5. Gu maabangirise Baibiri afuhe ima rengba ka manga ariapai

 GINIPAI MO NAWIRIKIHE?

Gu maabangirise Baibiri afuhe furani tipa bawene raka kumbatayo, naundo rani ani sovura kuti gaani akpakarapai.

Fugöpai

• Tipagine aboro aida maabangirise ti ni?

• Ginipai Baibiri apehe tipa raka kumbatayo?

• Wai du rengbe maabangirise tipa raka kumbatayo ka undo ro awere?