1.   Wai ka Ino Babera Duna Bakere Ome Ti Ni

2.   Gini Regbo si Adu Nga Masiya Nika ye Ti Ni?

3.   Gu Gene Husa Kaza Nga gu Nakoda Mangasunge na Kure

4.   Kparaka

5.   Aˈuru Ongoda Gbiati Apumbo

6.   Gu Kaza Nazio Boro Ti Kurani

7.   Sunge-Bagaahe na Agu Apai du Kuti Ndiko

 1. Wai ka Ino Babera Duna Bakere Ome Ti Ni

Waigu ani aino gupai nga “Babera du ni bakere he” narukuba ziree apambori dunduko? (Yugoti 17:5) Mo wisigingo gi nduapai re:

• Ri namanga apai rogo Zegino dunduko. I nasakapai tipa Babera du ni bakere he nga ri sungu rii “rimbasa aboro, na arikaaboro.” Ri “nazoga abakindo zegino.”—Yugoti 17:15, 18.

• Ri arengbanga kadu nga gu ome du aboro poritiki na ni watadu ababagiahe te. “Abakindo zegino” na ‘ababagi ahe’ nika bata abata ho i nikaa gbarasa ri ni.—Yugoti 18:9, 15.

• Ri ayugongo rengo tipa Mbori te. I nayamba ri nga debäri mbiko ri namangasunge kina sa na azogarago tipa wa ka ri aagbia marã beyo na i ningba na ri. (Yugoti 17:1, 2) Ri na nanga aboro rogo zegino dunduko. Na ri du nasa gupai nga dungu aboro ni kpiki.—Yugoti 18:23, 24.

Mo karagatiro kuti wirikapai 13 memepai 6

 2. Gini Regbo si Adu Nga Masiya Nika ye Ti Ni?

Baibiri agumba gupai kumbatayo nga aposo nika du 69 da kuti gu regbo Masiya nika ye ti ni.—Mo gedi Daniere 9:25.

• Gini regbo agu aposo du 69 re atona ti ni? Rogo gu garã nangia 455 M.B.K. Ti gu regbo re, Gavana Nemaya ada Yerusarema yo tipa ka “bungia Yerusarema na ka dua ha berewe.”—Daniere 9:25; Nemaya 2:1, 5-8.

• Bagizo regbo wai agu aposo 69 re adihe? Rogo gu kura sangbaanebi nga ga Baibiri, uru sa narukuba garã sa. (Pa Geda Aboro 14:34; Yezekere 4:6) Sidu, poso sa aarukuba agarã saba. Rogo gi sangbanebi re, 69 aposo bara saba naye na gu bange agarã nga 483 (69 aposo x 7 auru).

• Ti gini regbo agu aposo 69 re adigi ti ni? Ka ani tona geda agarã ti 483 kuti 455 M.B.K. si naye na ani kuti gu garã nga 29 F.B.K. a Gere nangia gu garã nzunzu Yesu azi bapatiza rogoho na ki da ni Masiya!—Ruka 3:1, 2, 21, 22.

Mo karagatiro kuti wirikapai 15 memepai 5

 3. Gu Gene Husa Kaza Nga gu Nakoda Mangasunge na Kure

Gu kura agene husa kaza kinaho nga gu nakoda mangasunge na kure gu boro nawoka. Bete agu agene husa si aidanga Kristano mangipai kutini ya du wa gu nga—fu kure fu kura boro, watadu i naima gbe kureni mbu regbo koyo ka mangasunge na ni ti gu regbo i nika gbakaza ti ni—Pa Fu Rugute ni Ue he 15:23.

Ono tie, gu kura agene husa kinaho arengbanga ka du ni gbegberẽhe ya. Gipai re nakoda dia kure boro ka wisigoho, gu masini nagiriso kure, gbiati gu nasa kure si du nzaranzara, watadu mangasunge na gu masini nazaka gene fu kure si ta kura kini girisi tihe kini karaga tihe kutii kpotoboro yo zanga i bandaha abanda rogo kura ba kia watadu gu namangasunge kaa gbandaka kure tii kpotose yo. Kristano du wa ka ni diberã nitini tipa wai i nika mangasunge na kure ni ti regbo wisigo pa kaza, watadu vuru gu regbo husa ga ni kaza du ni ku ngbaha awere re. Amunganga ni bakiakia ima rengba ka manga gi ngbatunga gene husa kaza re tooni kia. Sidu, mbata fu boro idipa agu apai nabipa wai i nika gbakaza, wai i nika wisigo kure ni tipa kaza, watadu wai i nika husa ni, si naida Kristano ini wai nzunzu i nika mangasunge na kure ni. Mo bingo agi asanahe du re:

• Na ka sidu nga i nika kusa kure re tii kpotore yo si naandu bani na si ima rengba a ka ru tipa bete regbo? Na ka sidu nga i amaa bete kurere ku rogo makana kini ka karagaha ku tii kpotore yo watadu i ki rengbe a ka rugusa gu kure re gene tipa bete regbo wa si afu? Ya mo sangba kpotore yo ambu re mi bi gu kure re ni papara re kindi, sidu ka si aidanga gupai nga i ‘ukaha ku sande ya’?—Pa Fu Rugute ni Ue he 12:23, 24.

• Na ka sidu nga ti regbo gimi husa, i nika dia bete kure re kusayo, ki aria bete apai ti ni, na ki karagaha kutii kpotore yo berewe? Ya mo si afuda gu gimi sangbakpotoseyo mi arabaha kuti Baibiri, watadu mi ima rengba ka ida ngbatunga agu agene husa re?

Mo karagatiro kuti wirikapai 39 memepai 3

 4. Kparaka

Baibiri nagumba gupai fu kumba ku dee na diakumba nga ka i kparakanga ya na si ima yugo gupai gbaiga nga, kparaka ambunga gene fu kura badiarogatise ni mangi rogatise berewe te. (1 AKorindo 7:​10, 11) Ono tie, gu kura apai kinaho nasa gu kura bete aKristano i berẽpa kparaka.

• Zanga ngerafuo aborokporo rogo wia yo: Kumba ku dee naka ka ngerafuo gako aborokporo rogo borose yo, si ki da ti gu bangiriba nga ka gako aborokporo dunga na agu ahe beyo si aidaha be boro rogo raka yo ya.—1 Timoteo 5:8.

• Ta badiarogatise: Manga fu badiarogatise gbegberẽ si ki da ti gu bangiriba nga gani badiarogatise nabihe nga gani raka ima du ngbapai yo.—AGaratio 5:19-21.

• Asada rogo apai yo dũ ka gbarasa ga boro pagume na Yekova: Ga ni badiarogatise nasaha fu ni ni kpakarakpakaraha ni irisi Yekova.—Amokedi 5:​29.

Mo karagatiro kuti wirikapai 42 memepai 3

  5. Aˈuru Ongoda Gbiati Apumbo

AKristano amanganga agu aˈuru ongoda nasa gberãrago ti Yekova te. Ai Kristano du wa ka ni mangisunge na gu ga ni sangbakpotoseyo ni narabaha kuti Baibiri ka diaberã tipa wai ka mangapai kuti agu apai nabipa aˈuru ongoda. Mo bingo bete agi akpiapai re.

• Boro fu sene foro nga wene uru ongoda. Mo rengbe ka pe gupai gbua nga, “tambuahe foro.” Ka sidu nga boro naida ka ino kura dungu apai, mo ima rengba ka saka ndu gupai mo amanganga pumbo aˈuru ongoda ti ni ya.

• Gu ga badiarogatise angianga Dezire Yekova ya yambu ro oni rihe na agume ni ti regbo uru ongoda. Ka sidu nga sangbakpotoroyo ima idaha foro mo ndu, mo ima rengba ka saka gupai fu ga badiarogatise mbata fu oni da yo nga, ka sidu nga gu sungo re nika koda sino apagano, mo arimisongo tiro ku rogoyo te.

• Gamo bairasunge fu gu kura mara foro ni gamahe ti regbo uru ongoda. Ya mo si naida mo ka gu marã re? Si arengbanga ka du wo te.Ya mo gamo bairasunge nabi gu marã re ni papara gu pumbo re, watadu ni nabihe gbua nga si nga gu gene si aida ni yugu tambuahe ngbaha foro tipa gamo wene sunge?

• Boro fu gamahe foro ti regbo uru ongoda. Gu boro nafu gi gamahe re ima rengba ka pe gupai nga: “Mi ima inoho nga mo naamanganga pumbo uru ongoda te, ono mi naida ka fu gere foro.” Isoke, si ima rengba ka du nga, wene sino du gbua gu boro re ayugoho. Ono ya mo ndupai ho ka berã gupai nga ni naida ka asada gamo idapase, watadu ni naida ka rimiso ro kurogo pumbo uru ongoda? Tifuo berã mo kurii gipai re, mo du si aida mo mangi diaberã singia mo nika dia gu gamahe re. Rogo gaani adiaberã yo dunduko, ani naida ka du na gigiri sangbakpotoseyo na ki du ni ruru rani fu Yekova.—Amokedi 23:1.

Mo karagatiro kuti wirikapai 44 memepai 1

 6. Gu Kaza Nazio Boro Ti Kurani

Bambiko ani ima kpinyemu aboro, ani na rubangirise kazanga fu gu kaza boro adiaha ti kurani fu kura aboro. Sidu, ka ani ini gupai nga ani na gu kaza boro adiaha ti kurani watadu ka ani berẽ gupai nga si ima rengba kadu tirani na ani ima rengba ka fuhe fu kura aboro, si naida ani du na rubangirise. Ani namangapai wa gu re mbiko Baibiri nazinahe nga: “Mbisimo akuaro du ti ro a wa du gamo.”—ARomo 13:8-10.

Waigu rengbe gu boro du na gu kaza boro adiaha ti kurani ka yugo gi nyemuse re fu kura aboro? Si aidanga gu boro du na gu kaza boro adiaha ti kura aboro tona ka yugo gu nyemuse du wa dungo boro watadu ka nyora ngba kura ni te. Si aidanga rago gberẽ ti ni te ka sidu nga gu kura aboro nabihe nga tipa gayo aborokporo du ni bandabanda yo si aidanga i yambu ni ku kpuyo te. Na mbata fu ni zi bapatiza, si naida ni pe gupai du tipa ni fu barii gu rondo nga ga abaakumba, tipa wa kai mangi mbakadapai ka banda gu kura aboro nika zio bapatiza a. Mbata fu boro tona manga gu mbakadapai nga ga rogatise, ka si du nga boro aima du rogo gu bangiriba nga gu ni naima rengba ka dia gu kaza boro adiaha ti kurani rogo ho, si naida ni ndu nitini ka wisigo kureni. Ni manga mo gipai re, mo nayugoho nga mo naberãpa kura aboro aberã “ka oni bérẽ nga pa kina gaoni pai ya, ono oni bérẽ pa ga akuaroni apai.”—AFiripoio 2:4.

Mo karagatiro kuti wirikapai 56 memepai 2

 7. Sunge-Bagaahe na Agu Apai du Kuti Ndiko

Ani ima rengba ka ne akpakarapai nimaa ani agu apai nga gu nabi pa sunge-bagaahe gbiati marã rogo kekepai yo—ka si vura du vurũ nga gu giatise re dagba rani na gu kura Kristano. (Yeremaya 32:9-​12) Wa vura duhe wo, ti gu kura aregbo, aKristano ima rengba ka du na rukutu azanga giatise dagba yo tipa pa marã watadu gu kura apai. Si naida i asadi ka mbakada ngbatunga gi zanga giatise re ni ipiipihe rogo zereda yo na kina gu boro du gupai re dagbayo na ni.

Ono waigu tie, si aida ani mbakadi gu kere azanga giatise du wa kitangbanga boro watadu biriki? (Mo gedi Matayo 18:15-17.) Yesu afu adiandue fu rani biata ani pekefuoho:

1. Oni asadi ka mbakada dagbagapai dagba tironi.—Mo bi veresi 15.

2. Mo sana wirina sa watadu ue rogo dungurati nga agu yo naima nyaka rogo toro yo tipa ka ndu na yo.—Mo bi veresi 16.

3. Ka si du tie nga gupai re kindi i atambakada nga ha te, tifuo gure du tie rengbe boro ka ndu ti ni fuo abaakumba.—Mo bi veresi 17.

Kura aregbo kinaho si adanga ani ndu na awirinarani ku ngbangayo ya mbiko gipai re rengbe ka ye na gbarasarimo kuti rimo Yekova gbiati dungurati. (1 AKorindo 6:​1-8) Ono tie, kura apai kina ho si nika ida i mbakadihe kina ngbanga yo wa gu nga: dia waraga mbutise, ka ngbe agude, gu marã si aida kumba watadu dee naafuhe fu gani kuru badiarogatise ka si du nga i ima mbutiyo, ka gbia waraga basunge igo marã, gbiati gu kura apai si aida boro ndu na ni kina ku ngbanga yo tipa i mangipai kina kuti gu sangba boro ni akehe mbata fu ni kpi. Gu Kristano nandu na ngbatunga agi apai re ku ngbanga yo ka nyasa riipaha rogo zereda akuonga agu arugute nga ga Baibiri te.

Ka si du nga kere gbegberẽpai mangi​—wagu nga kodaba na boro ngbaome, wasi gude, manga fu boro gbegberẽ, dĩ boro ngba kere gene watadu imo boro—⁠Gu Kristano ka tingidi agi apai re fu irangbii akuonga agu arugute nga ga Baibiri te.

Mo karagatiro kuti wirikapai 56 memepai 3